Woo khanst tuu woere hofnung fine?
Woo khanst tuu woere hofnung fine?
TAYN uer hot xtiil kehal un siits aus tas se kaput is. Fer ti uer flike, finst tuu unerxiitliche optsyoone: kepts fiile propakante iwer uerfliker un al tuun kroose ferxpreche mache, welche woo soo kaar xtime net. Awer was teest tuu mache wëns tuu raus fine teest tas te man woo phaar yoore tayn uer kepleent hot, is tayn nochper? Un noch, tuu finst raus tas eyer wilich is fer tich helfe un tuu prauchst soo kaar niks petsaale! Soo weyer es laycht raus suuche was se mache, kël?
Awer yets wole mer tiise uer ferklayche mit tayn aychne apiliteet fer hofnung hon. Wëns tuu raus finst tas tayn hofnung ferxweecht sich — wii mit fiile pasiirt in tiise xweyere tsayte — weer suuchst tuu fer hilef kriin? Fiile layt saan tas se khene te propleem flike, awer ti fiile aanunge woo se kepe khene fiilaycht net xtime un konfus sin. Tan, warom net eyerst suuche Tee woo hot ti mënxheet kepleent mit te apiliteet fer se hofe? Ti Piipel saat tas Eyer “net wayt fon uns is” un tas Eyer teet uns kërn helfe. (Aphostele sayn Kexicht 17:27; 1te Pheeter 5:7)
Een tiifer ausleyung fon te hofnung
Ti Piipel sayn ausleyung iwer ti hofnung is kreeser un tiifer wii was ti meyerste toktere, syentiste un psikooloke hayt tenke. Ti wërter woo in te Piipel iwersetst sin wii “hofnung”, in te orixinaale xprooche, petayte “etwas ërnst waarte”, orer “tas pestes hofe”. Ti hofnung is kemacht woer fon tswaay haupste teele: ti wunx fon etwas kuutes hon un te funtament fer se klaape tas tiise kuut tings khome tuut. Ti hofnung woo ti Piipel kept is net ploos etwas woo in unser khop is; tii xtaypt sich uf fakte un pewaysunge.
In tiise phunkt, ti hofnung is eenlich wii te klaape: meyer thërfe pewaysunge hon — net plint traue. (Hepreeyer 11:1) Soo wii soo, ti Piipel macht een unerxiit tswixich te klaape un ti hofnung. (1te Korinter 13:13)
Fer es ferklayche: wëns tuu etwas fer een liipe froynt ferlangst, host tuu ti hofnung tas eyer tich helfe tuut. Tayn hofnung hot een funtament wayls tuu aan tayn froynt klaapst — tuu khënst tëm kuut un host xon tëm kesiin sich mit kuutheet un krooshërtslichkheet in anere situatsyoone aan xtele. Tayn klaape un tayn hofnung sin ticht ferpunt — tii tuun soo kaar eene aan te aner ap hënge — awer tii sin anerste. Wii khanst tuu soo een sort hofnung aan Kot hon?
Te funtament fon te hofnung
Kot is ti kwel fon te woere hofnung. In te piiplixe tsayte, Yeehoowa waar wii “Israël sayn hofnung” keruuft. (Yeeremias 14:8) Yeete hofnung woo sayn folek traue khent, is fon tëm khom. Tes weeche, waar eyer tëne sayn hofnung kewees. Soo een sort hofnung waar net ploos een wunx. Kot hot tëne een fest funtament kep fer hofnung hon. Torich ti hunerte yoore woo eyer mit tëne um kang is, hot eyer noo un noo ferxpreche kemacht un tëne erfiilt. Yosuë, Israël sayn fiirer, hot fer tas folek kesaat: “Un iir wees kans kenau tas ti kanse kuute ferxpreche woo Yeehoowa fer aych kemacht hot, hon sich kenau erfiilt.” (Yosuee 23:14)
Hayt, tausente yoore xpeeter, tas hot sich net keënert. Ti Piipel is fol mit Kot sayn wunerliche ferxpreche un fon kenaue historixe pewaysunge iwer tëne sayn erfiilung. Ma khan soo fiil aan Kot sayn profeetixe ferxpreche traue tas, als mool, waare se kexrip in een aat wii wën se sich xon erfiilt hëte!
Weeche tas, khene mer ti Piipel wii “tas puuch fon hofnung” pexraype. Soo lang wiis tuu xtutiirst wii is Kot mit te mënxe um kang, tayn uersache fer uf Tëm hofe tuun sich ferxtërke. Te aphostel Phaul hot kexrip: “Ale tinge woo foer heyer kexrip kep sin, sin kexrip kep fer unser instrutsyoon, tas mer hofnung hëte torich ti persewerans un torich ti troost fon te Xrifte.” (Romaaner 15:4)
Was fer hofnung kept uns Kot?
Wanee prauche mer mee hofnung hon? Is es net wën mer foer tëm toot sin? Awer, fer fiile, hauptseechlich in tiise xtun — wën yemant woo se liipe xtërpt — is es tëne xweyer hofnung hon. Am ën, was khent unhoflicher wii te toot sin? Tee wil uns al fange. Meyer khene uns fom toot ploos fer een tsayt ferxtekele, un mer khene tee net fermache. Weeche tas, xtimt tas ti Piipel te toot wii “te letste faynt” ruuft. (1te Korinter 15:26)
Tan, wii khene mer hofnung fine wën mer foer tëm toot sin? Te selwich wersikel fon te Piipel woo ruuft te toot wii “te letste faynt”, saat aach tas tee “wërt tsu niks kemacht”. Yeehoowa Kot is xtërker wii te toot. Eyer hot tas xon fiil mools pewayst. Wii? Tee hot layt fom toot uf keruuft. Ti Piipel xprecht iwer 9 unerxiitliche situatsyoone woo Kot sayn macht penutst hot fer layt tsurik tsum leepe pringe.
Es kept een wunerliche payxpiil too tefun: Yeehoowa hot fer sayn Soon, Yeesus, te macht kep fer sayn liipe froynt Lasaro, woo xon fier taache toot waar, uf ruufe. Yeesus hot tas net ferxtekelt, awer forich fiile layt kemacht. (Yoohan 11:38-48, 53; 12:9, 10)
Fiilaycht, froost tuu tich: ‘Warom waare tiise layt uf keruuft? Sin se net alt kep un, am ën, noch mool kextorep?’ Yaa, is woer. Awer, weeche tiise kexichte iwer tëm ufxtaye — woo ma traue khan —, kriin mer woere hofnung hon: meyer khene mee wii ploos ti wunx hon tas unser keliipte woo kextorep sin noch mool leepe tuun; meyer hon uersache fer se klaape tas es pasiire tuut.
Yeesus hot kesaat: “Ich sin tas ufxtaye un tas leepe.” (Yoohan 11:25) Eyer tuut ti kraft fon Yeehoowa kriin fer ti layt welt wayt uf ruufe. Yeesus hot aach kesaat: “Ti tsayt is am khome wën al tii woo in te kreeper sin, tuun [Kristus] sayn xtim heere un raus khome.” (Yoohan 5:28, 29) Yawool, al tii woo in te kreeper am xloofe sin khene uf keruuft wëre fer in een Paratiis uf te eyert leepe.
Te profeet Isaiias hot een xeen pilt iwer tëm ufxtaye kemoolt: “Tayn toote tuun leepe kriin, sayn khërper tuun noch mool ufxtaye. Tii woo in te eyert xloofe tuun uf wachte un mit frayt xraaye; wayl tayn tau is een tau woo xaynt, un ti eyert pringt tsurik fer noch mool uf te welt khome tii woo xon fer een lang tsayt toot sin.” (Isaiias 26:19, tëm noo te The New English Bible iwersetsung)
Treest tich tas net? Ti toote sin in te sicherste situatsyoon woos kept, soo wii een nëneche is in sayn muter layp kexitst! Yaa, tii woo in te kreeper am ruue sin, sin in te unëntlich erinerung fon te Ale Mechtiche Kot kexitst! (Lukas 20:37, 38) Un klaych, wëre se tsurik tsum leepe keprung un wilkhom in een frooes welt sin, soo wii een nëneche is hërtslich wilkhom fon sayn liiplich familye. Tan, soo kaar foer tëm toot, fine mer noch hofnung.
Was khan ti hofnung fer tich mache?
Phaul lërnt uns fiil iwer te weyert fon te hofnung. Eyer hot tëne pexraypt wii een wichtich teel fon tëm kaystlich ayse wëst — te ayse khap. (1te Thesalooniker 5:8) Was wolt eyer saan? In te piiplixe tsayte, eene soltaat woo tsum kriich keengt, hot een ayse khap penutst — eftas, uf een filts orer leter khap. Weeche te ayse khap, ti meyerste xlaae aan sayn khop teete ap ritxe, xtats tëm um pringe. Was is te phunkt? Soo wii een ayse khap xitst yemant sayn khop, ti hofnung xitst yemant sayn ferxtant, sayn ketanke. Wëns tuu een fest hofnung host, woo mit Kot sayn tsiile xtimt, ti pang un ti unhoflichkheet kriin net tayn friit xtele wëns tuu kefoere mit machst. Weer fon uns praucht net soo een sort ayse khap hon?
Phaul hot een aner interesant ferklaychung penutst fer ti hofnung woo mit Kot sayn wile xtimt, pexraype. Tee hot kexrip: “Tiise sicher un fest hofnung woo mer hon, is wii een anker fer unser seel.” (Hepreeyer 6:19) Phaul hot mee wii een xif unerkang iwerkeleept. Tan, eyer wust wii wichtich een anker waar. Wën een weter xtorm tëne ketrof hot, hon ti xifs mëner ti anker ins meer kexmis. Wën ti anker sich fest aans meer pootem hale teet, teet tas xif een xans hon fon tëm weter xtorm mit sicherheet iwerleepe. Wën net, khent tas xif tsum lant kexupt wëre un witich ti xteen khome.
In te selwich aat, wën Kot sayn ferxpreche sin een “sicher un fest” hofnung fer uns, tiise hofnung khan uns helfe torich ti unruychkheete fon tiise xtormixe tsayte keen. Yeehoowa ferxprecht tas, klaych, ti mënxheet tuut net mee layte weeche ti kriiche, ti kriminaliteet, ti traurichkheet, orer te toot. (Kuk te khaste aan te sayt 10.) Fest aan tiise hofnung krayfe khan uns helfe wayt wech fon kefeerliche situatsyoone plaype. Tii muut uns aach uf fer tëm noo Kot sayn kesetse leepe, xtats noo kepe fer te konfus un imoraalix kayst woo in tiise welt hayt xikt.
Tiise hofnung woo Yeehoowa kept, tiint aach fer tich. Tee wil hon tas tuu leepst soo wii eyer am aanfang kepleent hot. Tëm sayn wunx is tas “ale sorte layt keret kepe”. Wii? Eyerst, mus yeete eene “een kenau khëntnis fon te woerheet kriin”. (1te Timoteus 2:4) Ti etitoore fon tiise piichelche muute tich uf ti khëntnis iwer ti woerheet fon Kot sayn Wort in nëme — es khan tich leepe kepe! Torich tiise khëntnis, Kot tuut tich een hofnung kepe woo fiil peser is wii kwalkee hofnung woo tiise welt tich aan piite khan.
Mit tiise hofnung, prauchst tuu nii mools rechne tas es khee ausweech kept. Kot khan tich ti neetich kraft kepe fer yeete tsiil woo mit tëm sayn wile xtimt trefe. (2te Korinter 4:7; Filiper 4:13) Prauchst tuu net soo een sort hofnung hon? Sicher, kël? Un wëns tuu tii xon am suuche pist, kep net uf! Ti hofnung is ticht. Tuu khanst tëne fine.
[Khast in te sayt]
Uersache fer hofnung hon
Tiise piiplixe woerheete khene tich helfe tayn hofnung ferxtërke:
▪ Kot ferxprecht een frooe tsukhunft.
Kot sayn Wort saat tas ti eyert een Paratiis wërt. Uf tëne, tuut een froo un eenich mënxlich familye woone. (Psalm 37:11, 29; Isaiias 25:8; Apokalipsis 21:3, 4)
▪ Kot khan net liie.
Tee hast yeete sort lii. Yeehoowa is kans haylich un phuer; tes weeche, liie is tëm unmeechlich. (Xpriiche 6:16-19; Isaiias 6:2, 3; Titus 1:2; Hepreeyer 6:18)
▪ Kot sayn macht hot khee krënse.
Ploos Yeehoowa is te Ale Mechtiche. Niks im Uniwërsum khan tëm um hale sayn ferxpreche erfiile. (Eeksotus 15:11; Isaiias 40:25, 26)
▪ Kot wil hon tas tuu fer imer leepst.
(Yoohan 3:16; 1te Timoteus 2:3, 4)
▪ Kot hoft imer tas pestes fon uns.
Eyer ëntxlist sich traan hale, net aan unser feeler, awer aan unser kuute kwaliteete un aanxtrengung. (Psalm 103:12-14; 130:3; Hepreeyer 6:10) Eyer hoft tas mer tas richtiches mache tuun, un eyer wërt froo wën mer es mache. (Xpriiche 27:11)
▪ Kot ferxprecht tich helfe ti tsiile woo mit tëm sayn wile xtime trefe.
Sayn tiiner prauche nii mools tenke tas es khee ausweech kept. Fer uns helfe, Kot tuut sayn hayliche kayst — ti mechtichste kraft woos kept — uns raychlich xenke. (Filiper 4:13)
▪ Uf Kot hofe is nii mools umsonst.
Tee tuut uns nii net im xtich lose — meyer khene wërklich uf tëm traue. (Psalm 25:3)
[Khast in te sayt]
Soo wii een ayse khap xitst te khop, ti hofnung xitst tas ferxtant
[Khast in te sayt]
Soo wii een anker, een hofnung mit een woere funtament khan uns fest hale
[Credit Line]
Courtesy René Seindal/Su concessione del Museo
Archeologico Regionale A. Salinas di Palermo