Fer een froo hayrat hon, mise te man un ti fraa weyert kepe eene fer te anere. Awer fiile pheyerche tuun noo lose tas mache wayl se net mee eene te anere sayn kwaliteete siin. In tas puuch Infidelidade Emocional,* saat een terapeut tas fiile woo hilef suuche, mache sich mee ketanke mit was se net hon in iire hayrat keeche mit was se xon hon. Eyer saat: “Wën se in mayn klinika khome, tuun se ploos saan was sich ënere mus, un net was soo plaype sol. Te feeler fon tiise pheyerche is sich ferkese tas liipe is tepay weyert kepe eene fer te anere.”

Wii khene ti pheyerche tiise fal aus wayche?

Es kept weenicher strës wën te man un ti fraa tsayche tas se weyert kepe eene fer te anere. Ti meyerst tsayt wën ti tswaay sich aan xtrenge fer te anere sayn kwaliteete siin, tuut ti ferheltnis sich ferpesere. Wën te man un ti fraa xpiire tas se weyertlich sin, soo kaar een xlim situatsyoon is laychter fer um se keen.

Fraae: Tas puuch Infidelidade Emocional saat: “Fiile fraae ferkese sich tas ti mëner torich een kroos unertrikung mise keen fer ti neetichkheete fon ti familye uf phase.” Un als mool, kepts soo kaar unertrikung wën ti tswaay traus xafe.

Mëner: Fiile mëner kepe khee weyert fer ales was ti fraa macht fer ti familye un ti khiner uf phase, traus xafe un ti haus aarwayt mache. Fiona, a woo tray yoore ferhayrat is, saat: “Feeler mache is mënxlich. Toch noch, xpiire ich mich net kuut wën ich was ferkheertes mache. Tan, wën mayn man mich loope tuut fer etwas woo ich kemacht hon, wëns aach een haus aarwayt is, xpiire ich mich kuut. Opwool ich feeler mache, wees ich tas eyer mich liipt un ich siin tas mayn man uf mayn sayt is.”

Uf te aner sayt, wën te man un ti fraa sich net weyertlich xpiire, tas xtelt ti leaaliteet in te hayrat ins kefoer. Een fraa mim naame Valerie saat: “Wën tayn man tich khee weyert kept, is es laychter tich tichter xpiire tsu yemant woo weyert kept fer tayn kwaliteete.”

Playp wachsam. Ti neekst woch, kep acht aan ti kwaliteete fon tayn pheyerche un aach was eyer macht fer helfe in ti rotiin fon te familye. Khan sin tas tuu etliche tinge net kemërkt host wayls tuu tenkst tas tas tëm sayn flichte sin. Aan ti ën fon ti woch, mach een list fon (1) kwaliteete fon tayn man orer fraa woos tuu kërn host un (2) kuute tinge woo eyer orer tii kemacht hot fer ti familye. — Piiplix oryentiirung: Filiper 4:8.

Warom is es wichtich wachsam plaype? Erika saat: “Noo phaar yoore ferhayrat, khanst tuu noo lose weyert kepe fer tayn pheyerche. Xtats mërke tas kuutes woo eyer macht, khan sin tas tuu tich konsentriirst aan was eyer net macht.”

Froo tich: ‘Meecht ich khee weyert mee kepe fer was mayn pheyerche macht?’ Tsum payxpiil, wën tayn man etwas in ti ray macht aan tas haus, pist tuu petanklich? Orer tenkst tuu tas tas ploos tëm sayn flicht is? Man, loopst tuu tayn fraa wayl se sich aan xtrengt fer ti khiner tsiie? Orer tenkst tuu tas tas ploos tëne iire flicht is? Man un fraa, was mënt iir ti tsiil hon fer weyert kepe fer ti kleene un kroose tinge woo tayn pheyerche fer tich un tayn familye macht? — Piiplix oryentiirung: Romaaner 12:10.

Tuu imer loope. Ti Piipel keet wayter wën se saat tas mer sole petanklich sin. Tii saat: “Tsaycht aych petanklich.” (Koloser 3:15) Tes weeche, fersuuch tich aan keweene petanklich sin tsu tayn pheyerche weeche was eyer macht. James saat: “Wën mayn fraa weyert kept fer was ich mache, tas muut mich uf fer een peser man sin un noch mee mache fer unser hayrat.” — Piiplix oryentiirung: Koloser 4:6

Mëner un fraae woo weyert kepe eene fer te anere, un tuun tas tsayche torich wërter un aktsyoone, hon een xtërker ferheltnis. Michael saat: ”Ich tenke tas fiile hayrate teete keret wëre wën te man un ti fraa sich eene aan te anere sayn kwaliteete konsentriire teet. Wën se propleeme hon, teete se net tenke ti hayrat tsum xlus pringe. Teete se sich erinere tas se uf sayn sayt een persoon mit fiile kwaliteete hon.”