1, 2. Iwer was fer xtrayte xprecht Xeenesis un warom khene tiise kexichte uns helfe?

 HOST tuu xon ketenkt iwer ti xtrayte woo in te Piipel foer khome? Kuk mool noo ploos ti eyerste kapitele fon Xeenesis. Kayn hot Apël um keprung (Xee. 4:3-8); Lamëk hot eene yunge man um keprung wayl eyer tëm kexlaa hot (Xee. 4:23); Apraham sayn xeefer hon mit Lot sayn xeefer ketsënkt (Xee. 13:5-7); Akar hot Sara mit khee respekt pehantelt un tes weeche is Sara pees mit Apraham kep (Xee. 16:3-6); Ismaël hat propleeme mit ale kaar un ale layt hate propleeme mit tëm. (Xee. 16:12)

² Warom xprecht ti Piipel iwer soo sorte xtrayte? Een uersach is wayl es helft imperfekte mënxe ferxteen warom mise se te friit hale. Es tsaycht uns aach wii mer tas mache khene. Es pringt nutse fer uns piiplixe kexichte leese iwer layt woo soo wii uns sin, mit propleeme soo wii unseres. Tëne sayn payxpiil khan uns in lërne was mer sole mache un net mache wën mer eenliche situatsyoone mit leepe. (Rom. 15:4)

3. Was fer frooche tuun mer in tiise artikel antworte?

³ Warom mise Yeehoowa sayn tiiner ti propleeme woo se mit anere hon, resolwiire? Wii khene se tas mache? Was fer piiplixe funtamente khene tëne helfe ti propleeme resolwiire un te friit mit te anere un mit Yeehoowa hale? Te artikel tuut tiise frooche antworte.

4. Was fer aanxtelung siin mer iweraal uf te welt un was fer is te resultaat too tefun?

⁴ Satanaas is te haupste xultner hinich ti xtrayte un propleeme fon te mënxe. Im Eetem kaate, hot eyer kesaat tas yeete persoon khan un sol ëntxlise was kuut un xlecht is, ekaal was Kot tenkt. (Xee. 3:1-5) Es is laycht se siin te resultaat fon tiise aat fer se tenke. Ti welt is fol layt woo wole selepstxtëntich sin un tes weeche wëre se hoochmuutich, ekoiistix un wole peser wii ti anere sin. Yeete persoon woo sich soo aan xtelt, is am aan nëme ti aat fer se tenke fon Satanaas — tas es peser is ploos aan sich selepst tenke, ekaal wii ti anere petrof wëre. Soo een sort ekoiistix mënung nëmt tsu xtrayte. Un es is kuut uns erinere: “Weer laycht pees wërt, tuut xtrayte uf hetse; un weer een wuutich personaliteet hot, tuut fiil feeler mache.” (Xpr. 29:22)

5. Wii hot Yeesus ti layt in kelërnt ti propleeme resolwiire?

⁵ Was Yeesus in kelërnt hot waar kans anerste. Tee hot ti layt uf kemuut friit suuche, soo kaar wëns aus siin teet tas se net nutse too temit kreechte. In sayn Përich Preetich, hot Yeesus kuute aanreete kep iwer wii mit propleeme um keen orer sache resolwiire woo khene tsu xtrayte nëme. Tsum payxpiil, tee hot sayn tisipele uf kemuut tsaam un friitxafer sin. Tee hot se aach uf kemuut ti xpiirunge woo wuut uf hetse, uf sayt lose, ti propleeme fiks resolwiire un sayn faynte liipe. (Mat. 5:5, 9, 22, 25, 44)

6, 7. (a) Warom is es wichtich ti propleeme mit te anere klaych resolwiire? (b) Was fer frooche sole meyer al uns mache?

⁶ Unser aanxtrengung fer Kot tiine — torich kepeete, fersamlunge, preetich aarwayt un anere tinge — is umsonst wën mer net te friit mit te anere hale. (Mar. 11:25) Meyer khene net Kot sayn fraaynte sin wën mer net wilich sin fer ti anere sayn feeler fertsaye. (Lees Lukas 11:4; Ëfeser 4:32.)

⁷ Meyer sole uns nii ferkese wii wichtich es is ti anere fertsaye un friit mit tëne hale. Tuust tuu tayn priiter un xwestere krooshërtslich fertsaye? Tuust tuu kërn mit tëne plaype? Yeehoowa waart tas sayn tiiner ti anere fertsaye. Wëns tuu mërkst tas tuu tich in tiise phunkt ferpesere khanst, ferlang Kot sayn hilef im kepeet fer tas hin kriin. Unser himlixe Fater tuut soo sorte teemuutiche kepeete heere un antworte. (1 Yo. 5:14, 15)

8, 9. Was sole mer mache wën yemant uns pelayticht?

⁸ Wayl al ti mënxe imperfekt sin, friier orer xpeeter tuut yemant etwas saan orer mache woo tich pelayticht. Meyer khene net too tefun aus rayse. (Ekl. 7:20; Mat. 18:7) Tan wii tuust tuu tich aan xtele? Kuk mool was in te neekst situatsyoon pasiirt is. In een festche, hot een xwester mit 2 priiter fertseelt. Eene fon te priiter hot sich pelayticht weeche ti aat wii ti xwester mit tëm kexproch hot. Wii ti 2 priiter aleen waare, hot te pruuter woo sich pelayticht kexpiirt hot, aan kefang xlecht iwer ti xwester xpreche. Awer te aner pruuter hot tëm erinert tas ti xwester hat xon Yeehoowa troy ketiint torich 40 yoore, opwool ti xwiirichkheete. Tee waar sich sicher tas ti xwester tëm net pelaytiche wolt. Te eyerste pruuter hot een pisye ketenkt un tan kesaat: “Tuu host recht.” Soo is te propleem resolwiirt kep.

⁹ Was tsaycht tiise speryens? Tuu khanst ëntxlise was se mache wëns tuu tenkst tas yemant tich pelayticht hot. Een liiplich persoon macht sich net ketanke weeche ti kleene feeler fon te anere. (Lees Xpriiche 10:12; 1 Pheeter 4:8.) Fer Yeehoowa, “es is xeen [wëns tuu] ti pelaytichung torich keen lost”. (Xpr. 19:11; Ekl. 7:9) Soo tas eyerste tings woos tuu tich frooe solst wën yemant tich xlecht orer oone respekt pehantelt, is: ‘Khan ich tas ferkese? Mus ich mich wërklich ketanke too triwer mache?’

10. (a) Wii hot een xwester sich aan kextelt wii se kritikiirt waar? (b) Wii hot Matheus 6:1-4 tiise xwester keholef sayn inerlich friit hale?

¹⁰ Wën ti anere xlecht iwer uns xpreche, es khan xweyer sin uns net too triwer ketanke mache. Kuk mool was pasiirt is mit een pyoneerin woo mer Lucy nëne tuun. Yemant hot kritikiirt ti aarwayt woo se wii pyoneerin kemacht hot un aach wii se sayn tsayt penutst hot. Lucy is pelayticht kep un hot ti hilef fon rayfe priiter kesuucht. Tii saat: “Ti piiplixe aanreete woo se mich kep hon, hon mich keholef se ferxteen tas ich sol mich net tsu fiil ketanke mache mit te anere sayn mënung, awer tas ich mus mich traan hale aan tas wichtichste: Yeehoowa sayn mënung.” Ti wërter in Matheus 6:1-4 hon Lucy uf kemuut. (Lees.) Tii hon se erinert tas sayn opjetiiw solt sin Yeehoowa froo lose. Tii saat noch: “Soo kaar wën ti anere xlecht iwer mayn aarwayt xpreche, plaype ich froo, wayl ich wees tas ich mayn pestes am mache sin fer Yeehoowa froo lose.” Nochter hot Lucy ëntxlist ti nekatiiwe wërter ferkese.

11, 12. (a) Was sol een krist mache wën eyer tenkt tas eene pruuter “etwas keeche [tëm] hot”? (b) Was lërne mer mit te aat wii Apraham een propleem resolwiirt hot? (Kuk tas pilt am aanfang fom artikel.)

¹¹ “Meyer al tuun fiil mools xtolpere.” (Tya. 3:2) Wole mer saan tas tuu tsum wise kriist tas tuu een pruuter pelayticht host weeche etwas woos tuu kesaat orer kemacht host. Was solst tuu mache? Yeesus hot kesaat: “Wëns tuu tayn opfer tsu te altar nëmst un tat tenkst tuu traan tas tayn pruuter etwas keeche tich hot, los tayn opfer tat, foer te altar, un kee faart. Mach eyerst friit mit tayn pruuter, un tan kee tsurik un mach tayn opfer.” (Mat. 5:23, 24) Tëm noo Yeesus sayn wërter, xprech mit tayn pruuter. Warom solst tuu mit tëm xpreche? Es is net fer tëm ti xult kepe, awer fer tich ëntxultiche un friit mache. Es is aarich wichtich te friit mit unser priiter hale.

¹² Een payxpiil woo tas taytlich tsaycht, is tas kexicht fon Apraham un sayn parent Lot. Ti tswaay hate fiitsaych un sayn xeefer hon aan kefang se tsënke weeche tas futer. Fer te propleem resolwiire, hot Apraham kelos Lot eyerst raus suuche woo sayn familye leepe teet. (Xee. 13:1, 2, 5-9) Tas is een kuut payxpiil fer uns. Apraham hot te friit foer sayn interese ketuun. Hot eyer etwas ferloer weeche sayn krooshërtslichkheet? Sicher net. Klaych noo tiise situatsyoon mit Lot, hot Yeehoowa kroose seechen fer Apraham ferxproch. (Xee. 13:14-17) Wën mer Kot sayn oryentiirunge noo keen un te propleem mit liip resolwiire, tuut Yeehoowa uns imer helfe un uf phase. ^[1]

13. (a) Was hot een superintentent kemacht wën een pruuter krop mit tëm waar? (b) Was khene mer mit tëm sayn payxpiil lërne?

¹³ Kuk mool een situatsyoon fon hayt se taach. Te nay superintentent fon een konkrës apteelung hot eene pruuter aan keruuft un hot tëm kefroot ep eyer helfe khont. Awer te pruuter hot krop keantwort un hot te telefoon ap kextelt. Tee waar noch pees mit te aat wii te friirix superintentent tëm pehantelt hat. Te nay superintentent hot sich net too temit pelayticht, awer tee khont tas net soo lose. Een xtun xpeeter, hot eyer te pruuter noch mool aan keruuft. Tee hot kesaat tas se sich net kekhënt hon un hot kefroot op se khonte te propleem mitsamer resolwiire. Een woch xpeeter, hon ti tswaay sich in een Raych Saal ketrof. Noo se peete, hon se torich een xtun fertseelt un te pruuter hot aus keleet was pasiirt is. Te superintentent hot mit acht keheert un hot piiplixe tekste ketsaycht. Am ën fom kexpreech, waare ti tswaay priiter fraaynte. Xpeeter, hot te pruuter im konkrës ketiint un tee is petanklich wayl te superintentent tëm ketultich un liiplich pehantelt hot.

14, 15. (a) In was fer situatsyoon sole mer Yeesus sayn aanreet in Matheus 18:15-17 aan wëne? (b) Iwer was fer 3 xrite hot Yeesus kexproch un was sol unser opjetiiw sin?

¹⁴ Ti meyerste propleeme tswixich priiter khene un sole resolwiirt wëre ploos tswixich tëne. Awer Yeesus hot kesaat tas, in etliche situatsyoone, fiilaycht weyer es neetich ti hilef fon te elteste suuche. Was fer situatsyoone sin se? In Matheus 18:15-17 hot Yeesus iwer etwas kexproch woo mee wii ploos een kleen propleem weyer. (Lees.) Wii wise mer tas? Wayl Yeesus hot kesaat tas, wën ti persoon net ti hilef fon te aner pruuter, ti tsayer un noch net mool ti elteste aan nëme teet, weyer se pehantelt “wii yemant fon te natsyoone un wii eene man woo xtayer ferlangt”. Hayt teete mer saan tas ti persoon tesasosiirt weyer. Too tepay in tiise sort sint weyer fiilaycht ti anere hiner keen orer liie iwer ti persoon aus teele woo khente sayn naame trekich mache. Awer Yeesus waar net am xpreche iwer xlime sinte soo wii atultëryo, homoseksualismus, apostasii orer itolatrii. Tiise sinte sole fon te elteste uf kephast wëre.

¹⁵ Tas opjetiiw fon Yeesus sayn aanreet waar te pruuter mit liip helfe. (Mat. 18:12-14) Eyerst sole mer fersuuche te propleem mit tëm pruuter aleen resolwiire. Fiilaycht wërts neetich phaar mool mit tëm fertseele. Un wën tas mache, net te propleem resolwiirt? Tan xprech noch mool mit te persoon. Awer yets, nëm yemant mit woo iwer te propleem wees orer yemant woo tich helfe khan een solutsyoon fine. Wëns tuu hin kriist te propleem resolwiire, “host tuu tayn pruuter tsurik kriit”. Noo tas tuu tiise 2 xrite kep host un, noch soo, host tuu es net hin kriit te propleem resolwiire, tan xprech too triwer mit te elteste.

16. Was tsaycht tas Yeesus sayn wërter aan wëne, is praktix un liiplich?

¹⁶ Es is net ofts neetich tas ti priiter ti 3 xrite kepe woo Yeesus in Matheus 18:15-17 kexproch hot. Tas muut uns uf, wayl es wil saan tas fiil mool, is te propleem resolwiirt eep een tesasosyasyoon pasiirt. Ofts tuut ti persoon woo kesint hot, sayn feeler erkhëne un ti situatsyoon korikiire. Tes weeche, khan ti persoon woo sich pelayticht hot, ëntxlise te propleem fertsaye un ferkese. Ekaal ti situatsyoon, tuun Yeesus sayn wërter tsayche tas ti elteste sole sich net ayle fer sich rin mexe in een propleem tswixich ti priiter. Tii sole tas mache ploos wën ti 2 eyerste xrite kep waare un wën es taytliche pewaysunge kept tas was ferkheertes wërklich pasiirt is.

17. Was fer seechen kriin mer wën mer uns aan xtrenge fer te friit mit te anere hale?

¹⁷ Soo lang wii tiise xlecht welt eksistiirt, wëre ti mënxe imperfekt un tuun wayter eene ti anere pelaytiche. Te tisipel Tyako hot kexrip: “Wën yemant net in wërter xtolpere tuut, is tee een perfekt mënx, un khan aach sayn kans khërper kontroliire.” (Tya. 3:2) Fer propleeme resolwiire, mise mer ‘te friit suuche un uns too traan aan xtrenge’. (Psal. 34:14) Wën mer friitxafer sin, tuun mer mit unser priiter un xwestere kuut um keen un aach ti eenichkheet in te kemaynt ferxtërke. (Psal. 133:1-3) Un tas haupste: meyer tuun een kuut fraayntxaft mit Yeehoowa hon, “te Kot woo friit kept”. (Rom. 15:33) Tii woo mit liip sayn propleeme resolwiire, tuun tiise seechen kriin.