Wii is tas meechlich tas een pheyerche woo ferxproch hot sich liipe, torich xtune orer soo kaar torich taache, oone se xpreche playpt? Fiilaycht tuun se tenke: ‘Am weenichts tuun mer net xtrayte.’ Awer tas tuut ti propleem net resolwiire, un ti pheyerche tuut sich xlecht temit fine.

Winkans. Fer etliche pheyerche ruych plaype is een sort winkans. Tsum payxpiil, tenk tas een man plaan fer te ën fon te woch macht oone mit sayn fraa se xpreche. Wii tii tas kewis kriit tuut se wuutich kepe un saat tas tee aan tii net ketenkt hot. Tan tuut te man saan tas ti fraa aarich phimsich is. Ti fraa tuut sich ayre un motsich kepe. Un tan, wën tii ruych playpt is wii wën se saan teet: “Tuu host mich pelayticht tes weeche tuun ich tich aach pelaytiche.”

Ti aner tswinge fer unser wile mache. Etliche tuun ruych plaype fer se kriin was se wole. Tsum payxpiil, tenk tas een pheyerche plaan macht fer se reese, un ti fraa wolt sayn eltere mit neme. Te man tuut tas net kërn hon un saat: “Tuu host mit meer ferhayrat un net mit tayn eltere”. Tan, tuut eyer noo lose mit sayn fraa se xpreche un waart tas tii sayn wile mache tuut.

Awer, es is sicher tas een pheyerche khan een pisye xtiil hale wën een kexproch een xtrayt kep. Tas tuut tëne helfe sich peruyche eep tas tings xlechte kepe. Ti Piipel saat tas ‘es kept een tsayt fer ruych plaype’. (Eklesyastes 3:7) Awer wën mer ruych plaype wii een aat fer winkans mache orer fer ti aner tswinge unser wile mache, tas tuut te respekt tswixich te pheyerche petrefe. Un noch, tas tuut te propleem net resolwiire. Was khanst tuu mache tas soo was net in tayn hayrat pasiire tuut?

Tas eyerstens woos tuu mache khanst is erkhëne tas ruych plaype tuut net lang funtsyoniire. Es is woer tas ruych plaype khan unser wunx fon winkans pefriitiche orer ti aner tswinge fer unsere wile mache. Awer wilst tuu wërklich soo mit tayn keliipte fraa orer man um keen? Es kept pesere ausweeche!

Say ferxtëntich. Ti Piipel saat tas ti liip “kept net klaych wuutich”. (1te Korinter 13:4, 5) Soo, wën in een situatsyoon tayn man orer tayn fraa keayert is un fangt aan se saan: “Tuu tuust mich nii heere” orer “Tuu tuust tich imer ferxpeete”, tenk net tas es is kraat tas was eyer saan wolt. Fersuuch se mërke was eyer wërklich saan wil. Tsum payxpiil, “Tuu tuust mich nii heere” khan petayte “Ich tenke tas tuu mayn mënung net aan nëmst”. (Piiplixe printsipye: Xpriiche 14:29)

Tuu tsaam xpreche. Wën een pheyerche net noo lost se tsënke, ti tsënkeray khan noch xlechte kepe. Awer tuu khanst etwas mache. Wii soo? Tas puuch Fighting for Your Marriage (Khëmpf tas tayn hayrat kuut keet) saat: “Tsaam xpreche un ferxteen was tayn man orer fraa mëne tuut, sin mechtiche feramente woos tuu penutse khanst fer een xtrayt peruyche un in friit plaype. Tas tuut oft mools funtsyoniire.” (Piiplixe printsipye: Xpriiche 26:20)

Tenk aan aych tswaay un net ploos aan tich selepst. Ti Piipel saat: “Yeete eene net ploos aan sayn aychne nuts tenkt, awer aan te nuts fon te aner.” (1^te Korinter 10:24) Wëns tuu tayn fraa orer tayn man wii een mithelfer un net wii een faynt siist, tas macht tas teyer weenich tsënke tuun, weenich pelaytiche kepe un tas teyer aach net noo lose eene mim anere se xpreche. (Piiplixe printsipye: Eklesyastes 7:9)

Noo lose eene mim anere se xpreche is kans tekeeche mit was ti Piipel uns aan reet. Ti Piipel saat: “Tes weeche, yeete eene fon aych, sol sayn fraa liipe soo wii sich selepst, un ti fraa sol tiife respëkt fer sayne man tsayche.” (Ëfeser 5:33) Etliche pheyerche tuun ap mache nii noo lose se xpreche. Was mënst tuu tas in tayn hayrat aach mache?