1, 2. (a) Was fer sort friit hon mer xon yets? (b) Warom sin mer noch net kans in friit hayt tsu taach? (Kuk tas pilt am aanfang fom artikel.)

 MEYER al wole in friit leepe, oone ëngstlichkheete. Tes weeche sin mer petanklich tsu Yeehoowa wayl eyer uns “Kot sayn friit” kept; tas lost uns in ruu un xitst unser ketanke un xpiirunge. (Fili. 4:6, 7) Wën mer unser leepe tsu Yeehoowa tetikiire, hon mer aach “friit mit Kot” — es wil saan, meyer ëntwikele een xtark fraayntxaft mit tëm. (Rom. 5:1)

² Awer hayt sin mer noch net kans in friit. Meyer leepe in te letste taache fon tiise welt un fiile layt sin ekaal am xtrayte. (2 Tim. 3:1-4) Meyer sin aach in een kriich keeche Satanaas un sayn falxe inlërnunge. (2 Kor. 10:4, 5) Een aner tings woo unser friit xteele khan, is ti aanxtelung fon unser parente woo net Yeehoowa sayn Tsayer sin. Etliche fon tëne khene xlecht iwer unser klaape xpreche orer saan tas mer ti familye aus naner mache. Tii khene soo kaar saan tas, wën mer wayter Yeehoowa tiine, wëre mer net mee teel fon te familye. Wii sole mer tiise opositsyoon siin? Un wii khene mer too temit um keen?

3, 4. (a) Was khan pasiire wën yemant Yeesus sayn inlërnunge noo keet? (b) In was fer situatsyoon khent es noch xweyer sin Yeesus noo keen?

³ Yeesus wust tas net al teete sayn inlërnunge aan nëme. Etliche teete sich soo kaar keeche ti woerheet xtele. Tes weeche praychte Yeesus sayn nookeener koraaj hon. Yeesus hot taytlich kelos tas tiise opositsyoon khent aach fon te parente khome. Tee hot kesaat: “Tenkt net tas ich khom sin fer friit tsu te eyert pringe. Ich sin net khom fer te friit pringe, awer tas xwaart. Ich sin khom fer ausnaner pringe: te soon keeche sayn papa; ti tochter keeche sayn mama un ti xwiichertochter keeche sayn xwiichermuter. Yawool, ti faynte fon eene mënx wëre fon sayn aychne haus sin.” (Mat. 10:34-36)

⁴ Mërk mool ti wërter: “Tenkt net tas ich khom sin fer friit (…) pringe.” Yeesus hot too ketsaycht tas weer wolt tëm noo keen, khent etliche xwiirichkheete mit mache. Sayn inlërnunge khente ti layt aus naner mache. Sicher, Yeesus sayn opjetiiw waar net ti fraayntxafte tswixich ti layt fersaue. Tee wolt ploos ti woerheet iwer Kot fer ti layt in lërne. (Yoo. 18:37) Awer es weyer xweyer fer Yeesus sayn tisipele tëm wayter noo keen, hauptseechlich wën sayn parente orer tichte fraaynte ti woerheet ap xtose teete.

5. Was mise Yeesus sayn nookeener wilich sin fer aus hale?

⁵ Yeesus hot in kelërnt tas sayn tisipele miste wilich sin fer ti opositsyoon fon sayn familye aus hale. (Mat. 10:38) Fer se pewayse tas se fertiine Yeesus sayn tisipele sin, mise sayn nookeener fërtich sin fer ti opositsyoon un xpoteray fon sayn familye aus hale. Awer soo wii Yeesus ferxproch hot, meyer kriin fiil mee wii mer ferliire khene. (Lees Markus 10:29, 30.)

6. Was sole mer uns erinere wën ti parente fersuuche uns um hale Yeehoowa tiine?

⁶ Khan sin tas unser parente fersuuche uns um hale Yeehoowa tiine; noch soo, tuun mer tëne wayter liipe. Awer meyer mise uns erinere tas unser liip tsu Yeehoowa un Yeesus sol xtërker sin. (Mat. 10:37) Meyer sole uns aach net ferkese tas Satanaas tuut fersuuche unser liip tsu te parente penutse fer unser leaaliteet tsu Yeehoowa im proop xtele. Tes weeche wole mer etliche situatsyoone siin woo khene in te familye pasiire un wii mer khene too temit um keen.

7. Wën een krist sayn man orer fraa Yeehoowa net tiint, wii sol eyer sayn situatsyoon siin?

⁷ Ti Piipel saat tas tii woo ferhayrat sin, “tuun xwiirichkheete im leepe hon”. (1 Kor. 7:28) Wën tayn man orer fraa Yeehoowa net tiint, fiilaycht host tuu noch kreeser xwiirichkheete. Awer es is wichtich tiise situatsyoon siin soo wii Yeehoowa se siit. Wën tayn man orer fraa Yeesus hayt net noo keet, es is net een uersach fer sich aus naner mache orer tiworsiire. (1 Kor. 7:12-16) Een man woo Yeehoowa net tiint, mus noch respektiirt sin wayl eyer te xëf fon te familye is. Kraat soo, een fraa woo Yeehoowa net aan peete tuut, fertiint tas sayn man se uf phast un liipt. (Ëfe. 5:22, 23, 28, 29)

8. Was solst tuu tich frooe wën tayn man orer fraa krënse in tayn aanpeetung xtelt?

⁸ Un wën tayn man orer fraa fersuucht krënse xtele in tayn aanpeetung tsu Kot? Tas is mit een xwester pasiirt. Sayn man wolt hon tas tii net in etliche taache fon te woch tsu te preetich aarwayt keengt. Wëns tuu soo was mit machst, froo tich: ‘Meecht mayn man mich um hale Yeehoowa wayter aan peete? Wën es net soo is, khan ich mache was eyer mich ferlangt hot?’ Net xtreng sin, khan tich helfe wayt wech fon uneetiche propleeme plaype. (Fili. 4:5)

9. Wii khanst tuut tayn khiner helfe eer kepe fer sayn papa orer mama woo Yeehoowa net tiint?

⁹ Khiner tsiie khan aach xweyer sin wën tayn man orer fraa Yeehoowa net tiint. Tuu must, tsum payxpiil, tayn khiner in lërne tiise kepoot aan heere: “Eer tayne fater un tayn muter.” (Ëfe. 6:1-3) Awer wole mer saan tas te papa net aan heert was ti Piipel saat. Noch soo, sole ti khiner tëm eere; un ti kristlich fraa sol tas payxpiil lose un sayn man eere. Hal tich traan aan te kuute kwaliteete fon tayn man. Say petanklich tsu tëm weeche tas kuutes woo eyer macht. Mach net nekatiiwe komentaare iwer tayn man foer tayn khiner. Xtats tas, lee fer tayn khiner aus tas yeete persoon tas recht hot fer ëntxlise Yeehoowa tiine orer net. Tas kuute payxpiil fon te khiner khan te man orer ti fraa helfe, woo Yeehoowa net tiint, interes in te woerheet tsayche.

10. Wii khene te papa orer ti mama ti woerheet fer sayn khiner in lërne?

¹⁰ Als mool, xikt te papa orer ti mama woo Yeehoowa net tiint, tas ti khiner sole sayn relichyeese inlërnunge lërne orer tas se etwas fayre woo net mit te Piipel xtimt. Etliche mëner tuun soo kaar sayn fraa ferpiite ti Piipel fer sayn khiner in lërne. Noch soo, mache ti kristliche fraae was meechlich is fer ti woerheet fer sayn khiner in lërne. (Aph. 16:1; 2 Tim. 3:14, 15) Tsum payxpiil: fiilaycht te man fon een kristlich fraa lost net tas se een Piipel xtuutyum mit sayn kleene khint fiirt orer tuut eyer se ferpiite sayn khiner tsu te fersamlunge nëme. Ti fraa tuut te ëntxlus fon sayn man respektiire, awer tii khan yeete keleechenheet penutse fer ti khiner iwer Yeehoowa un sayn kesetse, in lërne. (Aph. 4:19, 20) Es is woer tas, tsum xlus, mise ti khiner ëntxlise ep se Yeehoowa tiine tuun orer net. (Teut. 30:19, 20) a

11. Was khan fiilaycht propleeme tswixich tich un tayn parente pringe?

¹¹ Am aanfang, fiilaycht host tuu net fer tayn familye kesaat tas tuu ti Piipel am xtutiire waarst. Awer wii tayn klaape xtërker kep is, host tuu kemërkt tas es neetich weyer mit tayn familye too triwer xpreche. (Mar. 8:38) Tuu waarst koraajich fer se ëntxlise Yeehoowa tiine, awer fiilaycht tas hot propleeme tswixich tich un tayn parente keprung. Kuk mool etliche tinge woos tuu mache khanst fer mit tiise propleeme um keen un leaal tsu Kot plaype.

12. (a) Warom khene unser parente sich keeche ti woerheet xtele? (b) Wii khene mer empatii tsayche?

¹² Fersuuch ti xpiirunge fon tayn parente ferxteen. Meyer sin aarich froo kep wii mer ti woerheet fon te Piipel kelërnt hon; awer khan sin tas unser parente sich keeche ti woerheet xtele. Warom? Tii khene rechne tas mer hiner kang kep sin orer tas mer teel fon een kefeerlich relichyoon sin. Orer fiilaycht tenke se tas mer se net mee kërn hon, wayl mer net mee pay tëne sin in etliche fayertaache. Un tëm noo sayn relichyoon, im xtant klaape se tas noom toot tuut Kot uns xtroofe. Meyer mise empatii tsayche, mit acht heere, un fersuuche ferxteen tëne sayn mënunge un warom se sich ketanke mache. (Xpr. 20:5) Kuk mool te aphostel Phaul sayn payxpiil. Wii eyer ti kuute notisye kepreeticht hot, hot eyer sich aan kextrengt fer “ale sorte layt” ferxteen. Soo wii tee, sole mer uns aan xtrenge fer unser parente ferxteen. (1 Kor. 9:19-23)

13. Wii sole mer mit unser parente xpreche?

¹³ Xprech mit tsaamheet. “Ayre wërter sole imer fraayntlich sin” — saat uns ti Piipel. (Kol. 4:6) Meyer khene hayliche kayst tsu Yeehoowa ferlange fer uns helfe tsaam sin wën mer mit unser parente xpreche. Meyer sole net tsënke iwer yeete falxe klaape woo se hon. Wën se uns traurich lose weeche was se saan orer mache, khene mer ti aphostele noo mache. Te aphostel Phaul hot kexrip: “Wën mer pelayticht sin, tuun mer seechne; wën mer keyacht sin, tuun mer tas ketultich aus hale; wën se liieray iwer uns saan, tuun mer mit tsaamheet antworte.” (1 Kor. 4:12, 13)

14. Warom sole mer een kuut payxpiil kepe?

¹⁴ Hal een kuut aanxtelung. Mit tsaamheet xpreche, is kuut. Awer een kuut aanxtelung tsayche, is noch wichticher. (Lees 1^te Pheeter 3:1, 2, 16.) Torich tayn kuute payxpiil, los tëne siin tas weer Yeehoowa tiint, hot een froo hayrat, tuut ti khiner kuut tsiie, macht was richtich is un nëmt een sauwer un froo leepe. Soo kaar wën unser parente nii ti woerheet aan nëme, khene mer froo sin tas unser payxpiil Kot kefale tuut.

15. Wii khene mer uns foer perayte fer situatsyoone woo khene tsu tsënkeray nëme?

¹⁵ Tuu tich foer perayte fer situatsyoone woo khene tsu tsënkeray nëme. Tas tuut tich helfe se wise wii too temit um keen. (Xpr. 12:16, 23) Een xwester fon Austraalya saat: “Mayn xwiicherfater hot sich xtark keeche ti woerheet kextelt. Soo, eep mer tëm aan keruuft hon, hon ich un mayn man kepeet un Kot sayn hilef ferlangt fer uns in ruu hale. Tas unser kexpreech net tsu een tsënkeray iwer relichyoon nëme teet, hon mer kepleent iwer was mer xpreche teete un aach wii lang tas kexpreech weyer.”

16. Wëns tuu tich xultich xpiirst wayls tuu tayn parente net kefalt host, was khanst tuu mache?

¹⁶ Waart net tas tayn parente woo Yeehoowa net tiine, in ales mit tich xtime tuun. Awer wën een tsënkeray pasiirt, fiilaycht tuust tuu tich xultich xpiire, wayls tuu tayn parente liipst un tuu wilst net hon tas se traurich mit tich plaype. Wëns tuu tich soo xpiirst, ferkes tich net: es is wichticher leaal tsu Yeehoowa sin wii tsu tayn familye. Tas khan aach tayn familye helfe se ferxteen wii wichtich es is ti Piipel aan heere. Los taytlich torich tayn payxpiil tas Yeehoowa tiine, is ti pest aat fer se leepe. Un eriner tich tas tuu khanst nimant tswinge ti woerheet aan nëme. Yeehoowa kept fer tayn parente ti selwich oportuniteet woo eyer fer tich kep hot: ti frayheet fer raus suuche wii tas leepe nëme. (Isa. 48:17, 18)

17, 18. Was khan tich helfe wën yemant fon tayn familye Yeehoowa im xtich lost?

¹⁷ Wën yemant fon unser familye tesasosiirt is orer suucht raus noo lose Yeehoowa tiine, es khan uns fiil phayn pringe. Wii khanst tuu too temit um keen?

¹⁸ Hal tayn kaystlich rutiin. Lees ti Piipel yeete taach; tuu tich foer perayte un kee imer in te fersamlunge; kee aach in te preetich aarwayt un ferlang im kepeet kraft fer aus hale; soo tuust tuu tayn klaape xtark hale. (Yuu. 20, 21) Un wëns tuu xpiirst tas tuu tas ales machst ploos wayls tuu es mache must, net fom hërts aus? Kep net uf! Wëns tuu tich traan halst aan Yeehoowa sayn tiinst, klaych tuust tuu es hin kriin tayn xpiirunge kontroliire. Kuk mool was mim xrayper fom Psalm 73 pasiirt is. Tee hot sayn frooheet ferloer wayl eyer een ferkheert mënung ëntwikelt hat. Awer wii eyer in Kot sayn aanpeetung plats rin kang is, hot eyer sayn ketanke korikiirt. (Psal. 73:16, 17) Tas selwiche tuut mit tich pasiire wëns tuu wayter Yeehoowa aan peete tuust.

19. Wii khanst tuu tsayche tas tuu Yeehoowa sayn tisipliin respektiirst?

¹⁹ Respektiir Yeehoowa sayn tisipliin. Am aanfang, khan ti tesasosyasyoon fiil traurichkheet pringe. Awer am ën, khan tas ti peste resultaate pringe fer al, soo kaar fer tee woo kesint hot. (Lees Hepreeyer 12:11.) Tsum payxpiil: Yeehoowa saat tas mer sole noo lose “keselxaft hon” mit layt woo sinte un sich net peroye. (1 Kor. 5:11-13) Opwool tas fiil phayn pringt, sole mer khee uneetiche kontakt hon mit yemant fon unser familye woo tesasosiirt is — ekaal ep tas torich telefoon, mensagem, priif, email orer sotsyaale weepe is.

20. Was fer hofnung sole mer hon?

²⁰ Ferliir net ti hofnung. Ti liip “hoft uf ales”; tes weeche mer hofe tas tii woo Yeehoowa kelos hon, tsurik tsu tëm khome. (1 Kor. 13:7) Khan sin tas mer mërke tas unser parent sayn aanxtelung am ënere is. Soo khene mer peete tas ti Piipel tëm ferxtërkt un tas eyer tsurik tsu Yeehoowa khomt. (Isa. 44:22)

21. Was solst tuu mache wëns tuu opositsyoon fon te familye mit machst?

²¹ Yeesus hot kesaat tas, wën kwalkee persoon wichticher wii tee fer uns wërt, fertiine mer net tëm sayn tisipele sin. Awer tee hot ketraut tas sayn tisipele koraaj hëte fer wayter troy sin — aach wën se opositsyoon fon te familye mit mache teete. Wëns tuu soo was mit machst, trau tas Yeehoowa tich helfe tuut mit tayn situatsyoon um keen. (Isa. 41:10, 13) Yeehoowa un Yeesus sin froo mit tayn ëntxlus un tii tuun tayn leaaliteet peloone.