Xtel tsiile woo tich helfe Kot tiine

“WËN een xifsman wees net woo eyer hin keen wil, khee wint woo ploost, is kuut.” Tiise wërter fon een xrayper fon te ferkangne yoore, tsayche wii wichtich ti tsiile un opjetiiwe im leepe sin.

Ti Piipel xprecht iwer fiile layt woo tsiile hate un sich too traan aan kextrengt hon. Tsum payxpiil: Noee hot unkefeer 50 yoore kexaft un hot “een arich kepaut fer ti retung fon sayn familye”. Te profeet Mooses hot “mit acht foran tsu ti peloonung kekukt”. (Hepreeyer 11:7, 26) Un Yeehoowa hot aach een opjetiiw fer Yosuee kep: tas lant fon Kanaan ap kewine. (Teuteronoomyum 3:21, 22, 28; Yosuee 12:7-24)

Im eyerste yoer hunert, hot te aphostel Phaul aach tsiile kextelt. Tee wust was Yeesus kesaat hat: “Tiise kuute notisye fom Raych wëre uf te kans pewoont eyert kepreeticht.” (Matheus 24:14) Yeesus hot fer Phaul kesaat tas eyer solt fer ti natsyoone iwer tëm preetiche. Soo, hot Phaul keholef kemaynte uf mache in fiile lënter — fon Kleen Asya pis Europa. (Aphostele sayn Kexicht 9:15; Koloser 1:23)

Yawool, Yeehoowa sayn tiiner hon imer tsiile kextelt un tëne ketrof. Un soo hon se eer tsu Kot kep. Wii khene mer hayt kaystliche tsiile xtele? Was fer tsiile khene mer xtele? Un was khene mer mache fer tëne trefe?

Es is wichtich ti richtich motiwatsyoon hon

Ti layt in te welt khene fiile tsiile xtele. Awer ti tsiile woo Kot sayn tiiner xtele, sin kans anerste wii tëne sayns. Fer ti meyerste layt in te welt, ti haupst uersach hinich sayn tsiile is kelt un macht kriin. Awer unser tsiile sole net soo sin. Meyer eere Yeehoowa wën mer tsiile xtele woo uns helfe tëm peser tiine. (Matheus 6:33) Ti haupst uersach hinich unser tsiile sol unser liip tsu Yeehoowa un ti anere sin. (Matheus 22:37-39; 1^te Timoteus 4:7)

Meyer khene tas tsiil xtele fer mee fer Yeehoowa mache orer een kristlich kwaliteet ferpesere. Awer ekaal tas tsiil woo mer xtele, ti liip tsu Yeehoowa un ti anere sol imer ti haupst uersach hiner traan sin. Noch soo, aach wën mer ti richtich motiwatsyoon hon, es khan als mool xweyer sin unser tsiile trefe. Was khan uns helfe tëne trefe?

Es is wichtich een xtark wunx hon fer unser tsiil trefe

Wën mer tenke iwer wii Yeehoowa tas Uniwërsum kemacht hot, lërne mer fiil iwer tsiile xtele. Ti wërter “es is oomt un moynt kep”, tsayche tas Yeehoowa sayn aarwayt orkanisiirt un keteelt hot in tsayte woo eyer wii taache kenënt hot. (Xeenesis 1:5, 8, 13, 19, 23, 31) Am aanfang fon yeete eene fon tëne, wust Kot xon was sayn tsiil orer opjetiiw fer te taach weyer; un tee hot tas hin kriit. (Apokalipsis 4:11) Yoop hot kesaat: “Wën [Yeehoowa] wil etwas mache, tee macht tas.” (Yoop 23:13) Es wërt wool Yeehoowa aarich kefrayt hon wii eyer “kesiin [hot] tas ales was eyer kemacht hat waar iwer kuut”! (Xeenesis 1:31)

Fer unser tsiile trefe, mise mer een xtark wunx hon fer tas mache. Was tuut uns helfe tiise xtark wunx ëntwikele? Tenk noch mool iwer ti kriatsyoon fon te eyert. Yeehoowa wust xon tas ti eyert aarich xeen kepe teet, opwool sayn aarwayt noch am aanfang waar. Soo wii Yeehoowa, fer unser wunx ferxtërke, mise mer tenke aan te resultaate un nutse woo mer kriin wën mer unser tsiil trefe. Tas is mit Tony pasiirt, woo 19 yoore alt is. Wën eyer een filyaal pesuucht hot, hot eyer fiil ketenkt aan was eyer kesiin hot. Noom pesuuch, hot Tony sich imer kefroot: ‘Wii weyer es in soo een sort plats leepe un xafe?’ Wayl Tony wayter too triwer ketenkt hot, is sayn wunx xtark kep fer tat tiine. Tee hot sich aan kextrengt fer tiise tsiil trefe. Noo phaar yoore, is sayn petitsyoon fer im Petël tiine aprowiirt kep un tee is aarich froo kep.

Wii noch khene mer unser wunx ferkreese fer unser tsiil trefe? Meyer khene tsayt fertraype mit layt woo tiise tsiil xon ketrof hon. Wën Jayson een kleene puup waar, hot eyer net kërn kepreeticht. Awer tee hot kelërnt ti preetich aarwayt liipe. Wën eyer fërtich mit te xuul waar, is eyer een rekulaar pyoneer kep. Was hot Jayson keholef te wunx hon fer een pyoneer sin? Tee saat: “Xpreche mit anere woo xon pyoneere waare un mit tëne in te preetich aarwayt xafe, hot mich fiil keholef.”

Unser tsiile uf xraype khan uns helfe tëne trefe

Wën mer wërter penutse fer unser ketanke orer itee aus leye, es wërt laychter tëne ferxteen. Salomon hot in te Piipel kexrip tas kluuche wërter uns helfe khene kuute ëntxlise im leepe mache. (Eklesyastes 12:11) Wën tiise wërter uf kexrip sin, tuun se unser hërts un ketanke noch mee petrefe. Tes weeche hot Yeehoowa al ti kheeniche fon Israël kexikt een kopye fom mosayxe Kesets uf xraype. (Teuteronoomyum 17:18) Kraat soo, khene mer uf xraype unser tsiile, wii mer pleene tëne trefe, ti propleeme woo pasiire khene un wii mer torich tëne triwer wech khome tuun. Es wërt aach laychter unser tsiile trefe wën mer unersuuche ti apiliteete orer khëntnis woo mer kriin mise un aach ti layt woo uns helfe un uner xtitse khene.

Geoffrey waar een spetsyaal pyoneer in Asya torich een lang tsayt. Tsiile xtele, hot tëm keholef sich in ruu xpiire. Wii sayn fraa uf een mool kextorep is, is tas leepe aarich xweyer fer Geoffrey kep. Es hot tëm een tsayt kenom fer sich aan phase mit sayn nay situatsyoon. Tan hot eyer ëntxlist tsiile xtele fer tëm helfe fiil se tuun hon in te preetich aarwayt. Tee hot sayn pleen uf kexrip un too triwer kepeet. Pis tas ën fom moonat, wolt Geoffrey 3 naye Piipel xtuutye aan fange. Eyer hot imer sayn aktiwiteete noo kekukt fer se siin wii wayt eyer xon foran kang is. Meecht eyer sayn tsiil ketrof hon? Yawool! Geoffrey is aarich froo kep mit sayn 4 naye Piipel xtutënte.

Teel kroose tsiile in kleene tsiile

Etliche tsiile khene tsu xweyer fer uns aus siin. Tony, iwer weem mer foner traan kexproch hon, wolt in een filyaal fon Yeehoowa sayn Tsayer tiine. Awer eyer hot ketenkt tas es nii pasiire teet. Tee hot soo ketenkt wayl eyer must fiile ënerunge mache un eyer hat sich noch net tsu Yeehoowa tetikiirt. Noch soo, hot eyer tas tsiil kextelt fer ti neetiche ënerunge mache un fërtich fer te taaf sin. Noom taaf, hot Tony ëntxlist hilef pyoneer sin un xpeeter is eyer een rekulaar pyoneer kep. Tee hot in een kalëner uf kexrip te taach woo eyer aan kefang hot yeete tsiil trefe. Wii eyer xon pyoneer fer een tsayt waar, hot eyer net mee ketenkt tas in Petël tiine unmeechlich weyer.

Meyer khene aach unser kroose tsiile in kleene tsiile teele. Wën mer kleene tsiile trefe, tuun mer siin wii fiil mer xon kemacht hon un tas tuut uns uf muute unser kroos tsiil trefe. Wën mer imer tenke aan was mer xon hin kriit hon, es tuut uns helfe wayter xtram xafe fer unser tsiil trefe. Wën mer wayter tsu Yeehoowa peete iwer unser tsiile, tuut eyer uns helfe. Te aphostel Phaul muut uns uf: “Tuut imer peete.” (1^te Thesalooniker 5:17)

Xtreng tich aan un kep net uf!

Sich kuut pleene un een xtark wunx hon, tuut uns helfe. Awer als mool khan sin tas een tsiil unmeechlich fer uns is. Meyer khene fiil lërne mim payxpiil fom tisipel Markus. Te aphostel Phaul teet sayn 2^te misyoneer rees mache un Markus wolt mit keen. Awer Phaul wolt tëm net mit nëme… (Aphostele sayn Kexicht 15:37-40) Sicher is Markus aarich traurich kep. Awer tee must etwas too temit lërne un sayn tsiil ënere. Un Markus hot kraat tas kemacht! Siits aus tas eyer een lisyoon too temit kelërnt hot, wayl Phaul hot xpeeter kuut iwer tëm kexproch. Un tee khont aach mim aphostel Pheeter in Papiloon xafe. (2^te Timoteus 4:11; 1^te Pheeter 5:13) Markus hot aach een wunerlich priwilëj kriit: Kot hot tëm penutst fer iwer Yeesus sayn leepe un preetich xraype!

Soo lang wii mer uns aan xtrenge fer unser tsiile trefe, khene propleeme foer khome. Sole mer uf kepe? Nee. Meyer mise noo kuke wii wayt mer xon foran kang sin un ti neetiche ënerunge in unser tsiile mache. Meyer mise uns wayter aan xtrenge fer unser tsiile trefe un net uf kepe. Te kluuche kheenich Salomon kept uns een sicherheet: “Fertrau uf Yeehoowa ales was tuu machst, un tayn pleen tuun kuut hin khome.” (Xpriiche 16:3)

Als mool khan sin tas es unmeechlich wërt unser tsiil trefe. Tsum payxpiil, fiilaycht wëre mer krank orer mer mise unser familye uf phase. Awer es kept etwas woo mer sole nii ferkese: unser wichtichste tsiil is tas eewiche leepe kriin. (Lukas 23:43; Filiper 3:13, 14) Wii khene mer eewiche leepe kriin? Te aphostel Yoohan kept uns ti antwort: “Weer Kot sayn wile macht, playpt fer imer.” (1^te Yoohan 2:17) Fiilaycht, weeche unser situatsyoon, khene mer net unser tsiil trefe. Awer meyer khene wayter “tiife respekt tsu te woere Kot hon un tëm sayn kepoote aan heere”. (Eklesyastes 12:13) Ti kaystliche tsiile helfe uns konsentriirt sin aan Kot sayn wile. Tes weeche, wole mer tsiile xtele un trefe; un soo, kepe mer eer tsu unser Kriatoer.

[Khaste]

Kaystliche tsiile woo mer xtele khene

○ Ti Piipel yeete taach leese

○ Yeete Wachthorm un Wacht Uf! leese

○ Unser kepeete ferpesere

○ Ti kwaliteete fon te frucht fom kayst tsayche

○ Mee in Yeehoowa sayn aarwayt mache

○ Peser preetiche un in lërne

○ Peser preetiche torich telefoon, in te kexefte un in informaale situatsyoone