“Wii mer torich een xweyer tsayte am mit mache waare, hot mayn fraa tas fer sayn eltere fertseelt. Tan, hot mayn xwiicher fater mich telefoniirt fer mich iwer ti situatsyoon aan reete. Ich hat tas net kërn kehat!”—James. a

“Mayn xwiicher muter waar keweent saan: ‘Ich hon fiil ferlange fon mayn yung!’ Tii xprecht imer iwer wii tii eenich waare, un tas macht mich xultich xpiire wayl ich mich mit tëm kehayrat hon un iir soo traurich kelos hon!”—Natasha.

Was khene mer mache tas een propleem mit ti xwiicher eltere khee propleem in ti hayrat wërt?

Ti hayrat macht een nay familye. Ti Piipel saat tas wën te man sich hayrat, ‘tuut te man sayn fater un muter lose un tuut sich fest tsu sayn fraa hale’. Tas selwiche kilt fer sayn fraa was mit sayn man se tuun hat. Wën een man un een fraa sich hayrate, ti Piipel saat tas tii wëre “een flaysh”. Tii wëre een nay familye.—Matheus 19:5.

Tayn man orer fraa mus foer tayn eltere khome. “Eene fon te haupste opjetiiwe fon te hayrat is ti ‘fraayntxaft’ tswixich te man un ti fraa ferxtërke”, hot John M. Gottman kexrip woo Ph.D. in psikoloxii hot. “Fer tas hin kriin orer noch mool ferxtërke, khan sin tas teyer mist aych een pisye fon ayre eltere aus naner mache.” b

Etliche eltere fine es xweyer sich traan keweene. Een yunge ferhayrate man saat: “Eep mer uns kehayrat hon, mayn fraa waar keweent fer in eyerste plats lose was sayn eltere wolte hon. Noo wii mer uns kehayrat hon, hot mayn xwiicher muter kemërekt tas yets een anere persoon iim eyerste plats khome teet, un es waar xweerlich fer tii tas aan neme.”

Etliche woo khërtslich kehayrat hon fine es aach xweyer sich traan keweene. “Xwiicher eltere hon is net soo wii fraaynte hon woos tuu aus kesuucht host”, saat James, woo foer heyer kexproch hot. “Im woerheet host tuu tswaay naye fraaynte, wëns tuu wilst orer net. Wën se tich aach ferikt lose, tii sin tayn familye!”

Wënst tuu aach net in etwas tsu xtimst mit tayn man orer fraa woo mit tayn xwiicher eltere se tuun hon, xprech mit tëm, un fersuucht tas mit tëm wii een ekip resolwiire. Kee ti Piipel aanreete noo fer ‘friit suuche un xtrengt tich too traan aan’.”— Psalm 34:14.

Fer tich helfe tas se mache, iwerlee tich tiise situatsyoone. Ti sin foer keprung torich te man orer ti fraa, xon tas ti tswaay khene ti selwich situatsyoon mit mache. Ti aanreete woo mer pis yets kesiin hon, khene tich helfe fiile propleeme woo mit tayn xwiicher eltere se tuun hon resolwiire.

Tayn fraa saat tas se kërn hët tas tuu een peser ferheltnis mit iire mama hët, awer tuu finst tayn xwiicher muter een persoon woo xweyer is fer um se keen.

Fersuucht etwas wii: Xprech mit tayn fraa triwer un say wilich fer noo kepe. Ti sach is net wiis tuu tich xpiirst iwer tayn xwiicher muter, awer wiis tuu tich mit tayn fraa xpiirst—ti persoon woos tuu ferproch host liipe. Tuut mitsamer een orer tswaay tinge ap xtime woo teyer mitsamer mache khent fer ayre ferheltnis mit iire mama sich ferpesere, un tan mach tas. In ti tsayt woo tayn fraa tayn aanxtrengung siit, te respekt woo se iwer tich hot tuut mit sicherheet kreeser kepe.—Piiplix funtament: 1 Korinter 10:24.

Tayn man saat tas tuu tich mee ketanke machst fer tayn eltere kefale wii fer iim.

Fersuucht etwas wii: Xprech mit tayn man un fersuucht tëm sayn mënung ferxteen. Is woer tas tayn man praucht sich net xpiire wii wën eyer uf sayt kelos weyer, wëns tuu ploos tayn eltere tii eere kepts woo se fertiine. (Xpriiche 23:22) Toch noch soo, must tuu tem tii karantii kepe—torich tayn wërter un aktsyoone—tas te foer tayn eltere khomt. Wën tayn man ti sicherheet hot, woerxaynlich tuut eyer sich net xpiire tas eyer mit tayn eltere am konkoriire is fer tayn acht kriin.— Piiplix funtament: Ëfeser 5:33.

Tayn fraa ferlang aanreete fer sayn eltere xtats fer tich.

Fersuucht etwas wii: Xprech mit tayn fraa, un tuut mitsamer entxlise pis woo tii eltere khene in tas pheyerche sayn sache sich rin mexe. Say wilich fer tich aan phase. Is es imer ferkheert mit tayn papa orer mama xpreche wën etwas tich ketanke macht? In was fer situatsyoon weyer te pest tas mache? Wën teyer tswaay krense xtelt woo net tsu xtrengt sin, tiise sache wëre iim xtant khee propleeme fer aych sin.— Piiplix funtament: Filiper 4:5.