1. Warom sole mer uns fer ti yachtung foer perayte?

 IN TE nacht eep Yeesus um keprung kep is, hot eyer kesaat tas al woo raus suuche tëm sayn tisipele sin, teete keyacht wëre. (Yoo. 17:14) Fon tiise tsayt aan, troye kriste sin keyacht fon layt woo Yeehoowa net aan peete. (2 Tim. 3:12) Soo lang wii tas ën fon tiise welt tichter khomt, waarte mer tas unser faynte uns noch mee yachte tuun. (Mat. 24:9)

2-3. (a) Warom is ti pang kefeerlich? (b) Was tuun mer in tiise artikel lërne?

² Was mise mer hayt mache tas mer khene fërtich sin fer ti yachtung aus hale? Es is net neetich uns foer xtele al ti xlechte tinge woo mit uns pasiire khene. Tas mache, khent ploos uns iwerlaate mit pang un ëngstlichkheete. Fiilaycht, kriin mer soo fiil pang tas mer noo lose Yeehoowa tiine soo kaar eep mer ti proope mit mache. (Xpr. 12:25; 17:22) Ti pang is een xtark waf woo unser “faynt, te Taywel”, fersuucht keeche uns penutse. (1 Phe. 5:8, 9) Soo, wii khene mer uns yets foer perayte fer ti yachtung mit mache?

³ In tiise artikel, tuun mer ti antworte fer phaar frooche kuke: Wii khene mer unser fraayntxaft mit Yeehoowa ferxtërke? Warom is es neetich tas yets mache? Was khene mer mache fer noch mee koraaj hon? Was khene mer mache wën ti layt uns hase?

4. Tëm noo Hepreeyer 13:5, 6, fon was mise mer uns sicher sin un warom is tas wichtich?

⁴ Say tich sicher tas Yeehoowa tich liipt un tich nii im xtich lose tuut. (Lees Hepreeyer 13:5, 6.) Fiile yoore tsurik, hot Te Wachthorm kesaat: “Woo peser een persoon Kot khënt, woo mee tuut se uf tëm traue wën yachtung khomt.” Tas is wërklich woer! Fer ti yachtung aus hale, mise mer Yeehoowa liipe un kans uf tëm traue. Meyer sole nii tswayfele tas Yeehoowa een kroos liip tsu uns hot. (Mat. 22:36-38; Tya. 5:11)

5. Was tuut tich helfe Yeehoowa sayn liip xpiire?

⁵ Lees ti Piipel yeete taach mim opjetiiw fer tichter pay Yeehoowa khome. (Tya. 4:8) Wiis tuu leest, hal tich traan aan Yeehoowa sayn kwaliteete, soo wii ti liip, ti parmhërtslichkheet un ti kuutheet. Wëns tuu leest iwer ales was Yeehoowa saat un macht, fersuuch se siin wii fiil eyer tich liipt. (Eeks. 34:6) Etliche fine es xweyer se klaape tas Kot tëne liipt, wayl nimant hot tëne xon liip ketsaycht. Wëns tuu tich soo xpiirst, fersuuch yeete taach een list mache fon te kuute tinge woo Kot xon fer tich kemacht hot. (Psal. 78:38, 39; Rom. 8:32) Was khan tich helfe tiise list mache? Tenk tich traan ti seechen woos tuu xon kriit host un tenk triwer noo iwer was tuu in te Piipel leest. Woo mee tuu petanklichkheet fer Yeehoowa tsaychst, woo xtërker wërt tayn fraayntxaft mit tëm. (Psal. 116:1, 2)

6. Tëm noo Psalm 94:17-19, wii khene hërtsliche kepeete tich helfe?

⁶ Tuu imer peete. Xtel tich mool foer een papa woo sayn soon liiplich am hale is. Te puup fint sich soo sicher tas es kept tëm net pang mit sayn papa fertseele iwer ti kuute un xlechte tinge woo torich te taach pasiirt sin. Tuu khanst soo een sort fraayntxaft mit Yeehoowa hon wëns tuu yeete taach hërtslich tsu tëm peetst. (Lees Psalm 94:17-19.) Wëns tuu peetst, “tuu tayn hërts wii waser foer Yeehoowa sayn kesicht aus xiite” un xprech mit tayn liipliche Fater iwer ales was tich pang macht un tich ëngstlich lost. (Yaa. 2:19) Was wërt te resultaat sin? Tuu tuust “Kot sayn friit [xpiire], woo keet iwer ales woo ti mënxe ferxteen khene”. (Fili. 4:6, 7) Woo eftas tuu soo peetst, woo tichter pay Yeehoowa tuust tuu tich xpiire. (Rom. 8:38, 39)

7. Warom must tuu een xtarke klaape hon tas Kot sayn ferxpreche iwer sayn Raych sich wërklich erfiile tuun?

⁷ Say tich sicher tas ti seechen fon Kot sayn Raych tuun wërklich khome. (Nuu. 23:19) Wëns tuu net wërklich klaapst tas Yeehoowa sayn ferxpreche sich erfiile tuun, wërts laychter fer Satanaas un tii unich sayn kontrol tich pang mache. (Xpr. 24:10; Hep. 2:15) Wii khanst tuu tayn klaape aan Kot sayn Raych yets ferxtërke? Mach een xtuutyum proyëkt iwer Yeehoowa sayn ferxpreche woo sich torich sayn Raych erfiile tuun un aach iwer warom tuu khanst tich sicher sin tas Kot tëne erfiile tuut. Wii tuut tas tich helfe? Kuk mool tas payxpiil fon Stanley Jones, woo weeche sayn klaape 7 yoore in kexpërt keplip is. b Was hot tëm keholef troy aus hale? Tee saat: “Mayn klaape waar xtark, wayl ich wust iwer Kot sayn Raych un was tas mache teet. Un ich hon nii tswayfele too triwer kriit. Soo nimant khont mich tswinge Yeehoowa im xtich lose.” Wëns tuu een xtarke klaape aan Yeehoowa sayn ferxpreche host, tuust tuu tichter pay tëm plaype un net lose ti pang tich kontroliire. (Xpr. 3:25, 26)

8. Was khene mer mërke wën mer noo kuke unser mënung iwer ti fersamlunge? Lee tas aus.

⁸ Kee imer in te fersamlunge. Ti fersamlunge helfe uns tichter pay Yeehoowa khome. Meechte mer kuut um keen mit te yachtung im futuer? Unser mënung iwer ti fersamlunge hayt tuut uns helfe tas xon siin. (Hep. 10:24, 25) Wii soo? Wën xon hayt kleene tinge uns um hale tsu te fersamlunge keen, was meecht im futuer pasiire wën mer mise unser leepe orer frayheet ins kefoer xtele fer uns fersamele? Awer wën mer xon hayt pextimt sin tsu te fersamlunge keen, tuun mer net noo lose tas mache wën ti keechner fersuuche uns um hale. Yets is ti tsayt fer liip tsu te fersamlunge ëntwikele. Wën mer liipe tsu te fersamlunge keen, khee opositsyoon orer ferpiitung fon te rechiirung, khan uns um hale Yeehoowa aan heere xtats ti mënxe. (Aph. 5:29)

9. Piiplixe tekste ausm khop wise, is kuut fer uns foer perayte fer ti yachtung. Warom?

⁹ Tuu tayn liipste piiplixe tekste ausm khop lërne. (Mat. 13:52) Es is woer tas mer khene uns net fon ales erinere. Awer Yeehoowa khan sayn xtark hayliche kayst penutse fer uns helfe tiise tekste traan tenke. (Yoo. 14:26) Een pruuter is in kexpërt kep im Lëst Taytxlant un is in te solitária keplip. Kuk mool was tee kesaat hot: “Ich sin aarich froo kep tas ich mee wii 200 piiplixe tekste aus weenich wust! Wën ich iwer piiplixe sache triwer noo ketenkt hon, khont ich tiise leyere taache fol lose.” Tiise piiplixe tekste hon unser pruuter keholef ticht pay Yeehoowa plaype un troy aus hale.

10. Warom sole mer ti liiter ausm khop lërne?

¹⁰ Tuu ti liiter fer Yeehoowa loope aus weenich lërne un singe. Wii Phaul un Silas in Filipos inkexpërt waare, hon se kaystliche liiter kesung woo se xon aus weenich wuste. (Aph. 16:25) Wii unser priiter in te friirix Sowyët Unyoon tsu te Sipërya kexikt waare, wii hon se sich naner ferxtërkt? Ti xwester Mariya Fedun saat: “Al ti liiter fom kesang puuch woo mer wuste, hon mer kesung!” Tii saat tas tiise liiter hon se al uf kemuut un keholef sich tichter pay Yeehoowa xpiire. Tuust tuu tich ferxtërkt xpiire wëns tuu tayn liipste liiter fon unser kesang puuch orer fom site jw.org singst? Soo tuu tiise liiter hayt ausm khop lërne! (Kuk te khaste “ Kep meer koraaj”.)

11-12. (a) Tëm noo 1^te Samuël 17:37, 45-47, warom waar Tawi soo koraajich? (b) Was fer wichtich lisyoon lërne mer mit Tawi sayn payxpiil?

¹¹ Fer ti yachtung aus hale, must tuu koraaj hon. Wëns tuu tenkst tas tuu net koraajich pist, was khan tich helfe? Tenk tich traan tas ti woer koraaj hëngt net ap aan wii xtark un kroos tuu pist orer aan wii fiil apiliteete tuu host. Kuk mool tas payxpiil fom yunge Tawi wii eyer keeche te kroose Kolias kang is. Tawi waar kleener un xweecher ferklaycht mit tëm kroose Kolias un Tawi hat net kuute wafe — noch net mool een xwaart! Awer, fol koraaj, is eyer kexprung fer keeche tiise hoochnaasiche man khëmpfe.

¹² Warom waar Tawi soo koraajich? Tee hot fest keklaapt tas Yeehoowa mit tëm waar. (Lees 1^te Samuël 17:37, 45-47.) Tawi hot sich net traan kehal aan wii kroos Kolias waar ferklaycht mit tëm. Xtats tas, hot eyer sich traan kehal aan wii kleen Kolias waar ferklaycht mit Yeehoowa. Was lërne mer mit tiise kexicht? Meyer kriin koraaj wën mer uns sicher sin tas Yeehoowa imer pay uns is un tas unser faynte kans kleen sin ferklaycht mit tëm Ale Mechtiche Kot. (2 Kro. 20:15; Psal. 16:8) Wii khene mer noch mee koraaj hayt hon, eep ti yachtung khomt?

13. Wii khene mer unser koraaj ferxtërke? Lee tas aus.

¹³ Meyer khene noch mee koraaj hayt hon wën mer fer ti anere ti kuute notisye fon Kot sayn Raych preetiche. Warom? Wayl wën mer preetiche, lërne mer uf Yeehoowa traue un net pang fon te mënxe hon. (Xpr. 29:25) Wën mer esersiis mache, sin unser muskele ferxtërkt. Kraat soo, is unser koraaj ferxtërkt wën mer preetiche, ekaal ep tas haus tsu haus, in te kexefte, puuplix orer informaal is. Wën mer koraaj ëntwikele fer yets preetiche, wëre mer fërtich fer tas wayter mache, soo kaar wën unser aarwayt ferpoot is. (1 The. 2:1, 2)

14-15. Was fer lisyoone khene mer mit Nancy Yuen un Valentina Garnovskaya lërne?

¹⁴ Meyer khene fiil lërne mit tëm payxpiil fon 2 troye xwestere woo aarich koraajich waare. Nancy Yuen waar ploos een un halpe meter hooch, awer es waar net laycht tëne pang mache. c Tii hot net noo kelos ti kuute notisye fon Kot sayn Raych preetiche. Tes weeche waar se mee wii 20 yoore in te Komunistix Xina inkexpërt. Ti autoriteete woo se aus kefroot hon, hon kesaat tas tii waar “ti tikhopichste persoon” fom kanse lant!

¹⁵ Was eenliches is mit Valentina Garnovskaya pasiirt. Tii waar 3 mool in kexpërt in te friirix Sowyët Unyoon. Im kanse, is se unkefeer 21 yoore in te katee keplip. d Warom waar se in kexpërt? Tii waar soo pextimt wayter preetiche, tas ti autoriteete hon se wii “een aarich kefeerlich kriminoos” kenënt. Warom waare tiise troye fraae soo koraajich? Tii waare sich sicher tas Yeehoowa mit tëne waar.

16. Was prayche mer fer wërklich koraajich sin?

¹⁶ Wii mer xon kesiin hon, fer unser koraaj ferxtërke, sole mer net aan unser aychne apiliteete traue. Xtats tas, mise mer klaape tas Yeehoowa pay uns is un tas eyer fer uns khëmpft. (Teut. 1:29, 30; Sak. 4:6) Tas is was mer prayche fer wërklich koraajich sin.

17-18. Tëm noo Yoohan 15:18-21, was hot Yeesus uns aan kesaat? Lee tas aus.

¹⁷ Meyer al tuun kërn respekt fon te anere kriin. Awer meyer mise uf phase mit te ferkheert itee tas unser weyert hëngt ap fon was ti anere iwer uns tenke. Yeesus saat: “Froo sayt teyer wën, weeche te Soon fom Mënx, ti layt aych hase, uf sayt xupe, aych xëne un xlecht iwer ayre naame xpreche.” (Luk. 6:22) Was wolt Yeesus saan?

¹⁸ Yeesus wolt net saan tas ti kriste wëre kërn kehast. Tee wolt uns ploos aan saan was mit uns pasiire khent. Meyer sin net teel fon te welt. Meyer leepe tëm noo Yeesus sayn inlërnunge un preetiche tas selwiche pexeet woo eyer kepreeticht hot. Tes weeche tuut ti welt uns hase. (Lees Yoohan 15:18-21.) Meyer wole Yeehoowa kefale. Wën ti layt uns hase wayl mer unser Fater Yeehoowa liipe, tas is tëne sayn propleem.

19. Wii khene mer ti aphostele sayn payxpiil noo mache?

¹⁹ Tuu tich nii ferxeeme Yeehoowa sayn Tsayer sin weeche was ti anere saan orer mache. (Mik. 4:5) Meyer khene lërne mit te pang fom mënx um keen, wën mer noo kuke was ti aphostele in Yeruusalem kemacht hon noo Yeesus kextorep is. Tii wuste kans kenau tas ti yitixe relichyeese fiirer tëne kehast hon. (Aph. 5:17, 18, 27, 28) Noch soo, sin se wayter yeete taach im thempel kang un torich ti preetich aarwayt hon se ketsaycht tas se Yeesus sayn tisipele waare. (Aph. 5:42) Tii hon net kelos tas ti pang tëne um hale teet. Meyer khene aach torich ti pang fom mënx triwer wech khome wën mer fer ti layt saan tas mer Yeehoowa sayn Tsayer sin — in te aarwayt, in te xuul un aach im plats woo mer woone. (Aph. 4:29; Rom. 1:16)

20. Warom waare ti aphostele froo opwool se kehast waare?

²⁰ Warom waare ti aphostele froo? Tii wuste warom se kehast waare un fer tëne es waar een eer xlecht pehantelt sin wayl se Kot sayn wile kemacht hon. (Luk. 6:23; Aph. 5:41) Te aphostel Pheeter hot xpeeter kexrip: “Soo kaar wën teyer weeche ti kerechtichkheet layt, sayt teyer froo.” (1 Phe. 2:19-21; 3:14) Wën mer ferxteen tas mer kehast sin wayl mer tas richtiches mache, tuun mer nii noo lose Yeehoowa tiine weeche te has fon te layt.

21-22. (a) Was host tuu ëntxlist se mache fer tich fer ti yachtung foer perayte? (b) Was tuun mer im neekste artikel noo kuke?

²¹ Meyer wise net wanee tuun ti layt aan fange uns yachte orer wanee tuut ti rechiirung unser aarwayt ferpiite. Awer meyer wise tas mer khene uns yets foer perayte. Wii? Meyer mise unser fraayntxaft mit Yeehoowa un unser koraaj ferxtërke un meyer mise lërne mit te has fon te mënxe um keen. Uns yets foer perayte, tuut uns helfe Yeehoowa wayter im futuer tiine.

²² Awer un wën unser aarwayt ferpoot is? Im neekste artikel, tuun mer piiplixe funtamente noo kuke woo uns helfe Yeehoowa wayter tiine, soo kaar wën unser aarwayt ferpoot is.