Frooche fon te leeser

In 2 Korinter 6:14, weer sin tii woo Phaul wii “unklaapiche” kenënt hot?

In 2 Korinter 6:14 xteet: “Tuut aych net unich een unklayches yoch xtele mit unklaapiche.” Wën mer uns tiise kontëkst aan siin, siit ma taytlich tas Phaul kexproch hot iwich layt woo khee teel in te kristlich kemaynt kemacht hon. Tas wërt aach kextitst torich anere piiplixe wersikele, woo tsayche wii Phaul tas wort “unklaapich” un “unklaapiche” penutst hot.

Tsum payxpiil, Phaul hot kexënt tas ti kriste iire priiter ufs kericht nëme teete “foer tii woo unklaapiche sin”. (1 Korinter 6:6) In tiise tekst, ti unklaapiche waare ti richter fon kericht fom Korinto. In sayn tsweete priif, hot Phaul kesaat tas Satanaas hët te “ferxtant fon te unklaapiche pliint kemacht”. Ti unklaapiche iire aue sin wii tsu ketekt fon een xlaye tas se khene ti kuute notisye net khëne lërne. Tiise unklaapiche hon niks kemacht fer Yeehoowa tiine, wayl Phaul hot foner traan aus keleet: “Wën yemant ticht pay Yeehoowa khomt, wërt te xlaye wech kenom.” (2 Korinter 3:16; 4:4)

Etliche unklaapiche hon tsu tuun mit was keeche tas kesets is un mit itolatrii. (2 Korinter 6:15, 16) Awer net ale unklaapiche sin keeche Yeehoowa sayn tiiner. Etliche tsayche interes in te woerheet. Fiil woo mit kriste ferhayrat sin tuun froo foran mit tëne leepe. (1 Korinter 7:12-14; 10:27; 14:22-25; 1 Pheeter 3:1, 2) Awer Phaul nënt “unklaapich” ti layt woo net teel mache in te kristlich kemaynt, tas is, tii woo sin net unich tëne woo “am Hër klaape”. (Aphostele sayn Kexicht 2:41; 5:14; 8:12, 13)

Ti oryentiirung in 2 Korinter 6:14 tiint fer kriste lënke in ales im leepe un is oft mools kenënt kep wii een kluuch aanreet fer kriste woo hayrate wole. (Matheus 19:4-6) Een krist woo tetikiirt un ketaaft is, is kluuch wën eyer net hayrat mit yemant woo unklaapich is, wayl tëm sayne klaape un opjetiiwe im leepe sin anerste wii een woere krist sayn.

Awer was saan iwich tii woo ti Piipel xtutiire un samele sich mit te kemaynt? Was saan iwich tii woo noch net ketaaft sin, awer sin puplikatoore? Sin tii aach unklaapich? Nee. Layt woo ti kuute otere aan nëme wii ti woerheet un tuun foran xrite kepe fer ketaaft wëre, sole net unklaapich kenënt wëre. (Romaaner 10:10; 2 Korinter 4:13) Kornëlyus, foer sayn taaf, is kenënt wii een man mit een xtarke klaape, woo tiife respekt tsu Kot hat. (Aphostele sayn Kexicht 10:2)

Weyer tas was kluuches een krist sich in lose un hayrate mit yemant woo puplikatoer is, awer noch net ketaaft, ploos wayl ti aanreet woo Phaul kep in 2 Korinter 6:14 net sich kenau too tsu xteet? Nee, tas weyer net kluuch. Warom? Weeche te taytlich aanreet woo Phaul kep hot fer kriste woo witfraae sin. Phaul hot kexrip: “Tii is fray fer sich hayrate mit weer tii wil, awer ploos im Hër.” (1 Korinter 7:39) Too sin ti woere kriste aan kereet fer ploos hayrate mit yemant woo im Hër is.

Was petayte ti wërter “im Hër” un aach “im Kristus”? Phaul hot kexrip in Romaaner 16:8-10 un in Koloser 4:7 iwich tii woo “im Kristus” orer “im Hër” waare. Wën mer tiise wërse leese, mërke mer tas tii waare ti ‘mitaarwayter’, ‘aankenomer’, ‘liipe priiter’, ‘troye tiiner’ un ‘mitsklaawer’.

Wën wërt yemant “een sklaaw im Hër”? Tas pasiirt wën tee fraywilich macht was een sklaaw mache mus un tuut sich selepst ap saan. Yeesus hot aus keleet: “Wën yemant mich noo keen wil, mus eyer sich selepst ap saan, sayn kweel phoste uf sich nëme un mich fer imer noo keen.” (Matheus 16:24) Te mënx fangt aan Yeesus noo keen un nëmt aan Yeehoowa sayne wile mache wën tee sayn leepe fer Tëm ap kept. Noo tas, lost tee sich taafe un wërt een orteniirte tiiner fer Kot, un Yeehoowa Kot nëmt tee aan. a Soo, ‘hayrate im Hër’ petayt hayrate mit yemant woo xon pewayst hot tas se wërklich klaapt un hot sayn leepe fer Yeehoowa kep wii “sklaaw fon Kot un fom Hër Yeesus Kristus”. (Tyako 1:1)

Weer ti Piipel xtutiirt mit Yeehoowa sayn Tsayer un macht kuute foer xrite sol keloopt wëre, awer tee hat sayn leepe noch net fer Yeehoowa kep, un macht noch net ti tiinst aarwayt. Tee is am neetiche ënerunge mache, awer tee mus noch ti haupste ënerunge mache woo tsu tuun hon mit een tetikiirte un ketaafte krist sin, eep eyer tenkt aan een aner kroos ënerung im leepe mache, soo wii sich ferhayrate.

Weyer tas kuut fer een krist namoriire yemant woo kuut foran khomt in sayne Piipel xtuutyum, im xtant tenke am waarte tas te persoon sich taafe lost, un tan mit tëm hayrate? Nee. Tee woo ti Piipel xtutiirt khan im xtant sich taafe lose weeche ferkheerte motiiwe, wën eyer mërkt tas een tetikiirte krist mit iim hayrate wil, awer macht tas ploos wën eyer sich taafe lost.

Ti meyerst tsayt is te persoon een puplikatoer woo net ketaaft is fer een khorts tsayt, pis eyer soo wayt is fer sich taafe lose. Soo, ti aanreet fer sich hayrate ploos im Hër is net oone tswëk. Un wën yemant xon tas elter hot fer hayrate un is kroos kewakst in een kristlich familye, samelt sich mit te kemaynt xon fer lange yoore un tiint wii een puplikatoer woo net ketaaft is? Wën tas soo is, was halt tëm tsurik fer sayn leepe fer Yeehoowa kepe? Warom kept tee net tiise xrit? Meecht tee tswayfele hon? Ale tëm woo tee net een unklaapiche is, khan ma net saan tas tee “im Hër” is.

Ti aanreet woo Phaul iwich ti hayrat kep hot is fer unser aychne interes. (Isayas 48:17) Wën ti tswaay xon iire leepe fer Yeehoowa kep hon, tan hot iire inlasung een xtark kaystlich funtament. Tii hon te selwiche klaape un opjetiiwe im leepe un tas helft een froo hayrat hon. Un noch: ‘hayrate im Hër’ tsaycht tas se leaal tsu Yeehoowa sin un tas pringt fiile seechen, wayl ‘mit tëm woo leaal is, keet Yeehoowa mit leaaliteet um’. (Psalm 18:25)

[Noote]

[Pilt fon sayt]

“Mit tëm woo leaal is, keest tuu [Yeehoowa] mit lealiteet um”