1. Was mus een persoon mache eep eyer aan fangt een haus paue?

 XTEL tich foer een persoon woo tuut ëntxlise een haus paue. Eyer wees was fer sort haus eyer paue wil. Meechts kuut sin wën eyer klaych ti materyaale khaaft un ti paueray aan fangt? Nee. Eep ti aarwayt aan fange, mus te persoon etwas wichtiches mache — ti khoste fon te paueray noo rechne. Warom? Wayl tee mus wise op eyer kenuuch kelt hot fer tas haus fërtich pringe. Wën te persoon ti khoste foer heyer noo rechent, wërt es laychter sin ti paueray fon sayn naye haus hin kriin.

2. Noo ti wërter fon Lukas 14:27-30, iwer was sole mer kuut noo tenke eep mer uns taafe lose?

² Tuust tuu traan tenke tich taafe lose? Es is meechlich tas tayn liip un petanklichkheet tsu Yeehoowa hon kemacht tas tuu aan tiise sache tenke teest. In woerheet, ti ëntxlus fer sich taafe lose, is eenlich wii te man woo wil een haus paue. Warom khene mer tas saan? Tenk aan Yeesus sayn wërter in Lukas 14:27-30. (Lees.) Yeesus hot kexproch was es petayt tëm sayn tisipel sin. Wën mer wole tëm noo keen, mise mer wilich sin fer “ti khoste” petsaale — tas petayt etliche xwiirichkheete aus hale un tinge uf sayt lose. (Luk. 9:23-26; 12:51-53) Tes weeche, eeps tuu tich ich taafe lost, must tuu kuut triwer noo tenke in ales was tepay is fer Yeesus sayn tisipel sin. Tan, pist tuu peser foer perayt, wii een ketaaftne krist wayter Kot troy tiine.

3. Iwer was xpreche mer in tiise artikel?

³ Hots te weyert “ti khoste” petsaale fer een ketaaftne tisipel fon Yeesus sin? Kans sicher! Ti taaf macht ti teere uf fer fiile seechen — yets un in te futuer. In tiise xtuutyum, wole mer etliche wichtiche frooche iwer ti taaf antworte. Tas tuut tich helfe ti antwort fer een aner frooch fine: “Sin ich fërtich fer mich taafe lose?”

4. (a) Was is ti tetikatsyoon? (b) Was petayt sich “selepst ap saan”, woo in Matheus 16:24 kexrip is?

⁴ Was is ti tetikatsyoon? Tas is etwas aarich wichtiches woos tuu mache must eeps tuu tich taafe lost. Tas is kenënt een tetikatsyoon mache. Tas is een aarich ërnst kepeet. Wëns tuu tiise ërnst kepeet machst, tuust tuu Yeehoowa ferxpreche tas tuu tayn leepe penutse tuust fer tëm fer imer tiine. In tayn tetikatsyoon tsu Kot tuust tuu tich “selepst ap saan”. (Lees Matheus 16:24.) Tuu keheerst tan tsu Yeehoowa. Was fer een aarich kroos priwilëj tas is. (Rom. 14:8) Tuu tuust fer Kot saan tas fon yets aan foran tuust tuu tich traan hale fer tëm tiine un net tich selepst kefale. Tayn tetikatsyoon is een ërnst ferxpreche woos tuu fer Kot kemacht host. Yeehoowa tuut uns net tswinge tiise ferxpreche mache. Awer wën mer tas mache, Yeehoowa waart tas mer tas in hale. (Psal. 116:12, 14)

5. Was fer unerxiit kepts tswixich ti tetikatsyoon un ti taaf?

⁵ Was is ti unerxiit tswixich ti tetikatsyoon un ti taaf? Ti tetikatsyoon is etwas woos tuu aleen machst; ti pasiirt tswixich tich un Yeehoowa. Uf te aner sayt, ti taaf is puuplix; ti pasiirt foer anere layt, ofts mool in een konkrës. In tayn taaf, tuust tuu fer anere persoone tsayche tas tuu tayn tetikatsyoon tsu Yeehoowa xon kemacht host. b Soo, wëns tuu tich taafe lost, tuun ti anere wise tas tuu tayn Kot Yeehoowa, mit kanse hërts, seel, ferxtant un kraft liipe tuust, un tas tuu pextimt pist Tëm fer imer tiine. (Mar. 12:30)

6-7. Tëm noo 1 Pheeter 3:18-22, was sin ti tswaay uersache woo tsayche tas ti taaf neetich is?

⁶ Is es wërklich neetich sich taafe lose? Kuk mool was ti Piipel saat in 1 Pheeter 3:18-22. (Lees.) Ti arich hot fer ale layt pewayst tas Noee klaape hat. In te selwich aat, tayn taaf tuut fer anere layt pewayse tas tuu tich tsu Yeehoowa tetikiirt host. Awer is ti taaf wërklich neetich? Yaa. Pheeter hot ti uersache aus keleet. Eyerst, ti taaf tuut ‘tich rete’. Awer, ti taaf khan ploos uns rete wën mer tsayche tas mer aan Yeesus klaape, tas eyer fer uns kextorep is, tas eyer fom toot uf keruuft kep is fer im himel leepe un yets “uf Kot sayn rechts sayt” is.

⁷ Tsweet, ti taaf tuut uns “een kuut kewise” kepe. Wën mer uns tetikiire un uns taafe lose, wëre mer een tiiner fon Yeehoowa. Wayl mer uns hërtslich peroyt hon un aan tas fray khaaf opfer klaape, tuut Kot unser sinte fertsaye. Tes weeche, khene mer een kuut kewise hon un in friit mit Kot sin.

8. Was sol ti haupst uersach sin fer tich taafe lose?

⁸ Was fer is ti haupst uersach fer tich taafe lose? Wayls tuu ti Piipel mit acht tiif xtutiirt host, host tuu fiile tinge iwer Yeehoowa kelërnt — sayn personaliteet un ti aat wii eyer tenkt un hantelt. Was tuu iwer tëm kelërnt host, hot tayn hërts aarich aan kekrif un tuu host fiil liip tsu Kot kexpiirt. Tayn liip tsu Yeehoowa is ti haupst uersach tas tuu tich taafe lose wilst.

9. Was petayt “im naame fom Fater un fom Soon un fom hayliche kayst” ketaaft wëre, soo wiis in Matheus 28:19, 20 xteet?

⁹ Een aner uersach tas tuu tich taafe lose, wilst sin ti woerheete fon te Piipel woos tuu aan kenom host. Kuk was Yeesus kesaat hot wii eyer kexikt hot tisipele mache. (Lees Matheus 28:19, 20.) Tëm noo Yeesus sayn wërter, weer sich taafe lost, mus tas “im naame fom Fater un fom Soon un fom hayliche kayst” mache. Was tuut tas petayte? Tuu must mit kanse hërts ti woerheete fon te Piipel iwer Yeehoowa, iwer sayn Soon, Yeesus, un iwer te hayliche kayst klaape. Tas sin mechtiche woerheete un khene tayn hërts tiif petrefe. (Hep. 4:12) Wole mer etliche fon tëne erinere.

10-11. Was fer woerheete iwer te Fater host tuu kelërnt un aan kenom?

¹⁰ Erinerst tuu tich wiis tuu ti woerheete iwer te Fater kelërnt host? Tsum payxpiil, sayn naame is “Yeehoowa”, tee is “te Ale Heechste iwer ti kans eyert” un ploos tee is “te woere Kot”. (Psal. 83:18; Isa. 37:16) Eyer is unser Kriatoer un “ti retung keheert tsu Yeehoowa”. (Psal. 3:8; 36:9) Eyer hot een aat kefun fer uns fon te sint un fom toot rete un hot uns een hofnung kep fer imer se leepe. (Yoo. 17:3) Torich tayn tetikatsyoon un tayn taaf wërst tuu wii Yeehoowa sayn Tsayer kekhënt. (Isa. 43:10-12) Tuu wërst teel fon een welt wayt familye woo Kot aan peet un fer tii is een eer Kot sayn naame se traan un tëm fer anere pekhant mache. (Psal. 86:12)

¹¹ Was fer een eer es is se ferxteen was ti Piipel iwer te Fater in lërnt! Wëns tuu tiise weyertliche woerheete aan nëmst, tuut tayn hërts tich uf muute tich tsu Yeehoowa tetikiire un tich taafe lose.

12-13. Was fer woerheete iwer te Soon host tuu kelërnt un aan kenom?

¹² Wii host tuu tich kexpiirt wiis tuu tiise woerheete iwer te Soon kelërnt host? Yeesus is te tsweet wichtichste persoon fom uniwërsum. Eyer is unser Reter. Eyer waar wilich sayn leepe fer uns kepe. Wën mer torich unser aktsyoone tsayche tas mer aan tas fray khaaf opfer klaape, khene unser sinte fertsayert kepe, khene mer een fraayntxaft mit Kot hon un tas eewiche leepe kriin. (Yoo. 3:16) Yeesus is te Hooche Priister. Eyer wil uns helfe nutse fom fray khaaf opfer kriin un een ticht ferpiinung mit Yeehoowa hon. (Hep. 4:15; 7:24, 25) Wii Kheenich fon Kot sayn Raych, is eyer woo Yeehoowa sayn naame ferhayliche tuut, ti xlechtichkheet wech xaft un im Paratiis ti eewiche seechen pringe tuut. (Mat. 6:9, 10; Apo. 11:15) Yeesus is unser payxpiil. (1 Phe. 2:21) Eyer hot uns ketsaycht was es petayt tas leepe penutse fer Kot sayn wile se mache. (Yoo. 4:34)

¹³ Wëns tuu aan nëmst was ti Piipel iwer Yeesus in lërnt, tuust tuu lërne Kot sayn Soon liipe. Tiise liip tuut tich uf muute tayn leepe penutse fer Kot sayn wile mache, soo wii Yeesus kemacht hot. Un tas kept tich te wunx tich tsu Yeehoowa tetikiire un tich taafe lose.

14-15. Was fer woerheete iwer te hayliche kayst host tuu kelërnt un aan kenom?

¹⁴ Was host tuu kemërkt wiis tuu tiise woerheete iwer te hayliche kayst kelërnt host? Tee is net een persoon, awer is Kot sayn aktiiw kraft. Yeehoowa hot te hayliche kayst penutst fer ti xrayper fon te Piipel inspiriire un te hayliche kayst helft uns ti Piipel ferxteen un aan wëne was mer tat leese. (Yoo. 14:26; 2 Phe. 1:21) Torich sayn kayst, kept Yeehoowa uns “ti iwermeesich kraft”. (2 Kor. 4:7) Torich Kot sayn kayst, kriin mer ti kraft fer ti kuute notisye preetiche, fer keeche ferkheerte winxe khëmpfe, fer keeche trauriche xpiirunge um keen un proope iwerkhome. Mit ti hilef fom hayliche kayst khene mer xeene kwaliteete ëntwikele — “ti frucht fom kayst”. (Kal. 5:22) Tii woo uf Kot traue un tëm sayn hayliche kayst ferlange, tuut Kot sayn kayst krooshërtslich kepe. (Luk. 11:13)

¹⁵ Es treest uns se wise tas Yeehoowa sayn aanpeeter khene imer uf ti hilef fon Kot sayn kayst traue fer wayter tëm tiine! Wën tuu aan wënst was ti Piipel iwer te hayliche kayst in lërnt, khan tich tas uf muute, tich tsu Kot tetikiire un tich taafe lose.

16. Was hon mer pis yets kelërnt?

¹⁶ Ti ëntxlus tich tsu Kot tetikiire un tich taafe lose is een aarich wichtich xrit in tayn leepe. Wii meyer kelërnt hon, wëns tuu tas machst, pist tuu wilich fer aan nëme “ti khoste” woo tepay sin — etliche xwiirichkheete aus hale un tinge uf sayt lose. Awer al ti seechen woos tuu kriist, sin fiil mool kreeser wii ti opfere woos tuu mache tuust. Ti taaf khan tich rete un kept tich een kuut kewise foer Kot sayn aue. Ti haupst uersach fer tich taafe lose, mus weeche tayn liip tsu Yeehoowa Kot sin. Tuu must aach mit kanse hërts aan ti woerheete klaape woos tuu iwer te Fater, te Soon un te hayliche kayst kelërnt host. Wëns tuu iwer tas ales noo tenkst, wii teest tuu tiise frooch antworte: “Sin ich fërtich fer mich taafe lose?”

17. Was fer sin etliche tinge woo een persoon mache mus eep se sich taafe lost?

¹⁷ Wëns tuu tenkst tas tuu fërtich pist fer tich taafe lose, host tuu woerxaynlich etliche xrite kep fer een kuut fraayntxaft mit Yeehoowa uf paue. c Weeche tayn reeklich Piipel xtuutyum, host tuu aan kefang fiile tinge iwer Yeehoowa un Yeesus lërne. Tuu host klaape ëntwikelt. (Hep. 11:6) Tuu host een fest fertraue uf ti ferxpreche fon Yeehoowa woo in te Piipel xteen un tuu pist tich sicher tas aan Yeesus sayn fray khaaf opfer klaape, khan tich fon te sint un fom toot rete. Tuu host tich fon tayn sinte peroyt, es tuut tich layt weeche ti feeler woos tuu friier kemacht host un tuu host xon Yeehoowa sayn fertsayung weeche tiise tinge ferlangt. Tuu host tayn leepe keënert un host te pukel kep fer ti aat fom leepe woos tuu keleept host un host aan kefang se leepe tëm noo Kot sayn wile. (Aph. 3:19) Tuu wilst fer anere iwer tayn klaape fertseele. Tes weeche, host tuu kemacht was neetich waar fer een unketaaftne puplikatoer wëre un host aan kefang mit te kemaynt preetiche. (Mat. 24:14) Yeehoowa is aarich froo mit tich wayls tuu tas ales kemacht host. Tuu host tëm sayn hërts kefrayt. (Xpr. 27:11)

18. Was is noch neetich eeps tuu tich taafe lose khanst?

¹⁸ Eeps tuu tich taafe lost, must tuu noch etliche tinge mache. Wii mer xon kesiin hon, is es neetich tich tsu Kot tetikiire. In een perseenlich un hërtslich kepeet, ferxprech fer Yeehoowa tas tuu tayn leepe penutse wilst fer tëm sayn wile mache. (1 Phe. 4:2) Nochter, xprech mit te kortenatoer fon te elteste khërperxaft fon tayn kemaynt iwer tayn wunx iwer tich taafe lose. Tee tuut ferlange tas etliche elteste sich mit tich fersamele tuun, awer tuu prauchst khee pang hon sich mit tii fersamele. Tiise liipliche elteste khëne tich xon un liipe tich. Tii tuun mit tich ti haupste inlërnunge fon te Piipel woos tuu kelërnt host noo kuke. Tii wole sicher lose tas tuu ti inlërnunge richtich ferxtan host un ops tuu ferxteest wii wichtich ti tetikatsyoon un ti taaf sin. Wën se in ferxtan sin tas tuu fërtich pist, tuun se tich saan tas tuu in te neekst konkrës tich taafe lose khanst.

19-20. Was must tuu mache noo tayn taaf, un wii khanst tuu tas hin kriin?

¹⁹ Noo tayn taaf, was must tuu mache? Eriner tich tas ti tetikatsyoon een ferxpreche is un Yeehoowa waart tas tuu tas in halst. Tes weeche, noo tayn taaf, must tuu noo tayn tetikatsyoon leepe. Wii khanst tuu tas mache?

²⁰ Im eyerste plats, tuu tich wayter mit tayn kemaynt fersamele. Wëns tuu tich taafe lost, wërst tuu een teel fon een kroos pruuterxaft sin. (1 Phe. 2:17) Ti priiter un xwestere fon tayn kemaynt wëre tayn kaystlich familye sin. Wëns tuu imer in te fersamlunge keest, wërt tayn fraayntxaft mit tëne noch xtërker. Te tsweet, lees ti Piipel yeete taach un tenk aan tas triwer noo. (Psal. 1:1, 2) Noo tuu een xtik fon te Piipel kelees host, hool tsayt fer tiif noo tenke iwer was tuu kelees host. Soo, tuun ti wërter fon te Piipel tayn hërts aan krayfe. Te trit, ‘tuu wayter peete’. (Mat. 26:41) Wëns tuu hërtslich peetst, tuust tuu tich noch tichter pay Yeehoowa xafe. Te fiert, ‘tuu wayter Kot sayn Raych suuche’. (Mat. 6:33) Tuu khanst tas mache wëns tuu ti preetich aarwayt im eyerste plats in tayn leepe tuust. Wëns tuu reeklich in te preetich keest, wërt tayn klaape noch xtërker un tuu kriist keleechenheete fer anere helfe aach te weech fom eewiche leepe fine. (1 Tim. 4:16)

21. Was fer teere tuun sich uf mache wëns tuu tich taafe lost?

²¹ Ti ëntxlus tich tsu Yeehoowa tetikiire un tich taafe lose, is ti haupst ëntxlus woos tuu im leepe machst. Es is woer tas “khoste” tepay sin. Awer is es te weyert? Yaa, kans sicher! Ti kanse xwiirichkheete woos tuu in tiise alt welt mit machst, sin ‘khorts un laycht’. (2 Kor. 4:17) Uf te aner sayt, tayn taaf macht ti teere uf fer een frooer leepe xon hayt hon un fer “tas woere leepe” im futuer. (1 Tim. 6:19) Tes weeche, tenk kuut triwer noo un peet iwer ti antwort woos tuu fer tiise frooch kepst: “Sin ich fërtich fer mich taafe lose?”