Suuch hilef

“Yemant khan laycht ap kewine tee woo aleen is; awer tswaay khene sich fest xtele foer tee woo keeche tëne khomt.” (Eklesyastes 4:12)

WËN anere uns mit helfe is es laychte een faynt phake — ekaal was orer weer tee is. Tan, wëns tuu wilst noo lose tsu rauche is es wichtich hilef ferlange fon tayn familye, fraaynte un anere woo tich wërklich xtitse wole un ketultich sin.

Xprecht mit layt woo noo kelos hon tsu rauche, tii khene im xtant tich helfe. “Ti hilef woo anere mich kep hon waar aarich wichtich fer mich”, saat Torben, een krist fon Tanimark. Abraham, woo in Intya woont, hot kexrip: “Ti woere liip fon mayn familye un mayn priiter in klaape hon mich keholef noo lose.” Awer, als mool, ti hilef woo ti familye un fraaynte kepe is net kenuuch.

“Ich hon fer 27 yoore keraucht”, saat eene man woo heest Bhagwandas, “awer wii ich kelërnt hon was ti Piipel saat iwich xlechte kewoonheete, hon ich ëntxlist noo lose tsu rauche. Ich hon fersuucht weenich rauche; hon mich nay fraayntxaft kesuucht; hon aach hilef fon toktere kesuucht. Niks hot keholef. Tan, eene oomt, hon ich hërtslich fer Yeehoowa kepeet un aan kehal tee solt mich helfe noo lose. Tan, hon ich tas ëntlich kephakt!”

Was aach wichtich is, is wise tas tas net laycht is. Tuu must tich foer perayte fer xwiirichkheete aus hale. Was fer sorte? Kuk te neekste artikel.

[Khaste]

SOLST TUU METIKAMËNTE IN NËME?

Metikamënte wii nikotiin plastere, woo helfe sole tii woo wole noo lose tsu rauche, is een kexeft fon pilyoone tolare. Awer eeps tuu aan fangst metikamënte penutse, unersuucht tiise frooche:

Fer was sin se kuut? Etliche saan tas ti tratamënte khene ferkreese ti xans fer noo lose tsu rauche, wayl se ti sintome laychte mache. Awer anere saan tas tas mit te lëngt net mee heleft.

Mache se xaate? Etliche metikamënte khene mache tas te mënx prëche mus, sich traurich xpiirt orer soo kaar tenkt aan sich um pringe. Erinert tich aach tas ti tratamënte woo mit nikotiin tsu tuun hon sin ploos een anert aat fer tiise troke penutse, un tuun foran xaate mache. Soo, in woerheet, hot te mënx net te kewoonheet im xtich kelos.

Was khan kemacht wëre? In een xtuutyum, 88% fon te mënxe woo kephakt hon noo lose tsu rauche, hon kesaat tas se noo kelos hon uf mool, oone metikamënte penutse.