WAS ETLICHE SAAN

Fiil tenke tas klik xpiil is een ferkniichung woo khee xaate macht wën tas kesets fom lant tas erlaupt. Ti xpiile woo fon te rechiirente aus khome penutse soo kaar een teel fom kelt fer sotsyaale prokrame hale.

WAS TI PIIPEL SAAT

Ti Piipel xprecht net klaar iwich klik xpiil, awer ti pringt oryentiirunge woo tsayche was Kot too triwer tenkt.

Te opjetiiw fom klik xpiil is kewine was ti anere ferliire, un tas is keeche was ti Piipel saat ‘halt aych wech fon ale sort pekiirichkheet.’ (Lukas 12:15) In woerheet, ti mënxe xpiile wayl se pekiirich sin. Ale tëm, ti xans fer kewine kleen is, tii woo ti xpiile in richte mache pekhant tas es fiil kelt kept. Te wunx fer raych wëre macht tas ti mënxe fiil kelt wete in cassinos. Xtats ti layt helfe ti pekiirichkheet tsurik lose, tas klik xpiil macht tas se imer mee wunx hon fer laycht kelt kriin.

Tas klik xpiil is ekoiistix: kelt kriin woo ti anere ferliire. Awer ti Piipel muut uns uf “tas yeete eene net ploos aan sayn aychne nuts tenkt, awer aan te nuts fon te aner”. (1 Korinter 10:24) Een fon te tseen kepoote saat: “Tuu solst net winxe . . . tings woo tsu tayn neekste keheere.” (Eeksotus 20:17) Ti hofnung woo te xpiiler hot, in woerheet, is waarte tas ti anere sole ferliire tas eyer tas kelt kriin khan.

Ti Piipel saat mer sole tas klik net aan siin wii een maxii kraft woo uns helfe khan in etliche momënte. Im friirix Israël, hon etliche woo net aan Kot keklaap hon ‘te tix in kericht fer te kot fom klik’. Meecht Kot tiise aanpeetung aan kenom hon? Nee. Kot hot tsu tëne kesaat: “Teyer hot foran kemacht was foer mayn aue xlecht is, un hot raus kesuucht tas tings woo mich net kefal hot”. (Isayas 65:11, 12)

Is woer tas in etliche lënter penuts te rechiirung tas kelt fon te xpiile fer sotsyaale prokrame hale wii xuule un anere aktiwiteete fer ti ekonomii ferxtërke. Awer tas kelt penutse in tiise aat ferënert net ti aat wii tas in khom is — torich aktiwiteete woo uf richtich uf muute pekiirichkheet, ekoiismus un aach ti itee tas mer khan kelt kriin oone kraft mache.

“Tuu solst net winxe . . . tings woo tsu tayn neekste keheere.” (Eeksotus 20:17)

WAS TI PIIPEL SAAT

Ti Piipel saat tas “ti woo raych wëre wole, fale in fersuuchung, in lase un in fiil unferninftiche winxe woo xaate tuun, woo mache tas ti mënxe in fernichtung un ruiine fale”. (1 Timoteus 6:9) Ti wortsel fom klik xpiil is ti pekiirichkheet, wayl ti pekiirichkheet soo was xlechtes is, is es een fon te tinge woo ti Piipel saat woo mer sole uns kans wech hale. (Ëfeser 5:3)

Te opjetiiw is laycht kelt kriin, un tas macht tas te xpiiler aan fangt tas kelt liipe — etwas woo ti Piipel tsaycht wii “te wortsel fon ale sorte xlechte tinge”. Te wunx fer imer mee kelt hon khan mache tas te mënx ploos too traan tenkt un sich soo fiil ketanke macht tas sayn klaape aan Kot xwach wërt. Ti Piipel saat tas tii woo ti liip tsum kelt noo keen, khene ‘sich selepst fiil wee mache’. (1 Timoteus 6:10)

Ti pekiirichkheet macht tas te mënx khee frooheet hot un is nii tsu friite mit was tee hot. “Weer silwer liipt wërt nii fon silwer sat, un weer raychtum liipt, wërt nii tsufriite mit was in khomt. Un tas hot aach khee tswek”. (Eklesyastes 5:10)

Milyoone layt woo sich tas xpiile aan keweent hon, hon raus kriit tas es net laycht is tas im xtich lose. Tas is een propleem woo in ti kans welt pasiirt. Tsum payxpiil, ploos in Nort Amërika wërt kerechent tas es milyoone layt kept woo sich am klik xpiil traan keweent hon.

Een xpruch saat: “Een raychtum woo aan kefang wërt mit pekiirichkheet wërt tsum ën khee seechen sin.” (Xpriiche 20:21)Tii woo sich tas xpiile aan keweene khene fiil xulte mache un ales ferliire woo se hon. Fiil ferliire iire fraaynte, iire aarwayt un soo kaar iire familye. Awer ti piiplixe oryentiirunge aan wëne khan helfe te mënx sich wech hale fom xaate woo tas klik xpiil pringt.

“Wayl ti liip tsum këlt is te wortsel fon ale sorte xlechte tinge, un etliche, woo sich in tiise liip aan kextrengt hon, sin fom klaape ap kelënkt kep un hon sich selepst fiil wee kemacht.” (1 Timoteus 6:9)