1. Was fer notisye iwer ti priiter fon Korinto hon Phaul froo kelos?

 ES WAAR 55 noo Kristus. Te aphostel Phaul waar in Troate kewees, een xtat mit een hafe. Awer eyer khont net noo lose aan te priiter fon Korinto tenke. Een tsayt eente in tiise yoer, is eyer unruych kep wayl eyer tsum wise kriit hot tas es xtrayte tswixich ti priiter fon tiise xtat kep hot. Tan, soo wii een papa woo sich ketanke mit sayn khint macht, hot Phaul een priif kexrip fer tëne aan reete. (1 Kor. 1:11; 4:15) Phaul hat aach sayn mithelfer Titus tsu te kemaynt fon Korinto kexikt. Xpeeter, hot eyer ap kemacht sich mit Titus in Troate trefe. Yets, waar Phaul Titus im Troate am waarte, naykerich fer se wise wiis ti kemaynt in Korinto keet. Es is traurich, awer Titus is net khom. Was teet Phaul mache? Eyer is tsum Mesopotaamya mit een xif kereest. Tat, hot eyer Titus ketrof un is aarich froo kep. Un Titus hat kuute notisye. Eyer hot kesaat tas ti priiter in Korinto ti aanreete fon Phaul sayn priif kuut aan kenom hon un tas se wolte tëm kërn siin. Wii Phaul tas keheert hot, ‘hot eyer sich noch mee kefrayt’. (2 Kor. 2:12, 13; 7:5-9)

2. (a) Was hot Phaul iwer klaape un frooheet fer ti korinter kexrip? (b) Iwer was fer frooche tuun mer in tiise artikel xpreche?

² Khorts tsayt tëm noo, hot Phaul een aner priif fer ti korinter kexikt. Eyer hot fer tëne kexrip: “Meyer sin net ti hëre fon ayre klaape, awer mer sin mitaarwayter fer ayre frooheet, wayl es is weeche ayre klaape tas teyer xteen playpt.” (2 Kor. 1:24) Was wolt Phaul mit tas saan? Un was khene ti elteste hayt mit Phaul sayn wërter lërne?

3. (a) Was wolt Phaul mit tiise wërter saan: “Es is weeche ayre klaape tas teyer xteen playpt”? (b) Wii tuun ti elteste hayt tas payxpiil fon Phaul noo keen?

³ Phaul hot iwer tswaay tinge kexproch woo aarich wichtich in unser aanpeetung sin — klaape un frooheet. Iwer te klaape, hot eyer soo kexrip: “Meyer sin net ti hëre fon ayre klaape, (...) wayl es is weeche ayre klaape tas teyer xteen playpt. Mit tiise wërter, hot Phaul erkhënt tas ti priiter in Korinto troy waare weeche sayn aychne klaape aan Kot, net weeche Phaul orer anere persoone. Soo, hot Phaul net ketenkt tas es neetich weyer te klaape fon te priiter kontroliire, un eyer wolt tas kaar net mache. Phaul hot ketraut tas se troy waare un wolte tas richtiches mache. (2 Kor. 2:3) Hayt, tuun ti elteste tas payxpiil fom Phaul noo keen. Tii traue aan te priiter sayn klaape un tas se te richtich muut hon fer Kot tiine. (2 The. 3:4) Xtats tsu xtrame reekele fer ti kemaynt xtele, tuun ti elteste traue aan te aanreete fon te Piipel un aan te oryentiirunge fon Yeehoowa sayn Orkanisatsyoon. Ti elteste hayt sin aach net ‘hëre’ fon te priiter sayn klaape. (1 Phe. 5:2, 3)

4. (a) Was wolt Phaul mit tiise wërter saan: ‘Meyer sin mitaarwayter fer ayre frooheet’? (b) Wii tuun ti elteste hayt tas payxpiil fon Phaul noo mache?

⁴ Phaul hot aach kesaat: ‘Meyer sin mitaarwayter fer ayre frooheet.’ Too hiir, hot Phaul iwer sich selepst kexproch un aach iwer ti priiter woo tëm ticht mit keholef hon. Warom khene mer tas saan? Wayl, in tëm selwich priif woo Phaul fer ti korinter kexrip hot, hot eyer iwer tswaay fon tiise mithelfer kexproch: “Kot sayn Soon, Yeesus Kristus, woo meyer — es wil saan, ich, Silwano un Timoteus — unich aych kepreeticht hon.” (2 Kor. 1:19) Un noch, yeetes mool woo Phaul tas wort “mitaarwayter” in sayn priife penutst hot, hot eyer iwer sayne tichter mithelfer kexproch, wii Apolo, Akila, Priska, Timoteus, Titus un anere. (Rom. 16:3, 21; 1 Kor. 3:6-9; 2 Kor. 8:23) Tes weeche, mit te wërter ‘meyer sin mitaarwayter fer ayre frooheet’, hot Phaul ti korinter sicher kelos tas eyer un sayn mithelfer wolte ales was se khente mache fer ti frooheet unich ti priiter fon te kemaynt ferxtërke. Ti elteste hayt se taach hon te selwich wunx. Tii wole mache ales was se khene fer sayn priiter helfe ‘Yeehoowa mit frooheet tiine’. (Psal. 100:2; Fili. 1:25)

5. Was tuun mer in tiise artikel noo kuke, un aan was sole mer triwer noo tenke?

⁵ Khërtslich, hon se tiise frooch fer een krup fon flaysiche priiter un xwestere fon unerxiitliche pletse fon te welt kemacht: “Was hot een elteste kemacht orer kesaat woo tayn frooheet ferxtërkt hot?” Wole mer yets ti antwort fon tiise krup siin. Ferklaych tëne sayn antworte mit was tuu antworte teest, un tenk triwer noo aan was tuu mache khanst fer ti frooheet in tayn kemaynt ferxtërke. *

6, 7. (a) In was fer aate khene ti elteste Yeesus, Phaul un anere Kot sayn tiiner noo mache? (b) Warom ti naame fon te priiter un xwestere erinere, ferxtërkt tëne sayn frooheet?

⁶ Fiile priiter un xwestere hon kesaat tas was tëne sayn frooheet ferxtërkt, is wën ti elteste perseenlich interes aan tëne tsayche tuun. Eene fon te haupste aate fer tas se mache, is ti payxpiile fon Tawi, Eliuu un Yeesus noo mache. (Lees 2 Samuël 9:6; Yoop 33:1; Lukas 19:5.) Tiise tray mëner hon perseenlich interes ketsaycht wii se ti layt mit tëne sayn naame pekriis hon. Phaul hot erkhënt tas es wichtich is ti naame fon te priiter un xwestere erinere un penutse. Am ën fon sayn priif fer ti priiter in Roma, hot eyer mee wii 25 priiter un xwestere mit tëne sayn naame pekriis. Tsum payxpiil, hot eyer kexrip: “Kriise fer unser keliipte Përsite.” (Rom. 16:3-15)

⁷ Fer etliche elteste, is es xweyer ti naame fon te priiter un xwestere erinere. Awer wën se sich aan xtrenge fer tas mache, is es wii wën se fer yeete pruuter orer xwester saan teete: ‘Tuu pist wichtich fer mich.’ (Eeks. 33:17) Ti priiter un xwestere tuun sich aarich fraye wën ti elteste tëne mit sayn naame ruufe fer een antwort kepe im Wachthorm xtuutyum orer in anere fersamlunge. (Kuk Yoohan 10:3.)

8. In was fer wichtich aat hot Phaul tas payxpiil fon Yeehoowa un Yeesus noo kemacht?

⁸ Phaul hot aach perseenlich interes aan te anere ketsaycht wii eyer tëne eerlich keloopt hot, un tas is een aner wichtich aat woo ti frooheet fon unser priiter ferkreest. Soo, in sayn tsweete priif fer ti priiter in Korinto, hot Phaul ketsaycht te wunx woo eyer hat fer ti frooheet fon sayn priiter ferkreese. Eyer hot kexrip: “Ich sin aarich froo weeche aych.” (2 Kor. 7:4) Tiise loop hot sicher ti korinter aarich uf kemuut. Phaul hot eenliche xpiirunge fer anere kemaynte ketsaycht. (Rom. 1:8; Fili. 1:3-5; 1 The. 1:8) Noo eyer iwer Përsite kexproch hot, hot Phaul noch in sayn priif fer ti kemaynt in Roma kexrip: ‘Tii hot flaysich im Hër kexaft.’ (Rom. 16:12) Tiise loop hot sicher tiise troy xwester kans uf kemuut! Wii Phaul ti priiter un xwestere keloopt hot, hot eyer tas payxpiil fon Yeehoowa un Yeesus noo kemacht. (Lees Markus 1:9-11; Yoohan 1:47; Apo. 2:2, 13, 19)

9. Warom loope kepe un kriin, tuut ti frooheet in te kemaynt ferkreese?

⁹ Ti elteste hayt wise aach tas es wichtich is ti priiter loope. (Xpr. 3:27; 15:23) Wën ti elteste tas mache, es is wii wën se fer yeete pruuter orer xwester saan teete: ‘Ich hon kemërkt was tuu kemacht host. Ich khimere mich mit tich.’ Mit sicherheet, unsere priiter un xwestere prauche ufmuutiche wërter fon te elteste heere. Een xwester woo mee wii 50 yoore hot, hot kesaat was fiile priiter un xwestere eenlich tenke. Tii hot kesaat: “In mayn aarwayt, ich tuun neekst nii een loop kriin. Mayn koleke sin khalt un wole imer peser wii ti anere sin. Tan, wën een elteste mich loopt weeche etwas woo ich fer ti kemaynt kemacht hon, tas is soo ufmuutich, tas tuut mich soo fiil ferxtërke! Ich xpiire tas mayn himlixe Fater mich liipt.” Khorts tsayt tsurik, hot een elteste uf muutiche wërter kesaat fer een fater woo sayn tswaay khiner aleen kroos tsiit. Wii hot tiise fater sich kexpiirt. Eyer hot kesaat: “Ti wërter fon tiise elteste hot mich fiil uf kemuut!” Oone tswayfel, wën ti elteste eerliche loope fer ti priiter kepe, tuut tas ti priiter fiil uf muute un tëne sayn frooheet ferkreese. Un tas tuut mee kraft fer ti priiter kepe tas se khene wayter uf tëm weech fom leepe laafe ‘oone miit wëre’. (Isa. 40:31)

10, 11. (a) Wii khene ti elteste tas payxpiil fon Neemias noo mache? (b) Was tuut ti elteste helfe een kaystlich kexenk kepe in te ufmuutiche pesuuche?

¹⁰ Een aner ekstra aat woo ti elteste perseenlich interes fer ti priiter un xwestere tsayche khene un woo tëne sayn frooheet ferkreese khan, is tas: Te eyerst xrit mache fer acht kepe fer tii woo prayche uf kemuut wëre. (Lees Aphostele sayn Kexicht 20:28.) Wën ti elteste tas mache, tuun se ti kaystliche xeefer fon friier noo mache. Tsum payxpiil, te troye superintentent Neemias hot kemërkt tas etliche fon sayn yiitixe priiter in kaystlich aat xwach kep sin. Was hot eyer kemacht? Ti Piipel saat tas eyer ‘is klaych kang’ un hot se uf kemuut. (Nee. 4:14) Ti elteste hayt, wole tas selwich mache. Tii tuun ‘klaych keen’ es wil saan te eyerst xrit kepe fer ti priiter un xwestere helfe fest im klaape plaype. Fer tas mache, tuun se ti priiter un xwestere in sayn hayser pesuuche wën es meechlich is. In tiise ufmuutiche pesuuch, tuun se fer tëne ‘een kaystliche kexenk kepe’. (Rom. 1:11) Was tuut ti elteste helfe tas hin kriin?

¹¹ Eep een ufmuutiche pesuuch mache, mus te elteste sich tsayt hoole fer aan te persoon woo eyer pesuucht tenke un sich frooe: “Was fer sin sayn xwiirichkheete? Was khan ich saan fer tee uf muute? Was fer tekst orer kexicht fon te Piipel teet kuut fer tiise persoon phase?” Wën te elteste sich soo foer perayt, tuut eyer een interesant un nutslich kexpreech mit te persoon mache. In tiise pesuuch, tuun ti elteste lose tas ti priiter sich fray xpiire fer sayn hërts uf mache un tuun se tëne mit acht heere. (Tya. 1:19) Een xwester hot kesaat: “Es is soo kuut wën ti elteste uns mit acht heere.” (Luk. 8:18)

12. Weer praycht in te kemaynt uf kemuut wëre un warom?

¹² Weer tuut nutse kriin fon te ufmuutiche pesuuche? Phaul hot ti elteste aan kereet tas se solte sayn ‘acht hale iwer ti kans trop xeef’. Sicher, al in te kemaynt prayche uf kemuut wëre, too tepay ti speryente puplikatoore un pyoneere woo xon torich fiile yoore Yeehoowa troy tiine tuun. Warom prayche tiise priiter unerxtitsung fon kaystliche xeefer? Wayl, als mool tiise priiter woo kaystlich xtark sin, tuun aach xpiire tas se neekst net mee ti unertrikung fon tiise xlecht welt aus hale khene. Fer se ferxteen warom tiise xtarke priiter als mool hilef fon te elteste prayche, wole mer een situatsyoon kuke woo Tawi in sayn leepe mit kemacht hot.

13. (a) Wan hot Ispi-Penop fersuucht Tawi um pringe? (b) Warom khont Apisay Tawi rete?

¹³ Khorts tsayt noo tas te yung Tawi wii kheenich iwer Israël kesalpt kep is, hot eyer keeche Kolias kekhëmpft, eene fon te refaiiner, layt woo iwer kroos waare. Mit koraaj, hot Tawi tiise iwer kroose man um keprung. (1 Sam. 17:4, 48-51; 1 Kro. 20:5, 8) Yoore xpeeter, in een khampf keeche ti filisteer, must Tawi noch mool keeche een iwer kroose man khëmpfe. Tiise man is aach fon te refaiiner khom un sayn naame waar Ispi-Penop. (2 Sam. 21:16; noote) Toch, in tiise mool, es is Tawi woo neekst um keprung kep is. Warom? Es waar net wayl Tawi sayn koraaj ferloer hat, awer es waar weeche sayn kraft. Ti Piipel saat tas Tawi “kaput miit kep is”. Wii Ispi-Penop kemërekt hot tas Tawi khee kraft mee hat, ‘wolt eyer Tawi um pringe’. Awer tan, wii eyer neekst fërtich waar fer Tawi mit sayn lants torich xteche, ‘is Apisay, Seruya sayn soon, klaych khom fer Tawi rete. Eyer hot te filisteer atakiirt un um keprung’. (2 Sam. 21:15-17) Tawi is in te letst momënt keret kep! Sicher, is Tawi aarich petanklich kep, weeche Apisay sayn acht aan tëm kehal hot un klaych khom is wii Tawi sayn leepe ins kefoer waar. Was khene mer mit tiise kexicht lërne?

14. (a) Wii khene mer propleeme iwerkhome woo iwer kroos wii Kolias sin? (b) Wii khene ti elteste anere helfe kraft un frayt wiiter kriin? Kep een payxpiil.

¹⁴ Uf te kans welt, tuut Yeehoowa sayn folek sayn tiinst mache, opwool ti xwiirichkheete woo Satanaas un sayn sisteem fer tëne pringe tuun. Etliche fon uns tuun iwer kroose kefoore mit mache, woo wii “Kolias” sin. Awer, mit kans fertraue uf Yeehoowa, tuun mer se iwerkhome. Toch, wayl mer yeete taach keeche ti unertrikung fon tiise welt khëmpfe mise, khene mer als mool miit un oone muut wëre. Wën mer uns soo xpiire, kepe mer xwach un khene mer laycht ap kewun wëre fon te propleeme woo mer, in een normaal situatsyoon, iwerkhome teete. Ti unerxtitsung fon te elteste khan uns helfe unser kraft un frayt wiiter kriin, soo wii fer fiile priiter un xwestere xon pasiirt is. Een pyoneerin mit mee wii 60 yoore hot kesaat: “Torich een tsayt, hon ich mich net mee kuut kefun, un ti preetich aarwayt hot mich kaput miit kelos. Een elteste hot kemërkt tas ich khee kraft mee hat un hot mich kefroot wii ich traan waar. Meyer hon een ufmuutich kexpreech iwer een kexicht fon te Piipel kehat. Ich sin te elteste sayn aanreete noo kang, un tas hot mich fiil keholef.” Tii hot noch kesaat: “Ich sin aarich petanklich tas tiise elteste hot acht iwer mich kehalt un hot mich keholef!” Es is een seechen fer uns liipliche elteste hon woo sich mit uns ketanke mache, un soo wii Apisay, sin fërtich fer uns helfe.

15, 16. (a) Warom hon ti priiter Phaul fiil keliipt? (b) Warom liipe mer unser weyertliche elteste?

¹⁵ Ti elteste mise xtram xafe fer ti kemaynt wii xeefer uf phase. Als mool, plaype ti elteste een kans nacht wach wayl se sich mit te priiter ketanke mache un tuun fer tëne peete, orer tuun tëne in kaystlich aat uner xtitse. (2 Kor. 11:27, 28) Noch soo, tuun ti elteste mit frayt sayn flichte uf phase. Tii mache es soo wii Phaul, woo fer ti priiter in Korinto kexrip hot: “Ich wil mich kërn fer aych aus kepe un ich tuun mich fer aych kans aus kepe.” (2 Kor. 12:15) Oone tswayfel, es waar weeche ti liip tsu sayn priiter tas Phaul ‘sich kans aus kep hot’ fer tëne ferxtërke. (Lees 2 Korinter 2:4; Fili. 2:17; 1 The. 2:8) Meyer tuun uns net ferwunere warom ti priiter Phaul soo fiil keliipt hon! (Aph. 20:31-38)

¹⁶ Wii Kot sayn tiiner, liipe mer aach unser weyertliche elteste, un sicher, wole mer tëne in unsere kepeete tepay tuun un Yeehoowa tanke weeche tiise kexenk. Ti perseenlich interes woo ti elteste fer uns tsayche, tuut unser frayt ferkreese, un sayn ufmuutiche pesuuche tuut uns ferxtërke. Un noch, meyer sin aarich petanklich tas se imer fërtich sin fer uns helfe wën mer uns traurich xpiire weeche ti unertrikung fon tiise welt. Yaa, unser wachsame elteste sin wërklich ‘mitaarwayter fer unser frooheet’.