1. Was lost uns sicher tas mer “in te letste taache” am leepe sin?

 PIST tuu uf te welt khom noo 1914? Tan host tuu tayn kanse leepe torich ti “letste taache” fon tiise welt keleept. (2 Tim. 3:1) Meyer al wise was Yeesus kesaat hot iwer was in tiise tsayt pasiire teet. Too tepay sin kriiche, hungernoot, eyertxutere, epitemiie, mee unkerechtichkheet un ti yachtung keeche Kot sayn folek. (Mat. 24:3, 7-9, 12; Luk. 21:10-12) Meyer siin aach ti layt sich aan xtele soo wii te aphostel Phaul foer raus kesaat hot. (Kuk te khaste “ Wii sin ti layt hayt?”) Wii Yeehoowa sayn aanpeeter, sin mer uns sicher tas mer “am ën fon te taache” am leepe sin. (Mik. 4:1)

2. Was fer frooche mise mer antworte?

² Tsayt 1914, sin xon fiile yoore rom kang. Tes weeche, khan ma saan tas mer in te letste fon “te letste taache” sin. Wayl tas ën soo ticht is, mise mer ti antwort fer 2 wichtiche frooche fine: Was tuut am ën fon “te letste taache” pasiire? Un was wil Yeehoowa hon tas mer mache soo lang wii mer tas waarte?

3. Tëm noo ti profetsii in 1 Thesalooniker 5:1-3, was tuun ti natsyoone aus xpreche?

³ Lees 1 Thesalooniker 5:1-3. Phaul xprecht iwer “Yeehoowa sayn taach”. In tiise tekst, es hot se tuun mit te tsayt woo aan fangt mit te atak keeche “Papiloon ti Kroos” — woo al ti falxe relichyoone petayt — un keet tsum ën mit te Armaxeton. (Apo. 16:14, 16; 17:5) Kraat foer tiise “taach” aan fange, tuun ti natsyoone “Friit un sicherheet!” aus xpreche. Als mool, tuun ti politixe fiirer eenliche wërter penutse wën se xpreche iwer peser ferpiinunge mit anere natsyoone hon. b Awer ti pekhantmachung fon “friit un sicherheet” woo ti Piipel xprecht, wërt kans anerste sin. Warom? Wayl wën tas pasiirt, tuun fiile layt wërklich klaape tas ti politixe fiirer hon mee sicherheet fer ti welt keprung. Awer in woerheet, tuut ti “kroos tripulatsyoon” aan fange un een “pletslich fernichtung” khome. (Mat. 24:21)

4. (a) Was wise mer noch net iwer ti pekhantmachung fon “friit un sicherheet”? (b) Was wise mer xon too triwer?

⁴ Meyer wise net was nëmt tsu te pekhantmachung fon “friit un sicherheet” orer wii tas pekhant kemacht wërt. Meyer wise aach net eps ploos eene orer fiile pekhantmachunge khome tuun. Awer een tings wise mer: ti mënxliche rechiirunge khene net friit uf te kans welt pringe. Tes weeche, sol sayn pekhantmachung uns net hiner keen. Tas is, in woerheet, ti pekhantmachung woo mer am waarte sin un woo tsaycht tas “Yeehoowa sayn taach” klaych aan fange tuut.

5. Wii helft uns 1 Thesalooniker 5:4-6 fërtich fer “Yeehoowa sayn taach” sin?

⁵ Lees 1 Thesalooniker 5:4-6. Phaul saat uns was mer mache sole fer fërtich fer “Yeehoowa sayn taach” sin. Meyer “sole net xloofe soo wii ti anere mache”; xtats tas, sole mer uns “wachsam” hale. Tsum payxpiil, mer mise uns uf phase fer neutral plaype un uns nii mit te politik rin mexe. Wën net, khente mer “teel fon te welt” wëre. (Yoo. 15:19) Meyer wise tas ploos Kot sayn Raych khan friit uf te kans welt pringe.

6. Was wole mer ti anere helfe se mache un warom?

⁶ Meyer mise uns wachsam hale, awer mer wole aach anere helfe “wach” wëre; soo khene se lërne was ti Piipel saat klaych mit tiise welt pasiirt. Wole mer uns nii ferkese: wën ti kroos tripulatsyoon aan fangt, wërt tas xon tsu xpeet sin fer ti layt aan fange Yeehoowa tiine. Tes weeche is es soo wichtich hayt preetiche. c

7. Was wil Yeehoowa hon tas mer yets mache?

⁷ In te khorts tsayt woo mer noch hon eep “Yeehoowa sayn taach” aan fangt, wil eyer hon tas mer flaysich in te preetich aarwayt xafe. Meyer wole “fiil hon fer se mache im Hër sayn aarwayt”. (1 Kor. 15:58) Yeesus hot foer raus kesaat was Kot sayn tiiner mache teete. Wii tee am xpreche waar iwer al ti wichtiche tinge woo torich ti letste taache pasiire teete, hot eyer kesaat: “Un aach, in te kanse natsyoone, mise ti kuute notisye tsu eyerst kepreeticht wëre.” (Mar. 13:4, 8, 10; Mat. 24:14) Tenk mool noo: yeetes mool woos tuu preetiche keest, helfst tuu tiise profetsii erfiile!

8. Wii wise mer tas ti preetich aarwayt is am foran keen?

⁸ Wii is ti preetich aarwayt am ap laafe? Yeetes yoer, tuun mee layt ti kuute notisye fom Raych heere. Tenk, tsum payxpiil, iwer wii ti numer puplikatoore uf te kans welt sich ferkreest hot torich ti letste taache. In 1914, es waare 5.155 puplikatoore in 43 lënter. Hayt sin unkefeer 8.500.000 puplikatoore in 240 lënter! Awer unser aarwayt is noch net fërtich. Meyer mise wayter fer ti layt preetiche tas Kot sayn Raych is ti eensich solutsyoon fer ti mënxliche propleeme. (Psal. 145:11-13)

9. Warom mise mer wayter preetiche?

⁹ Meyer tuun ploos noo lose se preetiche wën Yeehoowa saat tas unser aarwayt fërtich is. Wii fiil tsayt hon noch ti layt fer Yeehoowa un Yeesus khëne lërne? (Yoo. 17:3) Meyer wise tas net. Awer meyer wise tas pis ti kroos tripulatsyoon aan fangt, yeete eene woo “ti richtich muut fer tas eewich leepe” hot, khan noch ti kuute notisye aan nëme un aan fange Yeehoowa tiine. (Aph. 13:48) Wii khene mer tiise layt helfe eep tas tsu xpeet is?

10. Wii helft uns Yeehoowa ti woerheet fer ti layt in lërne?

¹⁰ Torich sayn Orkanisatsyoon, kept uns Yeehoowa ales was mer prayche fer ti layt iwer ti woerheet in lërne. Tsum payxpiil: in te mitewoch fersamlung, kriin mer iipung fer se preetiche. Tiise fersamlung helft uns se wise was se saan in te eyerste pesuuche un in te rik pesuuche. Un meyer lërne aach wii een Piipel xtuutyum fiire. Yeehoowa sayn Orkanisatsyoon kept uns aach ti Inlërnung Kit. Ti materyaale in tiise kit helfe uns…

•   kexpreeche aan fange;

•   unser pexeet interesant lose;

•   ti layt helfe wunx kriin fer mee lërne;

•   ti woerheet in te Piipel xtuutye in lërne;

•   ti layt woo sich interesiire in laate unser site un te Raych Saal pesuuche.

 Is es kenuuch ploos tiise materyaale hon? Nee, meyer mise se penutse. d Tsum payxpiil, wëns tuu een kuut kexpreech mit een interesiirt persoon host, khanst tuu tëm een pleetche orer een piichelche lose. Soo, pis tuu noch mool mit tiise persoon xpreche khanst, hot se etwas fer se leese. Meyer al mise yeete moonat flaysich in te preetich aarwayt sin.

11. Warom is te Curso da Bíblia On-line in kericht kep?

¹¹ Te Curso da Bíblia On-line, im jw.org^®, tuut aach ti layt helfe ti woerheet iwer Yeehoowa lërne. (Kee tsu ENSINOS BÍBLICOS > LIÇÕES ON-LINE.) Warom is tiise khurs in kericht kep? Yeete moonat, een kroos numer layt uf te kans welt penutst ti internet fer lisyoone fon te Piipel suuche. Ti lisyoone woo in unser site xteen, khene tiise layt helfe aan fange se lërne iwer Kot sayn Wort. Un aach: khan sin tas tuu mit yemant xprechst woo een pisye pang hot een Piipel xtuutyum mit een leerer aan nëme. Wën soo was pasiirt, khanst tuu tiise sesyoon fon unser site tsayche orer een link fon te lisyoone xike. e

12. Was khan een persoon lërne mit tëm Curso da Bíblia On-line?

¹² Te Curso da Bíblia On-line xprecht iwer tiise sache: “A Bíblia e seu Autor”, “Os principais personagens da Bíblia” un “A mensagem da Bíblia sobre um futuro melhor”. Wën ti persoon tiise lisyoone xtutiirt, lërnt se…

•   wii ti Piipel een persoon helfe khan;

•   weer Yeehoowa, Yeesus un ti engele sin;

•   warom Kot ti mënxe kemacht hot;

•   warom ti xwiirichkheet un ti xlechtichkheet eksistiire.

 Ti lisyoone tsayche aach wii Yeehoowa tuut…

•   ti xwiirichkheet un te toot tsum ën pringe;

•   ti toote tsurik tsum leepe pringe;

•   ti xlechte mënxliche rechiirunge mit Kot sayn Raych ersetse.

13. Meecht te Curso da Bíblia On-line tas Piipel xtuutyum mit een leerer ersetse? Lee tas aus.

¹³ Tiise khurs ersetst net tas Piipel xtuutyum mit een leerer. Yeesus hot uns ti priwilëj kep fer tisipele mache. Meyer hofe tas tii woo sich interesiire, tuun ti lisyoone xtutiire, kuut fine was se lërne, un tan te wunx kriin fer mee lërne. Soo, fiilaycht, tuun se een Piipel xtuutyum aan nëme. Am ën fon yeete lisyoon, is te leeser in kelaat een xtuutyum mit een leerer ferlange. Yeete taach, uf te kans welt, unkefeer 230 Piipel xtuutye sin torich unser site ferlangt. Sicher, een xtuutyum mit een leerer hon, macht fiil aus!

14. Tëm noo Yeesus sayn wërter in Matheus 28:19, 20, was mise mer uns aan xtrenge fer se mache un warom?

¹⁴ Lees Matheus 28:19, 20. Wii mer Piipel xtuutye fiire, mise mer uns aan xtrenge fer ‘tisipele mache un tëne in lërne se foliche ales was Yeesus kexikt hot’. Meyer mise ti layt helfe ferxteen wii wichtich es is raus suuche Yeehoowa un sayn Raych pay xteen. Es wil saan, meyer mise ti layt uf muute aan wëne was se lërne, sayn leepe tsu Yeehoowa tetikiire un sich taafe lose. Ploos soo tuun se Yeehoowa sayn taach iwerleepe. (1 Phe. 3:21)

15. Mit was khene mer net tsayt ferliire un warom?

¹⁵ Wii mer xon kesaat hon, klaych khomt tas ën fon tiise welt. Tes weeche, hon mer net tsayt fer wayter mit layt xtutiire woo net ënerunge in sayn leepe mache wole fer Yeesus sayn tisipele wëre. (1 Kor. 9:26) Unser tsayt is khorts! Un es kept noch fiile layt woo mise ti kuute notisye fom Raych heere eep tas tsu xpeet is.

16. Tëm noo Apokalipsis 18:2, 4, 5, 8, was mise meyer al mache? (Kuk aach ti noote.)

¹⁶ Lees Apokalipsis 18:2, 4, 5, 8. Tiise tekste tsayche noch etwas woo Yeehoowa wil hon tas al sayn aanpeeter mache: sich wech hale fon te falxe relichyoone. Eep een Piipel xtutënt ti woerheet kelërnt hot, fiilaycht waar eyer een mitkliit fon een falx relichyoon. Khan sin tas eyer tsu te relichyeese fersamlunge kang is un een teel too temit hat. Orer fiilaycht hot eyer kelt fer tiise relichyoon kep. Eep een Piipel xtutënt puplikatoer wëre khan, mus eyer noo lose teel fon te falx relichyoon sin. Tee mus een priif xraype orer in een aner aat taytlich lose tas eyer wil net mee teel sin fon te friirix khërich orer falx relichyoon. f

17. Fon was fer sort aarwayt mus een krist sich wech hale un warom?

¹⁷ Een woer krist mus aach uf phase tas sayn aarwayt niks se tuun hot mit te falxe relichyoone. (2 Kor. 6:14-17) Tsum payxpiil, eyer teet nii fer een khërich xafe. Un een krist woo tsu yemant xaft, mus aach uf phase fer net fiil aarwayt mache in een plats woo fon te falx relichyoon penutst is. Un wën een krist een kexeft hot, sicher tuut eyer net een aarwayt suuche orer aan nëme woo mit te falxe relichyoone se tuun hot. Warom is unser ëntxlus soo fest too triwer? Wayl mer wole khee teel hon in te falxe inlërnunge un sinte fon te falxe relichyoone, woo unrayn foer Kot sin. (Isa. 52:11) g

18. Wii hot een pruuter ti piiplixe funtamente in sayn aarwayt aan kewënt?

¹⁸ Yoore tsurik, hot een man fer een elteste ferlangt, woo wii tsimerman kexaft hot, een kleen aarwayt fer ti khërich mache in te xtat woo te pruuter keleept hot. Te pruuter hat sayn aychne kexeft un te man woo tëm ferlangt hot tiise aarwayt mache, wust tas te pruuter net aarwayte fer ti khëriche aan kenom hot. Awer te man waar aylich fer yemant fine fer ti aarwayt mache. Noch soo, hot te pruuter ti piiplixe funtamente aan kewënt un hot ti aarwayt net aan kenom. Ti neekst woch, hot ti tsaytung een pilt ketsaycht: een aner tsimerman een krayts in te khërich am fest pine. Wën te pruuter ti aarwayt aan kenom hët, fiilaycht weyer tee in tiise pilt! Tas khent sayn kuute naame foer ti priiter fersaue. Un xtel tich mool foer wii hët Yeehoowa sich kexpiirt.

19-20. (a) Was hon mer kelërnt? (b) Was noch mise mer lërne?

¹⁹ Ti Piipel tsaycht tas ti neekst wichtich profetsii woo sich klaych erfiile tuut, wërt ti ausxprechung fon “friit un sicherheet”. Weeche was Yeehoowa uns in kelërnt hot, wise mer tas ti natsyoone khene net woere un eewiche friit pringe. Was sole mer mache pis tiise ewënt pasiirt un ti pletslich fernichtung khomt? Yeehoowa wil hon tas mer flaysich in te preetich aarwayt sin un tas mer uns aan xtrenge fer tisipele mache. In te selwich tsayt, mise mer uns wech hale fon te falxe relichyoone. Es wil saan, meyer sole khee mitkliit fon Papiloon ti Kroos sin un net aarwayte aan nëme woo too temit se tuun hon.

²⁰ Awer anere ewënte tuun aach pasiire torich ti letste fon “te letste taache”. Un es kept anere tinge woo Yeehoowa fon uns waart. Was fer tinge? Un wii khene mer uns foer perayte fer ales woo noch pasiire tuut? Meyer siin tas im neekste artikel.