Fertseel etwas iwich tich.

Ich sin in 1979 kepoer, in Nort Amërika. Mayn eltere sin aus naner kang wii ich 3 yoer alt waar. Mayn mama hot mich ketsoo im yuutaismus un mich in een ieshivas — een yiitix xuul — kexikt. Wii ich 7 yoer waar, hon mer fer een yoer in Israël kewoont in een kemaynt, woo se al mit samer xafe, kenënt kibutz. Tan, sin ich un mayn mama in Mëksiko kewanert.

Too waar khee sinakooke ticht woo mer kewoont hon, awer ich hon wayter ti yiitixe tratitsyoone in kehalt: am yiitixe samstaach hon ich khërtse aan kextoch, hon unser hayliche xrifte keleest un kepeet mit te hilef fon unser kepeets puuch, te sidur. In ti xuul, hon ich fer mayn koleke kesaat tas mayn relichyoon waar ti eyerst woos kep hot. Ich hat noch nii keleest te Naye Testament, woo haupstseechlich xprecht iwich Yeesus sayn tiinst un inlërnunge. Mayn mama hat mich foer raus kesaat ich solt tas net mache, tas khent tswayfele in mayn ketanke pringe.

Warom host tuu tan toch te Naye Testament keleest?

Wii ich 17 yoer alt waar, sin ich tsurik noo Nort Amërika kang fer mayn xuul fërtich mache. Tat, hot eene pekhante mich kesaat tas eyer een krist weyer un tas oone Yeesus teet etwas in mayn leepe feele.

“Ti layt woo aan Yeesus klaape sin ferloer”, hon ich keantwort.

“Host tuu xon mool te Naye Testament keleest?” hot tee kefroot.

“Nee”, saat ich.

Tee saat: “Tan, khan sin tas tuu xprechst iwich etwas woos tuu khee aanung host.”

Tas hot mich aan kekrif, wayl ich imer tacht tas es tumheet weyer xpreche iwich etwas woo mer khee khëntnis triwer hon. Tan, hon ich sayn Piipel kenom, sin hëm kang un aan kefang te Naye Testament leese.

Was host tuu kemënt iwich was tuu keleest host?

Tas hot mich kewunert raus kriin tas ti xraypere al yuute waare. Un soo fiil mee wii ich keleest hon, mee hon ich kemërkt tas Yeesus een liipe un teemuutiche yuute waar, woo ti layt helfe wolt un net aus nutse. Ich sin soo kaar in een piplyoteek kang fer piicher hoole iwich iim. Awer khee eens hot mich ti sicherheet kep tas tee te Mesias waar. Etliche hon soo kaar kesaat tas tee Kot weyer — tas hat khee tswek fer mich. Tsu wëm hot Yeesus tan kepeet? Tsu sich selepst? Un noch, Yeesus is kextorep. Awer ti Piipel saat iwich Kot: “Tuu xtërepst net.” *

Host tuu antworte kefun fer tayn tswayfele?

Ti woerheet khan net keeche sich selepst keen, un ich hat ëntxlist ti woerheet raus kriin. Tan, mit treene in ti aue, hon ich hërtslich tsu Kot kepeet — tas eyerste mool oone mayne sidur. Ich waar kraat fërtich mit mayn kepeet, hot yemant aan mayn tiir keklopt. Waare tswaay fon Yeehoowa sayn Tsayer. Tii hon mich een piichelche kep fer ti Piipel ferxteen. Tas piichelche un tas kexpreech mit tëne hon mich sicherheet kep tas tëne sayne klaape sich aan ti Piipel halt. Tsum payxpiil, tii klaape net tas Yeesus teel fon ti Triniteet is, awer tas tee “Kot sayn Soon”  * is un “te aanfang fon Kot sayn kriatsyoon”. *

Khorts tsayt tëm noo, sin ich tsurik noo Mëksiko kang, un hon foran piiplixe profetsiie iwich te Mesias xtutiirt mit Yeehoowa sayn Tsayer. Ich hat nii ketacht tas es soo fiil profetsiie kepe teet! Awer ich hat imer noch tswayfele. Ich hon mich kefroot: ‘Meecht Yeesus te eensiche sin woo sich xteet mit te profetsiie?’ un ‘Meecht Yeesus net ploos een kuute artist keweest sin woo sich aan kextelt hot soo wii wën tee te Mesias weyer?’

Was waar wichtich fer tich sicherheet kepe?

Yeehoowa sayn Tsayer hon mich profetsiie ketsaycht woo een falxe Mesias khent net erfiile. Tsum payxpiil, mee wii 700 yoore foer traan, hot te profeet Mikeyas kesaat tas te Mesias in Petleheem fon Yutaa uf ti welt khome teet. * Wii khent yemant raus suuche woo tee uf ti welt khome teet? Isaiias hot kexrip tas te Mesias teet toot kemacht wëre wii een pantit, awer pekraapt mit te rayche. * Tiise profetsiie hon aan Yeesus sich erfiilt.

Awer fer mich te haupste phunkt waar Yeesus sayn apxtamung. Ti Piipel saat tas te Mesias teet fom Kheenich Tawi ap xtame.  * Ti friirixe yuute hon ti apxtamunge rexistre uf kehoop, wën Yeesus net Tawi sayn nookhomer weyer, hëte tëm sayn faynte tas sicher pekhant kemacht. Awer tii hon niks kesaat wayl nimant khont tas ap xtrayte tas tee fon Tawi sayn familye weyer. Tas folek hot tee soo kaar keruuf “Tawi sayn Soon”. *

In 70 N.K. — 37 yoore noo Yeesus sayne toot — hon ti romaaner Yeruusalem fernicht, un ti rexistre sin ferloer kang orer fernicht. Soo, fer te apxtamung fom Mesias pewayse, must tee foer tas yoer 70 N.K. tsum foer xayn khom sin.

Was petayt tas fer tich?

In Teuteronoomyum 18:18, 19, hot Kot kesaat tas eyer teet xike in Israël een profeet wii Mooses. “Weer net mayn wërter heert woo tee in mayne naame xprecht, tee mus ap rechnung mache mit mich”, saat Kot. Mayne tiife xtuutyum in ti kans Piipel hot mich ti sicherheet kep tas Yeesus fon Nasarë tiise profeet waar.