Ferxtërk tayn wunx fer noo lose se rauche

“Een xtarke wunx hon fer noo lose tsu rauche is te haupste phunkt fer tëne woo tas hin kriin.” — “Stop Smoking Now!” (“Los noo tsu rauche yets!”)

IN KHORTSE wërter, wëns tuu wilst noo lose tsu rauche must tuu weenst een xtarke wunx hon. Wii khanst tuu tee ferxtërke? Fer aan fange, kuk wii tayn leepe peser wërt oone tsika.

Tuu xpaartst kelt. In etliche lënter, een phëkche tsikere yeete taach rauche khan tausente tolare ufs yoer khoste. “Ich hat khee aat wii fiil kelt ich aus kepe teet mit tsikere.” — Gyanu, Nepaal.

Tuu wërst mee frayt im leepe xpiire. “Mayn leepe hat wërklich aan kefang wii ich noo kelos hon tsu rauche, un tas wërt yeetes mool peser”, saat Regina, fon Siit Afrika. Wën een mënx noo lost tsu rauche tan xpiirt tee peser te kexmak un aach te keroch, tan hot tee mee lust un siit peser aus.

Tayn kesuntheet khan sich ferpesere. “Noo lose tsu rauche pringt kroose un xnële nutse fer ti kesuntheet fon mëner un fraae fon ale eltere.” — Tsentrum fer ti krankheete kontroliire un ferhinere, fon FXA

Tayn sicherheet ferkreest sich. “Ich hon noo kelos tsu rauche wayl ich wolt net tas ti tsikere aan mich xike solte. Ich wolt hër sin fon mayne aychne khërper.” — Henning, Tanimark.

Tayn familye un fraaynte wëre nutse kriin. “Rauche . . . macht xaate fer ti kesuntheet fon te mënxe woo um tich rom sin. Unersuuchunge tsayche tas yeetes yoer tausente mënxe woo net rauche awer sin pay tëne woo rauche xtërpe fon lunge kreps un krankheete fom hërts.” — Amerikanix asosiatsyoon fon kreps.

Tuu wërst tayn Kriatoer kefale. “Liipe layt . . . wole mer uns fon ale sorte trek fom flayx sauwer mache.” (2 Korinter 7:1) “Xtelt ayer khërper foer wii een lepeentich opfer, woo haylich is un woo Kot kefalt.” (Romaaner 12:1)

“Nochter wii ich ferxtan hon tas Kot net aan nëmt tinge woo unser khërper trekich mache, hon ich ëntxlist noo lose tsu rauche.” — Sylvia, Xpanya.

Awer ti meyerst tsayt ploos wunx hon is net kenuuch. Khan sin tas mer prayche hilef fon anere layt, wii unser familye un fraaynte. Was khene tii mache?