Ti Preeticher fom Raych fertseele

Tii hot een opjetiiw im leepe kefun

YEESUS khënt sayn xeef. (Yoohan 10:14) Weer een kuut hërts hot un liip ti friit un kerechtichkheet, wërt kërn sin mit Yeesus sayn tisipele. Tiise persoon wërt raus kriin tas tas leepe een opjetiiw hot, soo wii es pasiirt is mit een fraa in Pëlxika. Tas is iire kexicht:

“Wii Yeehoowa sayn Tsayer aan mayn teer keklopt hon, waar ich soo traurich tas ich wolt mayn leepe am ën mache. Tas hot mich kefal was Yeehoowa sayn Tsayer kesaat hon iwich wii ti propleeme fon tiise xlecht welt am ën keen. Awer ti itee tas Kot too was mit tsu tuun hët, hat mich net kefal. Acht yoer foer traan, hon ich noo kelos in te khërich keen wayl ich kehast hon ti falxheet woo ich tat kesiin hon. Ich hon ti woerheet erkhënt in was Yeehoowa sayn Tsayer mich kesaat hon un hon ferxtan tas es net laycht is oone Kot leepe.

“Tas waar xaat, awer noo phaar mool woo se mich pesuucht hon, hon ich khee kontakt mee kehat mit Yeehoowa sayn Tsayer. Ich hon mich traurich kexpiirt. Ich hon tswaay phekche tsiker te taach keraucht, un hon soo kaar trooke penutst. Ich wolt mit mayne kerxtorpne kroosfater fertseele. Tan hon ich te spiritismus kesuucht. Wii een kroos angst hon ich mit kemacht, wayl oomts, wën ich aleen waar, sin ti temoone aan mich kang! Tas hat moonate aan kehal. Yeete oomt hat ich kroos angst fer aleen plaype.

“Tan, eene taach, sin ich xpatsiire kang, un sin in een aner weech noo kang woo ich net keweent waar. Ich sin hin khom aan een kroos paueray. Ich hon mich kewunert wii ich soo fiil mënxe kesiin hon. Wii ich ticht khom sin, hon ich kesiin tas se Yeehoowa sayn Tsayer waare, woo in een paueray fon een Raych Saal kexaft hon. Ich hon mich erinert wii Yeehoowa sayn Tsayer mich tehëm pesuucht hon. Un ich hon ketenkt tas es weyer soo kuut wën ti kans welt khent soo leepe wii tiise mënxe.

“Ich wolt wërklich tas Yeehoowa sayn Tsayer solte wiiter pay mich khome. Tan, hon ich mit eene woo tat kexaft hot kexproch. Ich hon tsu Kot kepeet un tseen taache tëm noo, te man woo te eyerst mich pesuuch hot, waar aan mayn teer. Tee hot mich uf kemuut fer mayn Piipel xtuutyum foran mache un ich hon tas mit frayt aan kenom. Tee hot mich klaych in kelaat fer uf ti fersamlunge im Raych Saal keen. Ich hon tas aan kenom. Ich hat noch nii soo was kesiin! Ich hat fer soo een lang tsayt kesuucht noo layt woo eene ti anere liipe teet un froo weyere. Ëntlich hat ich se kefun!

“Noo tas, sin ich uf yeete fersamlung kang. Unkefeer tray woche tëm noo, hon ich noo kelos tsu rauche. Ich hon wech kexmis mayn piicher fon astroloxii un mayn tiskos fon sataanix musik. Un tan khont ich xpiire tas ti temoone iire kraft iwich mich ferloer hon. Ich hon mayn leepe in te ray kextelt tëm noo Yeehoowa sayn kesetse woo in te Piipel xteen. Tray moonate tëm noo, hon ich aan kefang ti kuute notisye preetiche. Seks moonate xpeeter, sin ich ketaaft woer. Tswaay taache noo mayne taaf, hon ich aan kefang wii hilef pyoneer tiine.

“Ich tanke Yeehoowa fer ales kuutes woo tee fer mich kemacht hot. Mayn leepe hot yets een opjetiiw. Yaa, Yeehoowa sayn naame is een xtark thorm woo ich xuts kriit hon. (Xpriiche 18:10) Ich xpiire wërklich tas selwiche wii tee salmist, woo kexrip hot im Psalm 84:10: “Eene taach uf tayne hoof is tausent mool peser wii in anere pletse! Ich hon raus kesuucht xteen plaype foer ti teer fon mayn Kot sayn haus, xtats leepe in te woonunge fon te xlechtichkheet.””

Tiise fraa mit een kuut hërts hot raus kriit tas tas leepe een opjetiiw hot. Al woo hërtslich noo Yeehoowa suuche khene tas aach raus kriin.