Was khene mer lërne fon Yeesus sayn wunere?

IM xtant wunerst tuu tich wise tas ti kreekixe tekste in te Piipel iwich Yeesus sayn leepe uf te Eyert hon nii tas wort “wuner” penutst. Tas kreekixe wort (dýnamis), woo oft iwersetst wërt “wuner” petayt “macht, orer kraft”. (Lukas 8:46) Tas khan aach iwersetst wëre wii “kapasiteet” orer “machtich aarwayt”. (Matheus 11:20; 25:15) Soo wii eene unersuucher saat, tas kreekixe wort “tsaycht ti machtich aarwayt woo kemacht kep is, un hauptseechlich, ti macht woo penutst kewoer is fer tas mache. Tiise akt is kenënt wii een aus truk fon Kot sayn macht in aktsyoon.”

Anert kreekixe wort (téras) wërt oft iwersets wii “wuner”. (Yoohan 4:48; Aphostele sayn Kexichte 2:19) Tas wort tsaycht wii tas wërekt aan tii woo tas siin. Oft mools, hot tas folek un ti tisipele sich ferwunert wën se Yeesus sayn machtiche aarwayte kesiin hon. — Markus 2:12; 4:41; 6:51; Lukas 9:43.

Een trite kreekixe wort (semeíon), woo penuts is woer fer iwich Yeesus sayn wunere xpreche petayt “tsayche”. Tas wort “xtelt een tiif petaytung fom wuner”, saat te unersuucher Robert Deffinbaugh. Tee saat noch: “Een tsayche is een wuner woo pringt een woerheet iwich unser Hër Yeesus.”

Ilusyoon orer macht woo Kot kep hot?

Ti Piipel tsaycht net Yeesus sayn wunere wii khinsler fer ti layt sayn ferkniichung. Tii waare een austruk fon “Kot sayn wunerlich macht”, soo wiis waar wën Yeesus een taywel aus een puup raus ketriipt hot. (Lukas 9:37-43) Meechte tiise machtiche aarwayte unmeechlich sin fer Kot te Ale Mechtiche — woo kenënt is wii yemant woo seer ‘kroos kraft un wunerlich macht’ hot? (Isaiias 40:26) Sicher net!

Ti Ewankeelye xpreche iwich 35 wunere woo Yeesus kemacht hot. Awer saat net kenau wii fiil wunere tee kemacht hot. Tsum payxpiil, Matheus 14:14 saat: “[Yeesus] hot een kroos folek kesiin; un hot se ketauert un ti kranker keheelt.” Tas tsaycht net wii fiil kranke tas tee tas mool keheelt hot.

Tiise machtiche aarwayte hon tsu tuun mit was Yeesus saat tas eyer Kot sayne Soon weyer, te ferxprochne Mesias. Ti Piipel tsaycht wërklich tas ti macht woo Kot Yeesus kep hot, hot tëm ti apiliteet kep fer wunere mache. Te aphostel Pheeter hot kesaat tas Yeesus weyer “te man woo Kot foer kepracht hot torich mechtiche aarwayte un wunere un tsaycher woo Kot torich iim kemacht hot unich aych, soo wii teyer wist.” (Aphostele sayn Kexicht 2:22) Een aner mool, hot Pheeter kesaat “Kot hot tee [Yeesus] kesalept mit hayliche kayst un kraft un tee is torich tas lant kang, kuutes kemacht un hot tii woo te taywel unertrikt hot kesunt kemacht, wayl Kot mit iim waar.” — Aphostele sayn Kexicht 10:37, 38.

Yeesus sayn wunere waare ferpun mit sayn pexeet. Markus 1:21-27 tsaycht wii tas folek reakiirt hot tsu Yeesus sayn inlërnung un eene fon sayn wunere. Markus 1:22 saat tas tas folek “sich erxtaunt hot mit ti aat woo tee in kelërnt hot”, un te wërs 27 saat tas se sich ‘erxtaunt’ hon wii tee eene taywel raus ketriip hot. Yeesus sayn machtiche aarwayte un sayn pexeet pewayse tas tee te ferxprochne Mesias waar.

Yeesus hot net ploos kesaat tas eyer te Mesias weyer; awer ti macht woo Kot iim kep hot, woo taytlich sin in sayn wërter un aktsyoone, pewayse tas tee wërklich te Mesias waar. Wii se im kefroot hon iwich sayn xtel un weer im ti autoriteet kep hot, hot tee klaar keantwort: “Ich hon een kreeser tsaycher wii Yoohan [te Taafer] saynes, wayl ti aarwayte woo mayne Fater mich kep hot fer mache, tiise aarwayte woo ich mache, tsayche tas te Fater mich kexikt hot.” — Yoohan 5:36.

Pewaysung fon ti echtichkheet iwich Yeesus sayn wunere

Warom khene mer uns sicher sin tas Yeesus sayn wunere wërklich pasiirt sin? Kuk etliche pewaysunge.

Wën Yeesus wunere kemacht hot, wolt tee nii tas ti layt iim eere kepe solte, awer hot imer ti eere fon yeete wuner woo tee kemacht hot tsu Kot kep. Tsum payxpiil, eep Yeesus een pliinte keheelt hot, hot tee klaar kesaat tas se tas mache teet fer tas “Kot sayn aarwayte ketsaycht wëre torich tëm.” — Yoohan 9:1-3; 11:1-4.

Yeesus hot sich net aan kextelt wii een ilusyooniste, khinsler un tii woo ti layt heele wole torich te klaape. Tee hot nii penutst hipnoses, kexwintele, proosiche xpetakele orer maxii un rituaale. Un sayn wunere hon niks mit awerklaape orer reliikye tsu tuun kehat. Mërk ti keweenlich aat wii Yeesus tswaay pliinte keheelt hot. ‘Tee hot se ketauert’ saat te tekst, Yeesus hot sayn hant uf tëne sayn aue keleet un tii hon klaych aan kefang tsu siin, un sin iim noo kang.” (Matheus 20:29-34) Yeesus praucht khee rituaal orer xpetakel mit lichte un anere tinge, tee hot sayn wunere kemacht foer ti layt, net im ferxtekelt, als mool foer eene kroose krup tsayer. Yeesus sayn wunere sin anerste wii ti motërn wunere woo mise unersuucht un pewayst wëre. — Markus 5:24-29; Lukas 7:11-15.

Als mool, hot Yeesus kexproch iwich te klaape fon tëne woo nuts kehat hon fon een wuner woo tee kemacht hot. Awer, wën te mënx weenich klaape hat, tas hot net Yeesus kexteert fer te wuner mache. Ti tsayt woo tee in Kafarnaum, in Kalileya, waar “hon se fiil layt tsu iim kepracht woo taywele in sich hate; un eyer hot ti kayste raus ketriipt mit een wort un keheelt al tii woo krank waare”. — Matheus 8:16.

Yeesus hot net sayn wunere kemacht fer ti naykeriche layt tsufriite lose, awer fer mënxe helfe woo wërklich in noot waare. (Markus 10:46-52; Lukas 23:8) Yeesus hot nii een wuner kemacht fer sayne aychne nuts. — Matheus 4:2-4; 10:8.

Un was khan ma saan iwich ti Ewankeelye?

Ti fakte iwich Yeesus sayn wunere sin tsu uns khom torich ti fier Ewankeelye. Wën mer ti echtichkheet iwich tiise fakte unersuuche, khene mer too traan klaape? Yaa, mer khene.

Wii mer xon kesiin hon, Yeesus hot sayn wunere kemacht foer ti layt, als mool foer fiil tsayer. Ti eyerste Ewankeelye sin kexrip woer in een tsayt woo ti meyerste fon tiise tsayer noch keleept hon. Iwich ti eerlichkheet fon ti Ewankeelye xraypere saat tas puuch The Miracles and the Resurrection (Ti wunere un ti ufxtayung): “Saan tas ti Ewankelyunge xraypere hon istorixe fakter ferxtekelt unich eene kroose haufe fon wunere, fer teoloxik propakante mache, weyer een kroos unrëchtichkheet.  . . . Tëne iire wunx waar xraype iwich eerliche fakte.”

Ti yuute woo keeche te kristyanismus waare hon nii in tswayfele kextelt ti machtiche aarwayte woo ti Ewankeelye triwer xpreche. Tii hon ploos in tswayfele kextelt woo ti macht heyer khome teet fer tiise aarwayte mache. (Markus 3:22-26) Ti kritike woo xpeeter khom sin khonte Yeesus sayn wunere aach net ap xtrayte. In keeche teel, im eyerste un tsweete yoer hunerte N.K., sin in istorixe tokumente imer noch kexrip woer iwich Yeesus sayn wunere. Soo khene mer uns sicher sin tas ti wunere woo ti Ewankeelye triwer xpreche echtich sin.

Te man woo wunere kemacht hot

Noore Yeesus sayn wunere unersuuche weyer net kenuuch wën ploos kekukt teet wëre noo ti fakte woo ti echtichkheet pewayse. Wën ti Ewankeelye xraype iwich Yeesus sayn machtiche aarwayte, tsayche se eene man mit tiife xpiirunge un kroos mitlayt, woo een kroos interes hat fer ti anere helfe sich kuut xpiire.

Een payxpiil is wii te man woo lëpra hat ticht pay Yeesus khom is un aan kehalt: “Wëns tuu ploos wilst, khanst tuu mich rayn mache.” Yeesus hot “tee ketauert”, hot ti hant aus kextrëkt un te man aan kekrif, un saat: “Ich wil es! Kep rayn.” Te man is klaych kesunt kewoer. (Markus 1:40-42) Soo hot Yeesus sayn kroos mitlayt kemacht tas eyer ti macht penutst hot, woo tee fon Kot kriit hot, fer ti wunere mache.

Was is pasiirt wii Yeesus een laycht aan ketrof hot woo aus ti xtat Nayn khom is? Te yunge kextorpte waar een witfraa sayne eensiche soon. Yeesus hot ti fraa “ketauert”, is ticht pay iir kang un saat: “Los noo tsu prile.” Tan hot tee tëne sayn soon uf keruuft. — Lukas 7:11-15.

Etwas treestiche woo mer lërne fon Yeesus sayn wunere is tas tee ti layt ‘ketauert’ hot un hot etwas kemacht fer se helfe. Awer tiise wunere sin net ploos kexichte. Hepreeyer 13:8 saat: “Yeesus Kristus is te selwiche kester, hayt un fer imer.” Tee rechiirt yets im himel wii Kheenich un is fërtich un hot ti apiliteet fer ti wunerlich macht woo Kot iim kep hot penutse, in een fiil kreeser aat wii eyer hiir uf ti Eyert waar wii een man. Un hatich, penutst Yeesus tiise macht fer ti troy mënxheet heele. Yeehoowa sayn Tsayer fraye sich fer tich helfe mee wise iwich tiise xeene hofnung fom tsukhunft.

[Pilte]

Yeesus sayn wunere waare een tsayche fon “Kot sayn kroos macht”

[Pilt]

Yeesus waar een man mit tiife xpiirunge