Fertseel uns iwich tayn khintheet.

Ich sin kepoer in Itaalya, in 1943. Ich, mayn priiter un xwestere sin kroos kewakst in een kleen wile. Mayne fater waar pauer un xtelmayster. Unser eltere hon uns ketsoo fer kuute katoolixe sin.

Warom wolst tuu phaater sin?

Wii ich khint waar, hat ich kërn ti phaatere keheert in te khërich. Ich hon soo kërn iire xtime keheert un mich ferwunert mit te rituaale. Tes weeche, hat ich soo een kroos lust fer phaater wëre. Wii ich 13 yoer alt waar, hot mayn mama mich in kexrip in een internat woo puupe perayt hot fer xpeeter hin xtutiire fer phaater wëre.

Hot iir ti Piipel xtutiirt in tiise foerperaytung?

Tas waar net kraat soo. Wii ich 15 yoer alt waar, hot eene fon mayn leerer mich een puuch kep, ti Ewankeelye — kexichte iwich Yeesus sayn leepe un tiinst. Ich hon tas puuch oft mools keleest. Wii ich 18 yoer waar, sin ich xtutiire kang in een uniwersiteet in Roma, woo unich ti autoriteet fom papst sin. Ich hon latin, kreekix, filosofii, kexicht, psikoloxii un theoloxii xtutiirt. Ale tëm woo mer etliche piiplixe wërse aus weenich kesaat hon, un suntaachs in te reet Piipel tekste keheert, hon mer net wërklich ti Piipel xtutiirt.

Wiis tuu xëf waarst, host tuu aach xuul kehal?

Mayn aarwayt waar haupstseechlich atministratiiw. Awer ich hon xuul kehal, iwer ti funtamente fom Tsweete Konsilyum fon Watikan.

Warom host tuu aan kefang tsu tswayfele iwich ti Khërich?

Tray tinge hon mich keayert. Ti khërich hot sich in politik kemixt. Tii hon aan kenom ti priister un mitkliiter woo sich xlecht aan kextelt hon. Un etliche katoolixe inlërnunge hon net richtich aus kesiin. Tsum payxpiil, warom teet te Kot fon liip layt woo xon kextorep sin kweele fer imer? Un noch, meecht Kot wërklich wole tas mer hunert mool ti selwiche kepeete mache mit te rosekrans in te hant? *

Was host tuu kemacht?

Ich hon keprilt un kepeet fer Kot mich oryentiire. Ich hon aach een katoolix Piipel kekhaaft woo kraat in italiaanix iwersetst kewoer waar, ti Bíblia de Jerusalém, un hon aan kefang se leese. Tan, een suntaach moynt, klaych wii ich mayn priister tsaych aus ketsoo hat, sin tswaay mëner aan unser xuul hin khom. Tii waare Yeehoowa sayn Tsayer. Meyer hon mee wii een xtun fertseelt iwich ti Piipel un was se saat iwich wii raus kriin ti woere relichyoon.

Was host tuu ketacht iwich tëne?

Ich hon mich kewunert iwich iire sicherheet un wii laycht tas waar fer tëne ti etitsyoon fon te katoolix Piipel penutse. Nochter is een aner Yeehoowa sayn Tsayer foran khom, te hot Mario keheest. Tee waar ketultich un phinklich — yeete samstaach moynt, um noyn uer, mit reen orer sunerxayn, waar Mario aan ti tiir.

Was hon ti anere phaatere too triwer ketacht?

Ich hon se in kelaat fer unser kexpreech mit mache, awer tii hon net ërnst te Piipel xtuutyum aan kesiin. Awer ich hat tas aarich kërn kehat, wayl ich wunerliche tinge kelërnt hon. Tsum payxpiil, ich hon kelërnt warom Kot lost ti eelent un xlechtichkheet pasiire — tas waar etwas woo ich imer wise wolt.

Hon tayn relichyeese xëfe fersuuch tayn mënung ënere?

In 1975, waar ich oft mools in Roma fer mayn mënung aus leyer. Mayn xëfe hon oft fersuucht ferënere mayn ketanke, awer tii hon nii ti Piipel penutst. Ëntlich, am 9^te Yanuer 1976, hon ich een priif tsu Roma kexrip fer pekhant mache tas ich wolt khee katoolixe mee sin. Tswaay taache tëm noo, sin ich aus ti phaater xuul kang un in een aysepaan kextii fer tas eyerst mool uf een fersamlung fon Yeehoowa sayn Tsayer keen. Tas waar een konkrës, woo fiil kemaynte samer khome. Tas waar ales soo anerste wii ich keweent waar! Yeete eene hat een Piipel un hot se penutst fer ti reete iwich unerxiitliche sache mit hale.

Was hot tayn familye iwich tas ales ketacht?

Ti meyerste waare aarich too keeche. Awer ich hon tsu wise kriit tas een fon mayn priiter teet ti Piipel xtutiire mit Yeehoowa sayn Tsayer in Lombardia, im nort fon Itaalya. Ich sin tee pesuuche kang, un Yeehoowa sayn Tsayer fon tat hon mich keholef aarwayt un een plats fer woone fine. Xpeet in tiise yoer, sin ich ketaaft woer wii Yeehoowa sayn Tsayer.

Peroyst tuu tich fon tayn ëntxlus?

Kans sicher net! Yets xpiire ich mich wërklich ticht pay Kot, wayl was ich yets wees iwich tëm halt sich aan ti Piipel, net aan filosofii orer relichyeese tratitsyoone. Un ich khan anere in lërne mit sicherheet un eerlichkheet.