Tuu kriist tas hin!

YETS is ti tsayt khom ‘fer koraajich sin un etwas mache.’ (1 Kroonike 28:10) Was khanst tuu noch mache fer noo lose tsu rauche?

Suuch een taach raus. Te Ministëryum fer Kesuntheet un Sotsyaale Sache fon Nort Amërika saat tas wëns tuu ëntxlist host noo lose tsu rauche, waart net mee wii tswaay woche fer tas mache, soo tuust tuu net ti lust ferliire. Xrayp ufm kalënter un lost tayn fraaynte tas wise. Tuut net ënere te taach wën aach etwas in tayn leepe sich ferënert.

Macht tich een “erinerunge khaart.” Xraypt tinge woo tich uf muute khene, soo wii:

●Warom wilst tuu noo lose tsu rauche.

●Ti telefoone fon te layt woos tuu mit fertseele khanst wën ti lust fer rauche khomt.

●Kuute ketanke — piiplixe tekste soo wii Kalater 5:22, 23 — woo tich helfe khene tayn opjetiiw erfiile.

Pahal te khaart imer mit tich un lees tee oft mools te taach. Wëns tuu xon noo kelos host tsu rauche kuk ti khaart als mool noo wën ti lust khomt fer wiiter rauche.

Ferënert tayn kewoonheete woo mit rauche tsu tuun hon. Eep te taach khomt woos tuu raus kesuucht host, fang aan net mee mache was tuu keweent waarst woo tich lust kept fer rauche. Tsum payxpiil, wëns tuu rauchst moynts klaych wëns tuu uf xtayst, macht tas een orer tswaay xtune xpeeter. Wëns tuu rauchst wëns tuu est orer klaych tëm noo, macht tas net mee. Kee net uf pletse hin woo ti layt rauche un wëns tuu aleen pist, iip tich in un saa in hat xtim: “Nee, tanke xeen. Ich hon noo kelos tsu rauche.” Tiise foerxlache wëre tich helfe perayte fer te taach woos tuu raus kesuucht host. Tas sin aach erinerunge tas tuu hatich pist eene woo net mee rauchst.

Mach ti letste foer peraytung. Soo wii te taach tichter khomt, khaaft kleenichkheete woos tuu khanst ins maul tuun, xtikche kelep riiwe, xiklëte, nis un soo foran. Eriner tayn fraaynte un familye te taach woos tuu raus kesuucht host fer noo lose tsu rauche un wii tii tich helfe khene. Phaar taache foer traan xaf wech tsikere tuuse, iskeer un ales was mit tsikere tsu tuun hot — tsikere woo in haus rom sin, im auto, in ti thax orer tat woos tuu xafst. Kans sicher, is es xweere tsika ferlange fer een fraaynt orer een phëkche tsika khaafe keen, wii een xup laat uf mache un een tsika too trin fine. Un noch, tuu foran peete tas Kot tich helfe sol, un mach tas noch mee wëns tuu noo kelos host tsu rauche. (Lukas 11:13)

Fiil layt hon kephakt am ën mache “mit te fraayntxaft” mit te falxe un xlechte fraaynt — tsika. Tuu khanst tas aach. Een kuut kesuntheet un xpiirung fon frayheet tuun uf tich waarte.

[Pilt]

Pahal te khaart imer mit tich un lees tee oft mools te taach