“KEE HËM, tsu tayn parente, un fertseel tëne ales was Yeehoowa fer tich kemacht hot, un ti parmhërtslichkheet woo Eyer fer tich ketsaycht hot” — hot Yeesus Kristus kesaat fer eene man woo tëm sayn nookeener sin wolt. In tiise momënt, waar Yeesus woerxaynlich in te rechyoon fon Katara, im siitëst fom Kalileya meer. Yeesus sayn wërter hon ketsaycht tas eyer een natiirlich karakteristik fon te mënxe ferxtan hot: te wunx fer iwer wichtich un interesante sache mit te parente xpreche. (Mar. 5:19)

Hayt, khene mer tiise karakteristik in te kanse kultuure siin, aach wën tas in etliche kultuure taytlicher wii in anere is. Wën een persoon aan fangt te woere Kot, Yeehoowa, se tiine, wil se aach sayn naye klaape mit sayn parente teele. Awer, was fer is ti pest aat fer tas mache? Wii khene mer tas hërts aan krayfe fon parente woo een aner relichyoon hon, orer woo net aan Kot klaape? Ti Piipel kept uns aanreete woo positiiw un praktix sin.

Im eyerst yoer hunert, waar Antrë eene fon te eyerste layt woo Yeesus wii te Mesias erkhënt hot. Un fer weem hot eyer tas klaych fertseelt? Ti Piipel saat: “Tee [Antrë] hot eyerst sayn pruuter Simon [Pheeter] aan ketrof un hot tëm kesaat: ‘Meyer hon te Mesias kefun’ (woo wii Kristus iwersetst is).” Tan, hot Antrë Pheeter tsu Yeesus kenom un tas hot fer Pheeter ti keleechenheet kep fer een tisipel fon Yeesus wëre. (Yoo. 1:35-42)

Unkefeer seks yoore tëm noo, wii Pheeter in Yop waar, is eyer in kelaat kep fer noo Sesarëya reese. Tat, solt eyer Kornëlyus, een xëf fon te militeer, pesuuche. Weer waar tat wii Pheeter tat hin khom is? Ti Piipel saat: “Kornëlyus waar natiirlich tëne am waarte [Pheeter un tii woo mit tëm waare] un hat sayn parente un tichter froynte fersamelt.” Soo, hot Kornëlyus fer sayn parente ti keleechenheet kep fer Pheeter heere, un tan, khonte se raus suuche op se klaape teete orer net aan was Pheeter kesaat hot. (Aph. 10:22-33)

Was khene mer mit Antrë un Kornëlyus lërne iwer wii se mit sayn parente um kang sin?

Khee eene fon te tswaay hot tiise sache fer ti anere kelos. Antrë hot Pheeter fer Yeesus perseenlich pekhant kemacht. Kornëlyus hot sayn parente tsu sayn haus in kelaat fer Pheeter heere. Awer tii hon net sayn parente uner trikt orer influentsiirt tas se Yeesus sayn nookeener wëre. Fiilaycht, khene mer mit unser parente iwer ti Piipel fertseele, orer khene mer tëne keleechenheete kepe tas se khene ti woerheet heere un mit te priiter fon te kemaynt fertseele. Awer meyer wole tëne sayn frayheet fer raus suuche respektiire, un aach net fersuuche tëne uner trike. Yets, wole mer tas payxpiil fon Jürgen un Petra, een pheyerche fon Taytxlant, siin. Tëne sayn payxpiil tuut uns tsayche wii mer unser parente helfe khene.

Petra hot ti Piipel mit Yeehoowa sayn Tsayer xtutiirt un hot sich taafe kelos. Sayn man, Jürgen, waar een xëf fon te militeer. Am aanfang, hot eyer ti rausuuchung fon Petra net kuut kefun. Awer, mit te tsayt, hot eyer kemërekt tas Yeehoowa sayn Tsayer ti woerheet fon te Piipel preetiche. Weeche tas, hot eyer aach sayn leepe fer Yeehoowa kep, un hayt, is eyer een elteste in een kemaynt. Was fer aanreet kept Jürgen iwer wii khene mer tas hërts aan krayfe fon parente woo een aner klaape hon?

Jürgen saat: “Meyer sole net unser parente tswinge mit uns iwer ti Piipel fertseele, un aach net tsu fiile tinge ufm mool iwer piiplixe sache xpreche. Soo, teete mer een mauer paue woo imer prayter wëre teet. Fiilaycht, weyer es peser ap un tsu un mit kexik iwer ti woerheet fertseele.” Eyer saat noch: “Was aach helfe tuut, is een parent perseenlich pekhant mache fer een pruuter orer een xwester fon te kemaynt woo te selwich elter orer eenliche interese hon. Tas khan een kroos unerxiit mache.”

Wii Pheeter un Kornëlyus sayn parente kontakt mit te woerheet kriit hon, hon se ti pexeet fon te Piipel klaych aan kenom. Awer anere layt fom eyerst yoer hunert praychte mee tsayt hon fer een ëntxlus mache.

Torich ti tsayt woo Yeesus kepreeticht hot, hon etliche fon sayn parente aan tëm keklaapt. Tsum payxpiil, is es meechlich tas ti aphostele Tyako un Yoohan waare Yeesus sayn primos kewees, un tëne sayn muter, Salomë, waar Yeesus sayn thante kewees. Salomë waar fiilaycht eene unich ti “fiile anere fraae” woo Yeesus un ti aphostele mit sayn aychne tinge keholef hon. (Luk. 8:1-3)

Uf ti aner sayt, anere fon Yeesus sayn parente hon net klaych aan tëm keklaapt. Tsum payxpiil, mee wii een yoer noo Yeesus sayn taaf, hon etliche layt sich kesamelt fer tëm heere. Awer wii Yeesus sayn parente “keheert hon was am pasiire waar, sin se tat hin kang fer tëm hoole, wayl tii kesaat hon: ‘Tee is ferikt kep.’” Een tsayt tëm noo, wii Yeesus sayn xtif priiter tëm kefroot hon woo eyer hin reese teet, hot Yeesus tëne net een taytlich antwort kep. Warom net? Wayl ‘sayne priiter net aan tëm keklaapt hon’. (Mar. 3:21; Yoo. 7:5)

Was khene mer lërne mit te aat wii Yeesus mit sayn parente um kang is? Wii etliche fon tëne kesaat hon tas Yeesus ferikt kep is, hot eyer sich net pelaytich kexpiirt. Aach noo sayn toot un ufxtaye, hot Yeesus sayn parente uf kemuut. Eyer is tsu sayn xtif pruuter, Tyako, tsum foer xayn khom. Tas hot woerxaynlich keholef tas Tyako un ti anere xtif priiter fon Yeesus tëm wii te Mesias erkhëne khente. Es is weeche tas tas se nochter mit te aphostele un anere tisipele in te xtup tsimer in Yeruusalem waare, woo se tsiimlich sicher te hayliche kayst kriit hon. Mit te tsayt, Tyako un Yuutas, een aner xtif pruuter fon Yeesus, hon kroose priwilëje kriit. (Aph. 1:12-14; 2:1-4; 1 Kor. 15:7)

Soo wiis im eyerst yoer hunert pasiirt is, hayt se taach, prayche etliche parente aach mee tsayt fer aan se fange uf tëm weech fom leepe keen. Kuk tas payxpiil fon Roswitha. Tii waar een flaysich katoolix fraa kewees, fest in sayn klaape. In 1978, wii sayn man sich wii een Yeehoowa sayn Tsayer taafe kelos hot, waar Roswitha tekeeche. Awer, mit te yoore, hot se sayn mënung keënert un hot kemërekt tas Yeehoowa sayn Tsayer ti woerheet in lërne. Tan, in 2003, hot se sich aach taafe kelos. Was hot Roswitha keholef tiise ënerung mache? Sayn man hot sich net pelaytich kexpiirt wayl se, am aanfang, tekeeche waar. Eyer hot aach keleechenheete fer tëne kep tas se sayn mënung ënere khent. Was fer aanreet kept Roswitha fer uns hayt? Tii saat: “Een tings woo ti unerxiit mache khan, is: ketult, ketult un noch mee ketult.”

Kuk een aner payxpiil. Monika hot sich in 1974 taafe kelos, un 10 yoore xpeeter, hon sayn tswaay khiner sich aach taafe kelos. Sayn man, Hans, hat sich nii keeche ti woerheet kextelt, awer eyer hot sich ploos in 2006 taafe kelos. Wën Monika sayn familye tsurik kukt, was fer aanreet tuun se kepe? Tii hon kesaat: “Playp imer leaal tsu Yeehoowa un tuu nii noo kepe in sache woo mim klaape se tuun hon.” Monika un sayn khiner hon aach imer ketsaycht tas se Hans fiil keliipt hon. Un noch, tii hon nii sayn hofnung ferloer tas, eene taach, teet Hans ti woerheet aan nëme.

Yeesus hot een mool ti pexeet fon te woerheet ferklaycht mit waser woo eewiches leepe kept. (Yoo. 4:13, 14) Meyer wole tas unsere parente fon tiise friix un phuer waser fon te woerheet trinke. Sicher, meyer wole net tas se tsu fiil waser ufm mool trinke, wën net, khente se sich “ferxlike”. Op se tas waser kërn hon orer net, hëngt fiil too tefun ap wii mer unser klaape fer tëne aus leye. Ti Piipel saat tas “tas hërts fom kerechter tenkt triwer noo eep es een antwort kept” un saat aach tas “tas hërts fom kluuche mënx kept fer sayn maul ferxtëntnis, un kept aach fer sayn wërter ti macht fer ti anere in reete”. Wii khene mer tiise aanreete aan wëne? (Xpr. 15:28; 16:23)

Wole mer uns foer xtele tas een fraa sayn klaape fer sayn man aus leye wil. Wën se ‘triwer noo tenkt eep se een antwort kept’, khan se mit kexik ti wërter raus suuche, xtats saan tas eyerst tings woo in sayn khop khomt. Tii sol net aus siin mache tas tii mee khëntnis hot un ti “hërin fon te woerheet is”. Wën se sayn wërter kuut raus suucht, khan tii sayn man uf muute un te friit hale. Tii khan tiise frooche fer sich mache: ‘Wan is mayn man mee in ruu un wilich fer se xpreche? Iwer was fer sache tuut eyer kërn fertseele orer leese? Tuut eyer sich fer syens, politik orer sport interesiire? Wii khan ich tëm naykerich lose fer iwer ti Piipel fertseele un in te selwich tsayt tëm sayn xpiirunge un mënunge respektiire? Aan tiise tinge traan tenke, khan ti fraa helfe xpreche un sich aan xtele in een aat woo tas hërts fon sayn man aan krayft.

Fer tas hërts fon unsere parente aan krayfe, is es net kenuuch ploos lamsam unser klaape fer tii aus leye. Was meyer saan, sol aach xtime mit wii mer uns aan xtele.

Jürgen, fon tëm mer eente xon kexprooch hon, hot kesaat: “Tuu yeete taach ti aanreete fon te Piipel aan wëne. Tas is een wichtich aat woo khan mache tas een parent tayn ënerunge mërkt, aach wën eyer net tas fer ti anere saat.” Hans, woo unkefeer 30 yoore noo sayn fraa sich ketaaft hot, hot was eenliches kesaat: “Es is aarich wichtich tas tayn aanxtelung mit te Piipel xtimt. Soo, khan tayn parent siin wii kuut es is noo ti woerheet leepe.” Wii xeen wën unsere parente khene siin tas meyer weeche unser klaape anerste wii ti anere sin in een positiiw aat.

Te aphostel Pheeter hot tiise weyertliche aanreete kexrip, fer fraae woo sayn mëner een aner klaape hate: “Tuu, fraa, tuu ti autoriteet fon tayn man respektiire, soo, wën tee net tas wort aan heert, khan tee oone wërter kewun wëre, torich ti aat wii sayn fraa sich aan xtelt, wayl tee mit sayn aychne aue kesiin hot wiis tuu tich ferninftich un mit tiife respëkt aan xtelst. Ayre xeenheet sol net aus weenich sin, wii mit keflechte hoer, koltne xmuke orer faynes tsaych, awer solt te inerliche mënx fom hërts sin, een xeenheet woo fer imer halt woo khomt fon een ketultich un tsaam kayst, woo fiil weyert foer Kot sayn aue hot. (1 Phe. 3:1-4)

Pheeter hot taytlich kelos tas ti kuut aanxtelung fon te fraa khan helfe tas te man ti woerheet aan nëmt. Mit tiise aanreet in unser ketanke, wole mer yets iwer unser xwester Christa xpreche. Tii hot sich in 1972 taafe kelos. Fon ti tsayt aan, tuut se sich aan xtrenge tas hërts fon sayn man aan krayfe. Opwool eyer ti Piipel xon xtutiirt hot, hot eyer noch net ëntxlos Yeehoowa tiine, awer eyer tuut etliche fersamlunge pesuuche un tuut sich mit te priiter kuut kepe. Tii priiter tuun sayn frayheet fer raus suuche respektiire. Wii tuut Christa fersuuche tas hërts fon sayn man aan krayfe?

Christa saat: “Ich sin pextimt imer uf Yeehoowa sayn weeche keen. In te selwich tsayt, tuun ich fersuuche mayn man ‘oone wërter’ kewine torich mayn kuut aanxtelung. Wëns net keeche ti printsiipye fon te Piipel keet, tuun ich imer fersuuche mayn man pay xteen. Un natiirlich, tuun ich tëm sayn fraye wile respektiire un ti sache in Yeehoowa sayn hënt lose.”

Tas tsaycht wii wichtich es is wilich sin fer sich aan phase. Christa halt sich een kuut kaystlich rotiin, tepay, tuut se reeklich in te fersamlunge un in te preetich keen. Awer tii tuut aach net ferkese tas sayn man tas recht hot fer sayn liip, tsayt un acht kriin. Meyer al sole wilich sin fer uns aan phase un ferxtëntnis tsayche fer unsere parente woo een aner klaape hon. Tii Piipel saat soo: “Fer ales kepts een richtich tsayt.” Too tepay is ti tsayt woo meyer fer unser familye aus kepe, haupst, mit unser man orer fraa woo een aner klaape hot. Wën mer tsayt mitsamer fertraype, khan tas uns uf muute een kuut komunikatsyoon hale. Fiile speryense tsayche tas een kuut komunikatsyoon hale, tuut helfe tas se sich net aleen orer uf sayt kelos xpiire orer ayfersichtich wëre. (Ekl. 3:1)

Holger sayn fater hot sich 20 yoore xpeeter wii ti anere fon te familye taafe kelos. Holger hot kesaat: “Es is aarich wichtich tsayche tas mer unser parente liipe un fer tëne peete tuun.” Christa, fon tii mer eente xon kexprooch hon, hot noch kesaat: “Ich tuun nii ti hofnung ferliire tas eene taach, tuut mayne man ti woerheet aan nëme un Yeehoowa tiine.” Wën mer ti hofnung net ferliire, tuut tas uns helfe imer een positiiw atituut iwer unser parente hon.

Unser opjetiiw is tas mer uns kuut mit unsere parente kepe. Soo, khene mer es tëne laychter lose tas se ti woerheet erkhëne un tas se sayn hërts fer ti pexeet fon te Piipel uf mache. Un in ales was mer mache, sole mer uns “imer mit tsaamheet un tiif respëkt” aan xtele. (1 Phe. 3:15)