Is tayn ferkniichung nutslich?
Is tayn ferkniichung nutslich?
“Sayt imer sicher iwer was tëm Hër kefalt.” (ËFESER 5:10)
1, 2. (a) Wii tsaycht ti Piipel tas Yeehoowa wil hon tas mer froo im leepe wëre? (b) Wën mer ferxteen tas ti ferkniichung een “kexenk fon Kot is”, wii tuun mer tiise tsayt penutse?
YEEHOOWA wil hon tas mer froo wëre un ti Piipel lost tas kans taytlich. Tsum payxpiil, te Psalm 104:14, 15 saat iwer Yeehoowa: “Fon te eyert, machst tuu ese khome: te wayn woo tëm man sayn hërts frayt; ti eel, woo tas kesicht klense macht; un tas proot, woo tëm man sayn hërts ferxtërkt.” Yeehoowa macht tas ti plantse wakse tas mer khene ese fer se leepe kriin. Un opwool meyer khene oone wayn leepe, tuut Kot uns tas kepe tas unser ‘hërts sich fraye khan’. (Ekl. 9:7; 10:19) Yawool, Yeehoowa wil hon tas mer froo wëre un tas unser “hërts mit frayt kefilt” wërt. (Aph. 14:16, 17)
2 Tes weeche is es net ferkheert uns tsayt hoole fer “ti feechel im himel” un ‘ti lilye ufm khamp’ kuke orer was aneres mache woo uns froo lost. (Mat. 6:26, 28; Psal. 8:3, 4) Een froo leepe is een “kexenk fon Kot”. (Ekl. 3:12, 13) Wën mer ferxteen tas uns tsayt hoole fer uns ferkniiche een kexenk fon Kot is, tuun mer tiise tsayt penutse in een aat woo Tëm kefalt.
Tuu tayn ferkniichung kluuch raus suuche
3. Wën mer ti ferkniichung in te richtich aat siin, fon was tuun mer uns erinere?
3 Tii woo ti ferkniichung in te richtich aat siin, ferxteen tas ti kriste khene sayn aychne ferkniichung raus suuche. Awer tii ferxteen aach tas net ale sorte ferkniichunge kuut sin. Warom khene mer tas saan? Fer tas antworte, wole mer ti ferkniichung mim ese ferklayche. In unerxiitliche lënter, hon ti layt unerxiitliche sorte ese kërn. Kraat soo, hon ti kriste fon een lant een sort ferkniichung kërn, awer ti kriste fon een aner lant, net. Soo kaar ti kriste woo im selwiche lant leepe, hon unerxiitliche ferkniichunge kërn. Etliche leese kërn piicher; anere fine tas leetich. Welche faare kërn tswaayraat; anere tenke tas es tëne tsu miit lost. Meyer ferxteen tas ti layt khene unerxiitliche tinge mache un tas is was kuutes! (Rom. 14:2-4)
4. Warom sole mer krënse xtele aan te sort ferkniichung woo mer raus suuche? Mach een ferklaychung.
4 Awer mer ferxteen aach tas, opwool mer tas recht hon fer unser ferkniichung raus suuche, es wil net saan tas mer mache khene ales was mer wole. Wole mer tas noch mool mim ese ferklayche. Meyer khene unerxiitliche sorte tinge ese, awer mer teete net fer kërn was faules ese. Tas weyer net kluuch un khent uns krank lose. Kraat soo, opwool mer khene unerxiitliche sorte ferkniichunge raus suuche, meyer wole uns net ferkniiche mit etwas woo kefeerlich, wyolënt orer imoraalix is. Soo sorte aktiwiteete keen keeche was ti Piipel saat richtich is un khente unser kesuntheet un fraayntxaft mit Yeehoowa ins kefoer xtele. Tes weeche, foer een ferkniichung raus suuche, sole mer tenke ep tas Yeehoowa kefale tuut orer net. (Ëfe. 5:10) Wii khene mer tas mache?
5. Wii khene mer wise ep unser ferkniichung mit te Piipel xtimt?
5 Wii khene mer wise ep een ferkniichung kuut is un Yeehoowa kefalt? Es mus xtime mit was ti Piipel saat. (Psal. 86:11) Fer uns helfe kuut ëntxlise, khene mer uns tiise 3 frooche mache: ‘Was fer sort ferkniichung is tas? Wii fiil tsayt tuun ich mit tiise ferkniichung aus kepe? Mit weem tuun ich mich ferkniiche?’ Wole mer yeete frooch noo kuke.
Was fer sort ferkniichung is tas?
6. Was fer sorte ferkniichunge mise mer ap xtose un warom?
6 Eep mer een ferkniichung raus suuche, sole mer uns frooe: ‘Was fer sort ferkniichung is tas?’ Fer tas antworte, mise mer ferxteen tas in tiise welt, kepts fiile sorte ferkniichunge woo keen kans tekeeche was ti Piipel saat. (1 Yo. 5:19) Ti woere kriste tuun tiise sorte ferkniichunge ap xtose. Too tepay sin ti ferkniichunge woo sich traan hale aan kropheet, temonismus, homoseksualismus, pornokrafii, wyolënts orer woo aus siin mache tas tas xlechtes, kuut is. (1 Kor. 6:9, 10; lees Apokalipsis 21:8.) Aach wën mer aleen sin, wole mer tsu Yeehoowa tsayche tas mer tiif hase was xlecht is un soo sorte ferkniichunge ap xtose. (Rom. 12:9; 1 Yo. 1:5, 6)
7, 8. Wii khanst tuu raus fine ep etliche ferkniichunge kuut fer tich sin? Mach een ferklaychung.
7 Es kept anere sorte ferkniichunge woo keen net keeche was ti Piipel saat. In soo sorte situatsyoone, mise mer eyerst ferklayche ti aktiwiteet mit was Yeehoowa kefalt, tëm noo te piiplixe funtamente. (Xpr. 4:10, 11) Tan mise mer een ëntxlus mache woo uns mit een sauwer kewise lost. (Kal. 6:5; 1 Tim. 1:19) Wii khene mer tas mache? Tenk mool noo: eep mer etwas nayes ese, fersuuche mer eyerst wise was ti haupste inkretyente sin. Kraat soo, eep mer een ferkniichung raus suuche, mise mer eyerst raus fine was sayn haupste “inkretyente” sin — es wil saan, ep tas kuut fer een krist is. (Ëfe. 5:17)
8 Tsum payxpiil: soo wii fiile layt, fiilaycht host tuu sports kërn. Un es is woer tas ti sports khene kuut fer uns sin. Awer was solst tuu mache wëns tuu een sports kërn host woo wyolënt orer kefeerlich is, orer woo ti layt ausensich wëre wën ti ekip fon sayn lant kewine tuut? Tsiimlich sicher, wëns tuu noo kukst ales was tepay is, tuust tuu raus suuche tiise sports net kuke, wayl es net Yeehoowa kefalt un es xtimt net mit tëm pexeet fon friit un liip woo mer fer ti layt preetiche. (Isa. 61:1; Kal. 5:19-21) Awer wëns tuu tich sicher pist tas ti ferkniichung kuute “inkretyente” hot — es wil saan, Yeehoowa kefalt —, tan es khan kuut fer tich sin. (Kal. 5:22, 23; lees Filiper 4:8.)
Wii fiil tsayt tuun ich mit tiise ferkniichung aus kepe?
9. Was tuut ti antwort fer ti tsweete frooch tsayche?
9 Ti tsweete frooch woo mer uns mache mise is: ‘Wii fiil tsayt tuun ich mit tiise ferkniichung aus kepe?’ Ti antwort fer ti eyerste frooch tsaycht was mer tenke kuut orer xlecht is. Awer unser antwort fer ti tsweete frooch tsaycht was wichtich fer uns is. Soo, wii khene mer wise ep een ferkniichung wichticher fer uns is wii es sol sin?
10, 11. Wii helfe uns Yeesus sayn wërter in Matheus 6:33 ëntxlise wii fiil tsayt mer mit ferkniichung aus kepe sole?
10 Yeesus hot fer sayn nookeener kesaat: “Liip Yeehoowa, tayn Kot, mit tayn kans hërts, mit tayn kans seel, mit tayne kanse ferxtant un mit tayn kans kraft.” (Mar. 12:30) Tes weeche, sol unser liip tsu Yeehoowa tas wichtichste in unser leepe sin. Un meyer tsayche tiise liip wën mer Yeesus sayn wërter aan heere: “Tuut wayter eyerst Kot sayn Raych un sayn kerechtichkheet suuche un tan ale tiise anere tinge wëre aych kep.” (Mat. 6:33) Wii khene tiise wërter uns helfe ferxteen wii wichtich ti ferkniichung fer uns is un wii fiil tsayt meyer too temit aus kepe sole?
11 Mërk mool tas Yeesus kesaat hot tas meyer sole ‘wayter eyerst Kot sayn Raych suuche’. Tee hot net kesaat tas meyer sole wayter ploos Kot sayn Raych suuche. Kewis, Yeesus wust tas mer mise fiil anere tinge uf phase. Tsum payxpiil, meyer mise woonung, ese, tsaych, xuul, aarwayt un ferkniichung hon. Awer unser aarwayt tsu Yeehoowa sol wichticher wii al tiise anere tinge sin. (1 Kor. 7:29-31) Tas wise, sol uns uf muute unser tsayt mit tiise anere tinge penutse soo tas es meechlich wërt uns traan hale aan was tas haupste is: Yeehoowa tiine. Soo, wërt ti ferkniichung kuut fer uns sin.
12. Wii khan te funtament in Lukas 14:28 uns helfe een ferkniichung raus suuche?
12 Tes weeche, eep een ferkniichung raus suuche, mise mer tenke aan wii fiil tsayt wërts neetich fer tas mache. (Luk. 14:28) Tan mise mer raus fine wii fiil tsayt meyer hon fer tiise aktiwiteet mache, oone anere wichtiche tinge uf sayt lose — wii ti Piipel xtutiire, ti familye aanpeetung mache, orer tsu te fersamlunge un ti preetich aarwayt keen. (Mar. 8:36) Wën ti ferkniichung woos tuu raus suuchst tich helfe tuut wayter Yeehoowa froo tiine, tan es wërt een kuut aat fer tayn tsayt penutse.
Mit weem tuun ich mich ferkniiche?
13. Warom mise mer mit acht tenke mit weem mer uns ferkniiche tuun?
13 Ti trite frooch woo mer uns mache mise, is: ‘Mit weem tuun ich mich ferkniiche?’ Tas is wichtich, wayl unser fraaynte khene uns in een kuut orer xlecht aat petrefe. Soo wii een kuute ese xmeke wërt noch peser wën mer mit kuute fraaynte sin, uns ferkniiche wërt aach peser wën mer mit kuute fraaynte sin. Awer tas een ferkniichung kuut sin khan, must tuu eyerst mit acht raus suuche mit weem tuu tas mache tuust. (2 Kro. 19:2; lees Xpriiche 13:20; Tya. 4:4.)
14, 15. (a) Was fer payxpiil hot Yeesus kep wii eyer sayn tichte fraaynte raus kesuucht hot? (b) Was fer frooche iwer unser fraaynte sole mer uns mache?
14 Yeesus sayn payxpiil khan uns helfe unser tichte fraaynte raus suuche. Fom aanfang fon te kriatsyoon aan, hot Yeesus ti mënxe keliipt. (Xpr. 8:31) Wii eyer uf te eyert waar, hot eyer ketsaycht tas tee ale sorte layt keliipt hot. (Mat. 15:29-37) Awer opwool eyer fraayntlich mit ale kaar waar, hot eyer fiil uf kephast wii eyer sayn tichte fraaynte raus kesuucht hot. Yeesus hot fer sayn 11 troye aphostele kesaat: “Teyer sayt mayn fraaynte wën teyer macht was ich aych xike.” (Yoo. 15:14; kuk aach Yoohan 13:27, 30.) Yeesus hot wii sayn tichte fraaynte raus kesuucht ploos tii woo tëm noo kang sin un woo Yeehoowa ketiint hon.
15 Soo, wëns tuu een fraaynt raus suuchst, solst tuu tenke aan was Yeesus kesaat hot. Froo tich: ‘Tuun ti wërter un aktsyoone fon tiise persoon tsayche tas se Yeehoowa un Yeesus aan heert? Soo wii ich, tuut tiise persoon ti piiplixe inlërnunge iwer was richtich un ferkheert is, foliche? Tuut tiise persoon mich helfe wayter troy tsu Yeehoowa plaype un tas Raych im eyerste plats tuun?’ Wëns tuu tich sicher pist tas ti antwort fon tiise frooche “yaa” is, tan host tuu een kuut fraaynt kefun mit weem tuu tich ferkniiche khanst. (Lees Psalm 119:63; 2 Kor. 6:14; 2 Tim. 2:22.)
Is tayn ferkniichung kuut fer tich?
16. Was mise mer iwer unser ferkniichung raus fine?
16 Meyer hon kelërnt tas wën mer wole hon tas een ferkniichung kuut fer uns wërt, mus tas xtime mit was ti Piipel saat in 3 sache. Meyer sole uns selepst frooe: ‘Was fer sort ferkniichung is tas? Wërt tas kuut orer xlecht fer mich sin?’ (Xpr. 4:20-27) ‘Wii fiil tsayt tuun ich too temit aus kepe? Tuun ich soo fiil tsayt too traan aus kepe, tas ich net kenuuch tsayt hon fer mayn aarwayt tsu Yeehoowa?’ (1 Tim. 4:8) ‘Mit weem tuun ich mich ferkniiche? Wërt tiise persoon een kuut orer xlecht fraaynt sin?’ (Ekl. 9:18; 1 Kor. 15:33)
17, 18. (a) Wii khene mer uns sicher sin ep unser ferkniichung xtimt mit was ti Piipel saat? (b) Was pist tuu pextimt se mache?
17 Wën unser ferkniichung net xtime tuut mit kwalkee eene fon tiise 3 sache, tan sole mer tas net mache. Awer wën mer uns sicher sin tas unser ferkniichung xtimt mit was ti Piipel too triwer saat, tan es tuut eer tsu Kot pringe un es wërt kuut fer uns sin. (Psal. 119:33-35)
18 Soo wole mer uns aan xtrenge fer ti richtich sort ferkniichung raus suuche un tas mache in te richtich tsayt un mit te richtiche layt. Yawool, wole mer hërtslich foliche was ti Piipel saat: “Op iir est, orer trinkt, orer sonst etwas macht, macht ales fer Kot sayn hërlichkheet.” (1 Kor. 10:31)
Khanst tuu tas aus leye?
Mit was se tuun hot mit ferkniichung, wii khanst tuu tiise piiplixe funtamente aan wëne?
[Xtuutium frooche]
[Pilt]
(Fer te tekst leese im orixinaal format, kuk ti ausketruktne etitsyoon)
✔Was fer sort?
[Pilt]
(Fer te tekst leese im orixinaal format, kuk ti ausketruktne etitsyoon)
✔Wii fiil tsayt?
[Pilt]
(Fer te tekst leese im orixinaal format, kuk ti ausketruktne etitsyoon)
✔Mit weem?
[Pilt]
Wii khene mer Yeesus noo mache wën mer unser fraaynte un ferkniichunge raus suuche?