Noo tas ti khiner tehëm faart keen, fiile pheyerche mache een xweyer tsayt mit, yets woo tas “nist leyer” is, mërke se tas se wii frëmte mitsamer sin. Gary Neuman, woo in familye sache spesyalist is, saat: “Ich hon xon fiile pheyerche keholef woo khee aanung hate wii se khene noch mool tich paysamer sin. Noo ti khiner tehëm faart keen, siit aus tas se niks mee hon fer mitsamer teele un fertseele.” a

Pist tuu tas selwich in tayn hayrat am mit mache? Wën yaa, tee khan noch mool soo sin wii es foer heyer waar! Awer eyerst, wole mer etliche uersache siin woo khente tich fon tayn man orer fraa weech hale.

Yoore lang, hon se fer ti khiner keleept. Weeche kuute uersache, fiile eltere hon ti khiner sayn neetichkheete in eyerste plats in ti hayrat ketuun. Un te resultaat, tas pheyerche is soo keweent wii papa un mama sayn khiner in eyerste plats lose, tas tas eene fon ti anere—wech halt. Yets, woo ti khiner ausm haus sin, mërke se tas kans taytlich. Een fraa fon 59 yoore hot kesaat: “Wii mayn khiner tehëm waare, ich un mayn man hon noch tinge mitsamer kemacht.” Awer, nochter wii ti khiner tehëm faart sin kang, saat se: “Ich un mayn man hon unerxiitliche pryoriteete in unser leepe kehat.” Tii is soo wayt kang, tas se kesaat hot: “Meyer sin ploos eene te anere am hinere.”

Etliche pheyerche wise net was mache yets woo se aleen sin. Een puuch iwer familye sache, saat soo: “Wën se ti situatsyoon mit mache, fiile mëner tas se mit een kans anerste persoon ferhayrat sin.” Siit aus tas fiile mëner un fraae niks eenliches unich sich hon, un yeete eene fangt aan sayn aychne interes noo keen. Un te resultaat is tas aus siit tas se ploos pekhante sin woo paysamer woone, un net een pheyerche.

Ti kuut notisye is tas tuu tiise propleeme aus wayche khanst!—In woerheet, tuu khanst soo kaar ti nay leepe kërn hon, un ti Piipel khan tich helfe tas hin kriin. Wole mer siin wii.

Tuu ti enerunge aan nëme. Ti Piipel saat soo wën ti khiner kewakst sin: ‘Te man tuut sayn fater un sayn muter lose.’ (Xeenesis 2:24) Wii ti khiner mit tich kewoont hon, tayn opjetiiw waar ti khiner iipe fer mit ti propleeme um keen wën se folyeerich wëre. Wëns tuu ti sache in tiise aat siist, wërst tuu froo, wën se tehëm faart keen, wayl tayn iipung richtich kep hot.— Piiplix funtament: Markus 10:7.

Es is woer tas tuu imer papa orer mama fon tayn khiner wërst. Awer, yets woo se folyeerich sin, tayn flicht is tëne aanreete kepe, net superwisyoniire. Ti nay ferpiintung mit tayn khiner, tuut erlaupe tas tuu wayter ticht pay tayn khiner playpst. In ti selwich tsayt, khanst tuu mee acht fer tayn fraa orer man kepe. b— Piiplix funtament: Matheus 19:6.

Xprecht iwer tayn soriche. Wii pheyerche, xprecht iwer wii teyer xpiirt yets woo teyer noch mool aleen sayt. Tuut eene te anere mit acht heere, say ketultich un tuut eene te anere ferxteen. Im xtant, tauert tas een lang tsayt pis teyer aych noch mool ticht paysamer xpiirt, awer ti aanxtrengung tuut sich peloone.— Piiplix funtament: 1 Korinter 13:4.

Suuch naye tinge fer mitsamer mache. Xprecht iwer ayre tsiile woo teyer wii pheyerche mitsamer trefe khënt, orer iwer tinge woo teyer mitsamer mache khënt. Wayl teer ti khiner mitsamer ketsoo hot, say teyer xlaue persoone kep. Warom net tiise xlauheet penutse fer anere helfe?—Piiplix funtament: Yoop 12:12.

Erinert aych fon ayre kexicht. Tenkt aan ti kwaliteete woo mee ayre acht keruuft hot wii teyer aych kekhënt hot. Fersuucht wii pheyerche aych erinere fon ayre kexicht un wii teyer mit te xwiirichkheete fon leepe um kang sayt. In woerheet, teyer khent aarich froo sin yets woo teyer noch mool aleen sayt. Wën teyer tichter eene pay te anere xaft, tuut teyer een noch frooe hayrat hon un tas ferxtërkt ayre liip, soo wii teyer am aanfang hat.