Frooche fon te leeser

Tëm noo was ti Piipel saat iwich wii tas pluut solt pehantelt wëre, wii siin Yeehoowa sayn Tsayer etliche tratamente aan woo tëm kranker sayn aychen pluut penutse?

Yeete krist mus kenau uner suuche was ti Piipel saat eep eyer aan nëmt een tratament woo te tokter raus kesuucht hot orer was fer iim selepst peser aus siit. Tas is een sache unich iim un Yeehoowa.

Yeehoowa hot uns tas leepe kep, un tee saat tas mer sole net tas pluut fer uns selepst nëme. (Xeenesis 9:3, 4) Im Kesets woo Kot fer te friirix Israël kep hot, hot tee kesaat uf was fer aat tas pluut solt penutst wëre, wayl tas pluut petayt tas leepe. Tee hot kexikt: “Tas leepe fon een kriatuer is ins pluut, un ich selepst hon tas fer aych kep tas iir khent ayre sinte am altar teke.” Un wën een tier kexlacht teet wëre fer ese? Kot hot kesaat: “Eyer [mus] es aus pluute un tas pluut mit xtaap tsu xëte.” a (Lewiitikus 17:11, 13) Yeehoowa hot oft mools tas selwiche kesets wiiter foer kepracht. (Teuteronoomyum 12:16, 24; 15:23) Te yiitixe Chumash, fon Soncino, saat: “Tas pluut sol net uf kehoopt wëre. Tas solt net penutst wëre, awer tas sol aus kexut wëre uf tëm pootem.” Khee israeliiter solt tas pluut fon een aner kriatuer fer sich nëme, wayl tas leepe keheert tsu Kot. Tee solt aach net tas uf heepe orer fer sich selepst penutse.

Tas flicht fer Mooses Kesets aan heere is am ën kang wii te Mesias kextorep is. Awer fer Yeehoowa, is tas pluut noch foran haylich. Torich Kot sayn hayliche kayst, hon ti aphostele ti kriste oryentiirt fer sich wech hale fom pluut. Tas kesets mus kans ërnst aan kenom wëre. Uf een moraalix aat, waar tas soo wichtich wii sich wech hale fon seksuaal imoraaliteet un itolatrii. (Aphostele sayn Kexicht 15:28, 29; 21:25) Im 20^te yoerhunert, wii ti toktere hon aan kefang pluut transfusyoone mache, hon Yeehoowa sayn Tsayer ferxtan tas es weyer keeche Kot sayn Wort. b

Als mool, khan te tokter te kranker uf muute fer fon sayn aychne pluut ap tsiie un uf heepe, phaar woche foer sayn sirurxii, (in portukeesix, doação autóloga pré-operatória, orer DAPO) tas wëns nootwëntich weyer, khent te tokter te aychne kranker sayn pluut wiiter tsurik tuun. Awer pluut ap tsiie, uf heepe un wiiter in te khërper tuun is keeche was xteet in Lewiitikus un Teuteronoomyum. Tas pluut sol net uf kehoopt wëre; tas solt aus kexut wëre — tsurik tsu Kot kep wëre. Is woer tas mer net mee unich tas Mooses Kesets sin, awer Yeehoowa sayn Tsayer respektiire ti oryentiirunge woo Kot kept too triwer un hon ëntxlist sich wech hale fom pluut. Tes weeche, kepe mer kheen pluut un heepe mer es net uf fer wiiter in te khërper tuun, wayl tas is keeche was Kot sayn kesets saat.

Anere aate woo tas pluut fon te aychne persoon penutst wërt keen net kans taytlich keeche Kot sayn oryentiirunge. Tsum payxpiil, fiil kriste nëme aan iire pluut ap tsiie lose fer eksaame mache, woo nochter aus kexut wërt. Als mool khene ti toktere ferlange komplëkse prosetimente woo mim pluut tsu tuun hon.

Tsum payxpiil, in etliche sirurxii prosetimente, een teel fom kranker sayn pluut khan aus sayne khërper kelënkt wëre fer een prosës woo kenënt is emotiluitsyoon. Tas pluut woo in sayne khërper playpt wërt tiner kemacht, un tsayt tëm noo, tas pluut woo im aus weniche sirkuyt is, wërt wiiter tsurik in sayne khërper ketuun. Tas macht tas ti pluut tsele ticht aan normaal khome. Soo is es aach in een sirurxii, tas pluut woo te kranker ferliirt khan kenom wëre, sauwer kemacht un tsurik in te khërper ketuun. Een aner aat is aach tas pluut ap lenke tsu een maxiin woo fer een tsayt tas papier macht fon een teel fom khërper, wii tas hërts, ti lung orer ti niire. Nochter woo tas pluut in te maxiin is, keet tas tsurik in te khërper. In een aner prosetiment, wërt tas pluut ap kelënkt tsu een maxiin (centrífuga) fer tas pluut sauwer mache fon teele woo net mee kesunt sin. Orer im xtant is te opjetiiw een pextimt teel fom pluut isoliire un in een aner teel fom khërper penutse. Tas kep aach etliche sorte eksaame woo een teel fom pluut ap ketsoo wërt, markiirt orer fermixt mit metikamënte, un tan wiiter tsurik in tëm kranker sayn khërper ketuun.

Tas khene unerxiitliche kleenichkheete kepe, un sicher wëre naye sorte prosetimente, tratamënte un eksaame tsum foer xayn khome. Tas is net unser flicht yeete kleenichkheet uner suuche un een ëntxlus mache. Yeete krist mus ëntxlise wii sayn aychne pluut khan penutst wëre in een sirurxii, in een eksaam orer in een tratament woo eyer in tiise momënt kriit. Tee mus in foer raus mit sayn tokter xpreche iwich was kemacht khan wëre mit sayn pluut in een prosetiment. Tan, tëm noo sayn kewise, mus eyer raus suuche was mache. (Kuk te khaste.)

Ti kriste mise in te ketanke hale tas se sayn leepe fer Kot kep hon, un tas se ti flicht hon ‘tëm liipe mim kanse hërts, seel, kraft un ferxtant’. (Lukas 10:27) Anerste wii fiil mënxe, Yeehoowa sayn Tsayer kepe kroos weyert tsu iire fraayntxaft mit Kot. Tee woo tas leepe kep hot muut uf ale layt fertraue aan Yeesus sayn pluut woo aus kexut is woer. Too leese mer: “Torich tëm sin mer fray kep, torich tas fray khaaf opfer, torich tëm sayn pluut, yaa, ti fertsayung fon unsere feeler, torich te raychtum fon sayn unfertiint kuutheet.” (Ëfeser 1:7)

[Fuusnoote]

[Khaste/Pilt]

FROOCHE WOO MER UNS MACHE MISE

Wole mer saan tas teel fon mayn pluut aus mayne khërper raus kelënkt wërt, un tas pluut flus fer een tsayt xtiil kehal wërt. Meecht ich noch tenke tas tas pluut noch teel fon mich is, un tes weeche praucht tas net “aus kexut” wëre?

Meecht mayn kewise, woo sich aan ti Piipel halt, aan nëme khene tas in eksaame orer tratamënte teel fon mayn pluut ap ketsoo wërt, ferënert un wiiter tsurik ketuun in mayne khërper?