Tayn fraa saat: “Tuu horichst net wën ich was saan!” Tuu tenkst: ‘Awer ich hon keheert!’ Tas siit aus tas was tuu keheert host is anerste wii tas woo tayn fraa kesaat hot. Tan, fangt eene naye xtrayt aan.

Awer tas prauch net soo sin. Eyerst, must tuu ferxteen warom tas tuu net imer ales heerst was tayn fraa saat — ale tëm tuu tenkst tuu hëst keheert. a

Tuu pist achtlos, miit orer ti tswaay. Ti khiner xraaye, ti TV xteet hart un tuu machst tich ketanke iwich een propleem woo in te aarwayt pasiirt is. Tan fangt tayn fraa aan se xpreche mit tich — etwas iwich yemant aych oomts pesuuche khome. Tuu nikst mim khop, awer host tuu wërklich keheert was tii kesaat hot? Tsiimlich sicher net.

Tuu mënst tas tuu es xon ferxtan host. Tuu tenkst klaych etwas xlechtes iwich was tayn fraa am saan is, wayls tuu net richtich ferxtan host was tii saan wolt. Tsum payxpiil, xtel tich foer tas tayn fraa saat: “Tuu host fiile ekstra xtune ti woch kexaft.” Tuu mënst tas tii am reklamiire is un saast: “Tas is net mayn xult! Ich mus ekstra xtune xafe wayls tuu tsu fiil aus kepst.” “Wii soo mënst tuu tas ich am reklamiire sin?”, saat se krop tsurik. Was tii wërklich wolt saan waar tas iir solt samstaach un suntaach iwer penutse fer mitsamer ruue.

Tuu pringst klaych een ausweech foer. Márcia b saat: “Als mool ales was ich wil is fertseele iwich was ich xpiire, awer te Leo wil klaych een ausweech kepe. Awer in tiise momënt wil ich khee ausweech. Ich wil mich ploos aus lose.” Warom pasiirt tas? Leo macht sich soo fiil ketanke fer een ausweech fine tas eyer weenich acht kept tsu was Márcia am saan is.

Ekaal was te propleem is, wii khanst tuu een kuute heerer sin?

Kep acht. Tayn fraa hot etwas wichtiches fer saan, awer pist tuu fërtich fer se horiche? Im xtant net. Tuu khanst kraat aan was aneres tenke. Wëns soo is, ferxtel tich net wii wëns tuu horiche teest. Los noo was tuu am mache pist un kep acht tsu tayn fraa; wën tas net meechlich is in tiise momënt, ferlang tas se sol een pisye waarte. (Piiplix oryentiirung: Tyako 1:19)

Waart tayn mool fer se xpreche. Wëns tayn mool is fer horiche, tuu net klaych rin orer keeche xpreche. Tuu wërst aan ti ray khome fer se xpreche. Foerlaywich, tuu noore horiche. (Piiplix oryentiirung: Xpriiche 18:13)

Mach frooche: Tas wërt tich helfe peser ferxteen was tayn fraa am fertseele is. Márcia, woo xon kenënt is woer, saat: “Ich hon kërn wën te Leo mich frooche macht. Tas tsaycht mich tas tee weyert kept tsu was ich saan.”

Ferxtee net ploos ti wërter awer was too hiner is. Peopach wii te persoon sich aan xtelt, sayn kesicht un sayn xtim. “Is ales kuut” khan wërklich petayte “Tas is net ales kuut” — tëm noo wiis kesaat wërt. “Tuu helefst mich nii” khan petayte “Siit aus tas tuu tich net khimerst mit mich”. Xtreng tich aan fer ferxteen net ploos was tii saat awer was se wil saan. Wën net, khent teyer tiskutiire iwich wërter xtats sich hale aan was too hiner is.

“Xlis tich” net ap fom kexpreech. Wën tas woo kesaat wërt tich net kefalt, kee net wech un kep foran acht. Tsum payxpiil, was mache wën tayn fraa tich kritikiirt? Jorge, woo mee wii 60 yoore ferhayrat is, tuut aan reete: “Tuu wayter horiche. Kep weyert tsu was tayn fraa saat. Ma mus rayf sin fer tas hin kriin, awer tas is am weyert.” (Piiplix oryentiirung: Xpriiche 18:15)

Interesiirt tich wërklich um te anere. Een kuute heerer sin is net ploos respekt tsayche, awer is een pewaysung fon liip. Wëns tuu tich wërklich khimerst aan was tayn fraa saat, horiche wërt etwas natiirliches sin. Wëns tuu tas machst, tuust tuu aan wëne ti piiplix oryentiirung: “Suucht net ploos ayre aychne interese, awer aach ti interese fon te anere.” (Filiper 2:4)