1. Was hon Aatam un Ewa ferloer un was is tes weeche pasiirt?

 WEER mënst tuu hët tas recht fer saan was richtich un ferkheert is? Aatam un Ewa hon net ketraut aan was Yeehoowa kesaat hot. Tii hon raus kesuucht iire aychne wunx mache. Tii hon tas taytlich ketsaycht wii se fom paam fon khëntnis fom kuutes un xlechtes kes hon. (Xee. 3:22) Awer tenk aan was tii ferloer hon — iire fraayntxaft mit Yeehoowa un te xans fer leepe fer imer. Un tes weeche, hon iire khiner ti sint un te toot keërpt. (Rom. 5:12) Aatam un Ewa iire ëntxlus hot ploos layte kepracht.

2-3. (a) Was hot te etyoopix eunuuk kemacht wii Fiilip fer iim kepreeticht hot? (b) Was fer kuute tinge kriin mer wën mer uns taafe lose? (c) Was fer frooche wëre keantwort in tiise xtuutyum?

² Yets mërk wii te etyoopix eunuuk anerste sich aan kextelt hot. Wii Fiilip kepreeticht hot fer iim, hat te eunuuk sich soo petanklich kexpiirt iwich ales was Yeehoowa un Yeesus kemacht hon, tas tee wolt klaych ketaaft wëre. (Aph. 8:34-38) Wën mer unser leepe fer Yeehoowa kepe, soo wii te eunuuk kemacht hot, tsayche mer taytlich tas mer petanklich sin iwer ales was Yeehoowa un Yeesus fer uns kemacht hon; un net ploos tas: meyer tsayche aach tas mer klaape tas Yeehoowa is te eensiche woo tas recht hot fer saan was richtich orer ferkheert is.

³ Tenk aan ale kuutes woo mer kriin wën mer ketaaft wëre. Tsum payxpiil, meyer hon te xans fer kriin ales was Aatam un Ewa ferloer hon, soo kaar tas eewiche leepe; un noch, wayl mer aan Yeesus Kristus klaape, fertsayert Yeehoowa unser feeler un kept uns een sauwer kewise. (Mat. 20:28; Aph. 10:43) Meyer khene aach teel sin een Yeehoowa sayn familye un te wunerlich hofnung hon fer te tsukhunft. (Yoo. 10:14-16; Rom. 8:20, 21) Ale tëm ti seechen pekhant sin, etliche layt woo Yeehoowa khene hon angst fer mache was te etyoopix eunuuk kemacht hot. Was halt tiise layt tsurik fer ketaaft wëre? Wii khene se ti angst phake? Tas is was mer lërne in tiise xtuutyum.

4-5. Was fer xwiirichkheete hon Avery un Hannah mit kemacht?

⁴ Unsicherheet. Kuk was pasiirt is mit eene yunge woo heest Avery. Sayne fater un mama waare Yeehoowa sayn Tsayer, un sayne fater waar pekhant wii een liipliche un kuute elteste. Noch soo, Avery hat angst kehat fer sich taafe lose. Warom? Tee saat: “Ich tacht ich khent nii soo kuut sin wii mayne papa.” Avery hot aach ketacht eyer khent net um keen mit te insetsunge woo eyer kriin khent. “Ploos tenke aan peete foer ti kemaynt, een reet hale orer te fersamlung fer te preetich aarwayt fiire hot mich angst kemacht.”

⁵ Hannah, fon 18 yoer, hot sich seer unsicher kexpiirt. Ale tëm se kroos kewakst is in kristlich familye, hat Hannah kemënt se khent nii Kot tiine. Warom? Wayl tii sich khee weyert kep hot. Als mool, hat se sich soo xlecht kexpiirt tas se sich selepst wee kemacht hot, awer tas hat kemacht tas se sich noch xlechte kexpiirt hot. Tii saat: “Ich hon nimant kesaat was ich mache teet, un aach net tsu mayn eltere. Ich hon kemënt tas Yeehoowa wolt net hon tas ich solt iim tiine weeche was ich mache teet.”

6. Was hat Vanessa tsurik kehal fer sich taafe lose?

⁶ Ti fraaynte sayn mënung. Vanessa, fon 22 yoer, saat: “Ich hat een pest fraayntin. Meyer hon uns xon kekhënt fer mee wii tseen yoer.” Awer Vanessa sayn fraayntin hat se aan niks keholef fer ti ëntxlus mache fer sich taafe lose. Vanessa wust tas wën se wolt sich taafe lose, mist se am ën mache mit tiise fraayntxaft. Vanessa saat: “Fer mich, waar tas xweyer een fraayntxaft mache. Tes weeche, hat ich angst fer am ën mache mit unser fraayntxaft un nii mee soo een fraayntin wii tii fine.”

7. Fon was hat Makayla angst un warom?

⁷ Angst fer een ërnste feeler mache. Een yung meete, woo heest Makayla, waar finef yoore alt wii iire pruuter tesasosiirt kewoer is. Als se elter kewoer is, hot se kemërkt wii traurich iire eltere waare wayl iire pruuter tesasosiirt waar. Tii saat: “Ich hat angst fer mich taafe lose wayl, wën ich teet etwas ferkheertes mache, khent ich aach tesasosiirt wëre, un tas teet mayn eltere noch trauricher lose.”

8. Fon was hot Miles angst kehat?

⁸ Angst fon keechner. Te papa un xtiifmuter fon eene yunge, woo heest Miles, sin Yeehoowa sayn Tsayer, awer sayn mama is net. Tee saat: “Ich hon 18 yoore mit mayn mama keleept. Ich hat angst fer saan tsu iir tas ich wolt mich taafe lose. Ich hat xon kesiin wii se sich aan kextelt hot wii mayne papa een Yeehoowa sayn Tsayer kewoer is. Tes weeche, hat ich angst tii khent mich propleeme pringe.”

9. Was khan pasiire wëns tuu mee iwich Yeehoowa sayn liip un ketult lërnst?

⁹ Aatam un Ewa hon net Yeehoowa wërklich keliipt. Tes weeche, hon se raus kesuucht iim net tiine. Toch noch, hat Yeehoowa kelos tas se khonte fer een tsayt leepe un khiner tsiie soo wii se wolte. Awer tas is klaych taytlich kewoer tas Yeehoowa im xtich lose waar een xlechte plaan. Aatam un Ewa iire elste soon hot sayne yingste pruuter um kepracht, un ti kewaltichkheet un te ekoiismus hon sich iwich ti mënxheet triwer heyer kemacht. (Xee. 4:8; 6:11-13) Awer Yeehoowa wust imer wii rete Aatam un Ewa sayn khiner woo iim tiine wolte. (Yoo. 6:38-40, 57, 58) Sicher is Yeehoowa een liipliche un ketultiche Kot, un es is kans sicher tas soo fiil mee wiis tuu lërnst iwich Yeehoowa sayn liip un ketult, soo fiil mee wërst tuu tee liipe. Tas wërt tich uf muute tas tuu tich net soo aan xtelst wii Aatam un Ewa, awer tayn leepe iim kepst.

10. Wii khan te Psalm 19:7 tich helfe tayn leepe fer Yeehoowa kepe?

¹⁰ Tuu wayter lërne iwich Yeehoowa. Soo fiil mee wiis tuu fon Yeehoowa lërnst, mee tsu fertraung kriist tuu tas tuu iim tiine khanst. Avery, woo xon kenënt is woer, saat: “Was mich keholef hot mee tsu fertraung kriin waar leese iwich ti ferxpreche im Psalm 19:7 un too traan tenke.” (Lees.) Wii Avery kesiin hot wii Yeehoowa sayn wërter sich erfiile, is sayn liip tsu Kot xtërker kewoer. Ti liip heleft uns mee wii ploos ti unsicherheet phake; tii heleft uns aan Yeehoowa hale un was tee fon uns waart. Tas waar woo Hannah, woo xon kenënt is woer, kemacht hot. Tii saat: “Ti Piipel leese un mayn perseenliche xtuutyum mache hot mich keholef ferxteen tas wën ich mich selepst wee kemacht hon, hot tas aach Yeehoowa traurich kelos.” (1 Phe. 5:7) Hannah hat aan kefang ‘aan wëne Kot sayn Wort’. (Tya. 1:22 ) Was is tan pasiirt? Tii saat: “Wii ich kemërkt hon tas Yeehoowa aan heere weyer kuut fer mich, hon ich aan kefang tee noch mee liipe. Yets sin ich mich sicher tas Yeehoowa wil mich imer lenke wën ich prauch sayn hilef.” Hannah hat kephakt te wunx fer sich selepst wee mache; tii hat sayn leepe fer Yeehoowa kept un hat sich taafe kelos.

11. Was hat Vanessa kemacht fer kuute fraaynte hon, un was lërne mer tefun?

¹¹ Suuch kuut tayne fraaynte raus. Vanessa, woo xon kenënt is woer, hot kemërkt tas tiise fraayntxaft iir net keholef hot Yeehoowa tiine. Tan, hat se temit am ën kemacht. Un Vanessa hot mee wii tas kemacht: tii hot sich aan kextrengt fer fiil naye fraayntxafte fine, awer in te kemaynt. Tii saat tas tas payxpiil fon Noee sayn familye iir fiil keholef hot in tiise situatsyoon. Vanessa saat: “Tii waare um ringelt mit layt woo net Yeehoowa keliipt hon, awer tii hon eene te anere kehat.” Vanessa hot sich taafe kelos un is pyoneer kewoer. Tii saat: “Pyoneer sin hot mich keholef kuute fraaynte hon, net ploos in mayn kemaynt, awer aach in anere.” Tas khan aach mit tich pasiire. Wëns tuu fiil tsu tuun host in te aarwayt woo Yeehoowa tich kept, khanst tuu kuute fraayntxafte hon. (Mat. 24:14)

12. Fon was hon Aatam un Ewa khee angst kehat, un was is tes weeche pasiirt?

¹² Te richtich sort angst hon. Angst hon fon etliche tinge khan kuut sin fer uns. Tsum payxpiil, tiife respekt tsu Kot hon, woo petayt angst hon fer etwas mache woo iim net kefalt. (Psal. 111:10) Wën Aatam un Ewa tiise sort angst kehat hëte, hëte se sich net keeche Yeehoowa kextelt. Awer tii hon tas kemacht, un noo tas, sin iire aue uf kang — hon se kemërkt tas se yets sinter weyere. Tas eensiche woo se khente tsurik lose fer iire khiner weyer te sint un te toot. Wii se ferxtan hon wii wayt se khom sin, hon Aatam un Ewa sich kexeemt tas se nakich waare, un tes weeche hon se sich xëtse kemacht mit fayche plëte. (Xee. 3:7, 21)

13-14. (a) Tëm noo 1 Pheeter 3:21, warom prayche mer khee aus ferxeemte angst fom toot hon? (b) Was fer uersache hon mer fer Yeehoowa liipe?

¹³ Is woer tas tiife respekt tsu Yeehoowa hon is wichtich, awer meyer prayche khee aus ferxeemte angst hon fom toot. Yeehoowa wil uns tas eewiche leepe kepe, un tes weeche hot tee uns tas fray khaaf opfer kep. Wën mer een sint mache, awer uns wërklich peroye un klaape aan tëm fray khaaf opfer, wërt Yeehoowa uns fertsaye. Wii khene mer tsayche tas mer klaape? Een aat is unser leepe fer Kot kepe un uns taafe lose. (Lees 1 Pheeter 3:21.)

¹⁴ Meyer hon fiil uersache fer Yeehoowa liipe. Tee kept uns yeete taach kuute tinge un lërnt uns aach weer eyer is un was eyer mache wil. (Yoo. 8:31, 32) Yeehoowa kept uns aach ti kemaynt fer uns in lërne un uns helfe. Tee heleft uns um keen mit te propleeme woo mer hayt hon un ferxprecht uns een perfekt eewich leepe im tsukhunft. (Psal. 68:19; Apo. 21:3, 4) Wën mer noo tenke aan ales was Yeehoowa xon kemacht hat fer tsayche tas tee uns liipt, wole mer aach tsayche tas mer iim liipe, un tiise liip heleft uns te richtich sort angst hon: angst fer te Kot woo mer soo liipe, traurich lose.

15. Wii is Makayla iwerkhom te angst fer een xlime feeler mache?

¹⁵ Makayla, woo xon kenënt is woer, hat iwerkhom te angst fer een xlime feeler mache. Was iir keholef hot waar peser ferxteen tas Yeehoowa uns fertsayert. Tii saat: “Ich hon ferxtan tas meyer al imperfekt sin un wëre feeler mache. Awer ich hon aach ferxtan tas Yeehoowa uns liipt un, torich tas opfer fon sayne soon, uns fertsayert.” Ti liip woo Makayla hat tsu Yeehoowa hot iir uf kemuut fer iire leepe fer iim kepe un sich taafe lose.

16. Was hot Miles keholef te angst iwerkhome fon keechner?

¹⁶ Miles, eene yunge woo angst hat fer sich taafe lose weeche sayn mama, hot mit een sirkuyt superintentent too triwer fertseelt. Tiise superintentent hot tas selwiches mit kemacht: sayne papa waar Yeehoowa sayn Tsayer, awer sayn mama, net. Miles saat: “Te superintentent hat mich keholef tenke was ich khent fer mayn mama saan. Ich must tëne tsayche tas ich mich taafe wolt lose wayl ich wolt, un net tas mayne fater mich am tswinge weyer.” Miles sayn mama hat tas net soo kuut aan kenom. Mit te tsayt, mus Miles fon tehëm wech keen. Awer tee hat toch sich foran fest kextelt in sayn ëntxlus. Miles saat: “Ich hon kelërnt tas Yeehoowa soo fiil kuutes fer mich kemacht hot, un tas hot mayn hërts aan kekrif. Wii ich aan Yeesus sayn fray khaaf opfer ketenkt hon, hon ich kesiin wii aarich Yeehoowa mich liipt. Tes weeche, hon ich mayn leepe fer Yeehoowa kep un hon mich taafe kelos.

17. Was fer keleechenheet hot yeete eene fon uns?

¹⁷ Wii Ewa fom paam in Eetem kes hot, hot se iire Fater im xtich kelos. Wii Aatam uf iire sayt sich kextelt hot, hot tee ketsaycht tas tee kaar net petanklich waar iwer ale kuutes was Yeehoowa fer iim kep hot. Awer yeete eene fon uns hat ti keleechenheet fer tsayche tas se net aan nëmt was tii kemacht hon. Wii? Uns taafe lose. Ti taaf tsaych tas mer klaape tas ploos Yeehoowa hot tas recht fer saan was richtich orer ferkheert is fer uns. Soo, pewayse mer tas mer unser Fater Yeehoowa liipe un traue.

18. Was wërt tich helfe tich kuut keen lose in tayn tiinst tsu Yeehoowa?

¹⁸ Noo te taaf, mise mer leepe soo wii Yeehoowa saat wiis richtich is, un net soo wii meyer wole. Tas khan net laycht sin, awer milyoone layt in te kans welt kriin tas hin. Tuu khanst tas aach mache! Tefoer, xtutiirt imer mee ti Piipel, kee uf ti fersamlunge mit tayn kristliche kexwistere un noch, fertseel anere iwich ales was tuu kelërnt host iwich tayne liipliche Fater Yeehoowa. (Hep. 10:24, 25) Un wëns tuu must een ëntxlus mache, heer Yeehoowa sayn aanreete aan, woo tee kept torich ti Piipel un te orkanisatsyoon. (Isa. 30:21) Soo, ales was tuu machst wërt kuut ap laafe. (Xpr. 16:3, 20)

19. Fon was mise mer uns imer erinere, un warom?

¹⁹ Eriner tich imer: Yeehoowa sayn aanreete noo keen is kuut fer tich. Wëns tuu tas machst, wërst tuu imer mee Yeehoowa un sayn kesetse liipe. Tan, niks woo Satanaas tich aan piit wërt tich ap lenke fon Yeehoowa. Xtel tich foer wii es in tausent yoore wërt sin: wëns tuu tsurik kukst, wërst tuu ti sicherheet hon tas tich taafe lose waar ti pest ëntxlus woos tuu mache khonst im leepe!