Tuu un tayn man orer fraa tuun unerxiitliche itee hon iwer een selwich sache. In tiise situatsyoon, host tuu weenichts tray optsyoone:

1. Noo un noo ferlange pis tuu kriist was tuu wolst.

2. Mache was tayn man orer fraa wil oone se tenke.

3. Mitsamer een ëntxlus mache.

Fiilaycht tenkst tuu: “Een ëntxlus mitsamer mache? Tas pariirt net! Wayl soo khee eene fon te tswaay kriit was tee wolt.”

Een ëntxlus mitsamer mache petayt net tas ti tswaay net kewine tuun, wëns tuu in een richtich aat um keest. Awer, eep meyer siin wii mer tas mache khene, wole mer iwer etliche phunkte xpreche woos tuu iwer tiise wichtich apiliteet wise must.

Fer een ëntxlus mitsamer mache, is es neetich tayn fraa orer man wii een mithelfer siin. Wiis tuu letich waarst, fiilaycht hast tuu ti kewoonheet fer ëntxluse aleen mache. Awer yets, tas tings sin kans anerste, un ayre hayrat mus eyerst khome wii ayre perseenliche itee. Tuu tas wii etwas kuutes siin, un net wii een propleem. Een fraa, woo Alexandra heest, saat: “Tswaay persoone mitsamer khene peser een solutsyoon fine, wii wën se aleen wëre.”

Fer een ëntxlus mitsamer mache, is es neetich tas tuu wilich pist fer anere itee heere. Een psikoloxii xrayper, woo John M. Gottman heest, saat: ‘Tuu prauchst net mit ales xtime woo tee orer tii saat, awer tuu must wilich sin fer tëm sayn mënung heere’. Tee saat aach tas wëns tuu net heerst ‘wën tayn man orer fraa fersuucht mit teer iwer een propleem se xpreche, ti xtrayt tuut net te propleem resolwiire. a

Fer een ëntxlus mitsamer mache, is es neetich aanxtrengunge mache. Nimant tuut kërn mit yemant leepe woo tenkt tas tee orer tii imer richtich is. Es is fiil peser wën ti tswaay wilich sin fer aanxtrengunge eene fer te anere mache. “Als mool tuun ich noo kepe fer mayn man froo lose, un tee macht tas aach”, saat June. “Es is tas woo sol in een hayrat pasiire, ti tswaay mise kepe un net ploos kriin.”

Tuu ti kexpreech in te richtich aat aan fange. Te thoon woo penutst wërt fer een kexpreech aan fange is neekst imer te selwich woo pis am ën fon tiise kexpreech playpt. Wëns tuu aan fangst mit krope wërter, tsiimlich sicher tuust tuu net een friitlich ëntxlus mim anere persoon mache. Tes weeche, tuu tiise piiplixe aanreet noo keen: “Tsiit aych aan mit liiplich mitlayt, fraayntlichkheet, teemuut, tsaamheet un ketult.” (Koloser 3:12) Tiise kwaliteete tuun tich un tayn man orer fraa helfe net xtrayte un te propleem resolwiire. (Piiplixe printsipye: Koloser 4:6)

Tuu eenliche phunkte suuche. Wën teyer fersuucht een ëntxlus mitsamer mache awer tuut imer nerwees kepe, khan sin tas teyer tsu fiil konsentriirt sayt in was teyer tswaay net xtime tuut. Xtats tas, fersuucht etliche phunkte suuche woo ti tswaay xtime tuun. Fer aych helfe tas mache, yeete eene khan tiise aanung noo mache:

Tuu een list mit tswaay sayt mache. In te eyerst, xrayp ti phunkte hin woo aarich wichtich fer tich sin. In te tsweete, xrayp ti phunkte woo net soo wichtich fer tich sin un woos tuu neewer lose khanst. Tan, tuu mit tayn man orer fraa iwer ayre list xpreche. Es khan sin tas teyer tswaay mit mee tings pextime woo teyer tenke tuut. Wën es soo is, es wërt laychter mitsamer in xtime. Opwool teyer net in ales xtime tuut, tiise phunkte in een papier uf xraype khene aych helfe tiise theema peser siin.

Tuu een solutsyoon mitsamer suuche. Es kept theema woo laychter sin fer resolwiire, awer anere, sin pisye mee xweyer. Wën man un fraa mitsamer een solutsyoon suuche tuun, woo se fiilaycht aleen net fine teete, ti eenichkheet tswixich tëne tuut xtark kepe. (Piiplixe printsipye: Eklesyastes 4:9)

Say wilich fer tayn mënung ënere. Ti Piipel saat: “Yeete eene fon aych, sol sayn fraa liipe soo wii sich selepst, un ti fraa sol tiife respëkt fer sayne man tsayche.” (Ëfeser 5:33) Wën man un fraa xpiire tas se keliipt un respektiirt sin, ti tswaay wëre wilich fer ti mënung eene fon te anere heere. Tan, khene se soo kaar sayn mënung ënere. Een ferhayrat man woo Cameron heest, hot kesaat: “Es kept tings woos tuu net mache teest, awer, weeche ti influens fon tayn fraa, tuust tuu soo kaar aan fange tiise tings aarich kërn hon.” (Piiplixe printsipye: Xeenesis 2:18)