XTUUTYUM ARTIKEL 10
Yeehoowa liipe un petanklich sin nëmt tsu te taaf
“Was hinert mich ketaaft se kepe?” (APHOSTELE SAYN KEXICHT 8:36)
LIIT 37 Ich tiine Yeehoowa mit mayn kans hërts
WAS TUUN MER SIIN? a
1-2. Soo wiis xteet in Aphostele sayn Kexicht 8:27-31, 35-38, was hot te etioper uf kemuut fer sich taafe lose?
HOST tuu lust fer tich taafe lose un een tisipel fon Kristus wëre? Fiil hon tiise ëntxlus kemacht. Was tii uf kemuut hot waar ti liip un petanklichkheet woo se iwich Yeehoowa hon. Kuk te payxpiil fon een aankexteltner woo kexaft hot fer ti kheenichin fon Etyoopya.
2 Noo tëm woo te etioper kelërnt hot was ti Xrifte saan, wolt tee klaych ketaaft wëre. (Lees Aphostele sayn Kexicht 8:27-31, 35-38.) Was hot tëm uf kemuut fer ketaaft wëre? Kans sicher hot tee fiil weyert tsu Kot sayn Wort kep, wayl tee waar am leese een xtik fon Isaiias sayn puuch uf sayn rees. Noo tëm woo tee mit Fiilip fertseelt hot, hot te etioper kroos petanklichkheet kexpiirt iwer ales was Yeesus fer iim kemacht hot. Awer warom waar te etioper noo Yeruusalem kereest? Wayl tee hot xon Yeehoowa keliipt. Meyer wise tas wayl tas kexicht saat tas tee weyer noo Yeruusalem kereest fer Yeehoowa aan peete. Tas ales tsaycht tas te etioper sayn klaape um ketrukt hot un hot raus kesuucht sich samele mit tas eensiche folek woo te woere Kot ketiint hot. Tee hot tiise ënerung kemacht weeche sayn liip tsu Yeehoowa. Ti selwich liip hot te etioper uf kemuut fer noch een wichtiche xrit kepe: sich taafe lose un Kristus sayne tisipel wëre. (Mat. 28:19)
3. Was khan yemant tsurik hale fer ketaaft wëre? (Kuk te khaste “ Was fer sort pootem is tayn hërts?”.)
3 Ti liip tsu Yeehoowa muut tich uf fer ketaaft wëre. Awer ti liip khan tich aach tsurik hale fer tas mache. Wii soo? Tenk mool aan etliche payxpiile. Im xtant liipst tuu soo aarich tayn ferwanter un fraaynte, woo net Yeehoowa sayn Tsayer sin, tas tuu angst host tas tii tich net mee kërn hëte noo tayne taaf. (Mat. 10:37) Orer khan sin tas tuu een kewoonheet host woo tich aarich kefalt, awer woo ferkheert is fer Kot, un khent net laycht sin fer im xtich lose. (Psal. 97:10) Orer, im xtant, host tuu fiil xeene aantenke fon te tsayt woos tuu kefayert host ti fayertaache fon te falxe relichyoone, woo Kot net kefale, un tes weeche khan es net laycht sin fer tich tas net mee mache. (1 Kor. 10:20, 21) Tes weeche, ti frooch woos tuu must tich mache is: ‘Was orer weer tuun ich mee liipe?’
TI WICHTICHER LIIP
4. Was tuut tich wërklich uf muute fer ketaaft wëre?
4 Too sin fiil tinge woos tuu liipst woo mache tas tuu petanklich pist. Tsum payxpiil, ti Piipel. Tas is meechlich tas eeps tuu aan kefang host xtutiire mit Yeehoowa sayn Tsayer, host tuu xon fiil respëkt iwich ti Piipel kehat. Un tuu host aach kelërnt Yeesus liipe. Un yets woos tuu Yeehoowa sayn Tsayer khënst, is es meechlich tas tuu froo pist unich tëne sin. Awer es is net tas woo macht tas tuu tayn leepe fer Yeehoowa ferxprechst un tich taafe lost. Was tich wërklich uf muut fer ketaaft wëre is ti liip woos tuu iwich Yeehoowa Kot xpiirst. Wëns tuu Yeehoowa liipst mee wii ale anere tinge, niks tuut tich tsurik hale fer tayn leepe tëm kepe. Un noo tayne taaf, ti liip woos tuu tsu Yeehoowa host kept tich kraft fer tich im weech fon te woerheet hale.
5. Was wole mer yets sin?
5 Yeesus hot kesaat tas mer mise Yeehoowa liipe mit unser kans hërts, seel, ferxtant un kraft. (Mar. 12:30) Was khanst tuu mache fer soo een xtark liip un respëkt tsu Yeehoowa hon? Tenkt aan wii liiplich Yeehoowa is mit tich. Tas wërt tich uf muute fer tee aach soo liipe. (1 Yo. 4:19) Tiise artikel kept foerxlache woo tich helfe khene tas mache un leet aach aus tas wëns tuu ti wichticher liip tsu Yeehoowa host, tan anere xpiirunge un aktsyoone khome in een natiirlich aat. b
6. Soo wii xteet in Romaaner 1:20, was is een aat fer lërne iwich Yeehoowa?
6 Lërn iwich Yeehoowa torich sayn kriatsyoon. (Lees Romaaner 1:20; Apo. 4:11) Tenk aan Yeehoowa sayn seer kroos kluucheet fer ti plantse un ti tiere mache. Lërn een pisye iwich ti wunerlich aat wii unser khërper xaft. (Psal. 139:14) Tenk aan ti kroos macht woo Yeehoowa in ti sun rin ketuun hot, woo is ploos een fon te pilyoone xtërne. c (Isa. 40:26) Tas sich ales iwerleye ferkreest tayne respëkt iwich Yeehoowa. Awer tas is net kenuuch ploos wise tas Yeehoowa kluuch un mechtich is. Tas is ploos een teel fom funtament fon unser fraayntxaft mit iim. Wëns tuu wilst tayn liip tsu Yeehoowa ferkreese, must tuu mee lërne iwich tëm.
7. Was fer sicherheet must tuu hon, fer tayn liip tsu Yeehoowa ferkreese?
7 Tuu must tich sicher sin tas Yeehoowa sich um tich khimert. Is es xweer fer tich se klaape tas te Kriatoer fom himel un fon te Eyert wees tas tuu eksistiirst un tas tee sich khimert mit tich? Wën tas soo is, erinert tich tas Yeehoowa ‘is net wayt wech fon yeete eene fon uns’. (Aph. 17:26-28) Tee tuut “ti hërtse noo kuke”, un tee ferxprecht tas, “wëns tuu tee suuchst, tee lost sich fon tich fine”. (1 Kro. 28:9) Sicher, xtutiirst tuu yets ti Piipel wayl Yeehoowa tich ticht tsu iim ketsoo hot. (Yee. 31:3) Soo fiil mee wiis tuu ferxteest ales was Yeehoowa kemacht hot fer tich, soo fiil kreeser wërt tayn liip tsu iim.
8. Wii khanst tuu tsayche tas tuu petanklich pist tsu Yeehoowa sayn liip?
8 Een aat woos tuu tsayche khanst tas tuu petanklich pist tsu Yeehoowa sayn liip is mit iim fertseele. In tayn kepeete, fertseelt Kot iwich was tuu tich ketanke machst, un iwich ti kuute tinge woo tee fer tich macht. Kept acht fer ti aat woo tee tayn kepeet antwort. (Psal. 116:1) Tas wërt tayn liip tsu Kot ferkreese un tayn fraayntxaft mit iim ferxtërke. Tuu krist noch mee sicherheet tas tee tich ferxteet. Awer fer ticht tsu Yeehoowa khome, must tuu ferxteen wii tee tenkt un was tee fon tich waart. Too is ploos een aat fer tiise khëntnis hon: sayn Wort, ti Piipel, xtutiire.
Ti Piipel xtutiire is te pest aat fer tichter tsu Kot khome un wise was tee fon uns wil (Kuk te apsats 9.) d
9. Wii khanst tuu tsayche tas tuu weyert tsu ti Piipel kepst?
9 Lërn weyert kepe tsu Kot sayn Wort, ti Piipel. Ploos ti Piipel saat ti woerheet iwich Yeehoowa un was tee wil fer tayne tsukhunft. Tes weeche, lees ti Piipel yeete taach. Perayt tich kuut foer fer tayn xtuutyum mit tayne leerer. Tuu aan wëne ales was tuu lërnst. Soo, tsaychst tuu tas tuu weyert kepst tsu Kot sayn Wort. (Psal. 119:97, 99; Yoo. 17:17) Host tuu tich een xtun raus kesuucht fer ti Piipel yeete taach leese? Halst tuu tas in?
10. Was is ploos in te Piipel?
10 Etwas woo ploos in te Piipel xteet is was ti layt, woo Yeesus perseenlich kekhënt hon, iwich tëm kexproch hon. Tas is tas eensiche puuch woo kenau aus leet was Yeesus fer tich kemacht hot. Lërne iwich ales was Yeesus kesaat un kemacht hot fer tich, wërt tich uf muute fer sayne fraaynt sin.
11. Was wërt tich helfe tayn liip tsu Yeehoowa ferkreese?
11 Lërn Yeesus liipe un tas wërt tich helfe Yeehoowa noch mee liipe. Warom? Wayl Yeesus xpiichelt kenau sayne Fater sayn kwaliteete. (Yoo. 14:9) Tes weeche, soo fiil mee wiis tuu lërnst iwich Yeesus, soo fiil peser wërst tuu Yeehoowa ferxteen un iim noch mee weyert kepe. Tenk mool wii Yeesus mitlaytich waar mit te layt woo ti anere sich net traan kekhimert hon — wii ti aarme, ti kranke un ti xwache. Tenk aach aan ti praktixe aan reete woo Yeesus kep hot un wii tayn leepe peser wërt wëns tuu aan wënst was tee saat. (Mat. 5:1-11; 7:24-27)
12. Yets woos tuu mee kelërnt host iwich Yeesus, was pist tuu uf kemuut fer se mache?
12 Tayn liip tsu Yeesus wërt aach sicher kreeser wëns tuu tenkst aan tas opfer woo tee kemacht hot, tas unser sinte khente fertsayert wëre. (Mat. 20:28) Ferxteen tas Yeesus fer yeete een fon uns kextorep is, khan tich uf muute fer tich peroye un ferlange tas Yeehoowa sol tich fertsaye. (Aph. 3:19, 20; 1 Yo. 1:9) Tan, soo mee wiis tuu Yeehoowa un Yeesus liipst, mee wilst tuu sin pay tëne woo tii aach liipe.
13. Was kept Yeehoowa tich?
13 Lërn Yeehoowa sayn familye liipe. Es khan sin tas tayn ferwanter un fraaynte, woo net Yeehoowa sayn tsayer sin, net ferxteen warom tuu tayn leepe tsu Yeehoowa kepe wilst. Tas khan sin tas se sich keeche tich xtele. Awer Yeehoowa lost tich net aleen: tee kept tich een spirituaal familye. Un wëns tuu tich halst mit te priiter un xwestere in te kemaynt, tan krist tuu ti liip un xuts woos tuu prauchst. (Mar. 10:29, 30; Hep. 10:24, 25) Mit te tsayt, ferlaycht wole tayn ferwanter aach Yeehoowa tiine un leepe soo wii ti Piipel saat. (1 Phe. 2:12)
14. Soo wii saat in 1 Yoohan 5:3, was host tuu kelërnt iwich Yeehoowa sayn kesetse?
14 Lërn respektiire un aan wëne Yeehoowa sayn kesetse. Eeps tuu kelërnt host iwich Yeehoowa, im xtant host tuu tayn aychne itee kehat iwich was richtich orer ferkheert is. Awer yets pist tuu tich sicher tas Yeehoowa sayn kesetse peser sin. (Psal. 1:1-3; lees 1 Yoohan 5:3.) Tenk aan ti aanreete woo ti Piipel kept fer ti mëner, fraae, eltere un khiner. (Ëfe. 5:22–6:4) Mënst tuu tas tiise aanreete helfe tayn familye frooe sin? Tenk aach was Yeehoowa saat iwich fraaynte raus suuche. Mënst tuu tas tiise aanreete aan nëme, hot tich keholef pesere kewoonheete hon? Xpiirst tuu tich yets frooer? (Xpr. 13:20; 1 Kor. 15:33) Woerxaynlich host tuu “yaa” keantwort fer tiise frooche.
15. Was helef tich wise was richtich orer ferkheert is?
15 Khan sin, als mool, tas tuu net wees wii aan wëne was tuu fon te Piipel lërnst. Tes weeche, torich sayn orkanisatsyoon, kept Yeehoowa piiplixe inlërnunge woo tich helfe wise was richtich orer ferkheert is. (Hep. 5:13, 14) Wëns tuu leest un xtutiirst tiise informatsyoone, wërst tuu siin tas se nutslich sin fer fiil situatsyoone woos tuu must um keen. Un sicher, tas wërt tich te wunx kepe fer teel mache in Yeehoowa sayn orkanisatsyoon.
16. Wii richt Yeehoowa sayn folek in?
16 Lërn Yeehoowa sayn orkanisatsyoon liipe un xtitse. Yeehoowa hot sayn folek in kemaynte in kericht, un sayne soon, Yeesus, is te khop fon te kemaynt. (Ëfe. 1:22; 5:23) Yeesus hot een kleene krup fon kesalpte mëner raus kesuucht fer in richte ti aarwayt woo tee wil tas hayt sol kemacht wëre. Yeesus nënt tiise krup mëner wii te “troy un ferninftiche sklaaw”. Un tii nëme ërnst aan sayn responsapiliteet fer tich kaystlich eneere un xitse. (Mat. 24:45-47) Een aat woo te troy sklaaw tich uf phast, is in tayn kemaynt elteste in setse woo khene tich lenke un xitse. (Isa. 32:1, 2; Hep. 13:17; 1 Phe. 5:2, 3) Ti elteste sin fërtich fer mache ales was meechlich is fer tich. Tii sin fërtich fer tich treeste un helfe een xtarke fraayntxaft hon mit Yeehoowa. Un tas haupste woo se mache khene is tich helfe anere layt in lërne iwich Yeehoowa. (Ëfe. 4:11-13)
17. Soo wiis in Romaaner 10:10, 13, 14 xteet, warom xpreche mer mit te anere iwich Yeehoowa?
17 Helef anere lërne Yeehoowa liipe. Yeesus hot kexikt sayn tisipele anere in lërne iwich Yeehoowa. (Mat. 28:19, 20) Meyer khente tas mache ploos wii een flicht, awer soo fiil kreeser wii unser liip tsu Yeehoowa wërt, xpiire mer uns wii ti aphostele Pheeter un Yoohan: “Meyer khene net noo lose se xpreche fon was mer kesiin un keheert hon.” (Aph. 4:20) Too is weenich tings woo mee frayt kept wii yemant helfe Yeehoowa liipe. Xtelt tich mool foer ti kroos frayt woo te tisipel Filip hat wii tee te etioper keholef hot ti woerheet fon te Xrifte ferxteen un sich taafe lose. Wëns tuu Filip sayn payxpiil noo machst, un preetichst, tan tsaychst tuu tas tuu wilst een fon Yeehoowa sayn Tsayer sin. (Lees Romaaner 10:10, 13, 14.) Tan is es meechlich tas tuu aach froochst wii te etioper: “Was hinert mich ketaaft se kepe?“ (Aph. 8:36)
18. Was wole mer in te neekste xtuutyum siin?
18 Ti wichticher ëntxlus woos tuu im leepe mache khanst is tich taafe lose. Wayl tas soo een ërnste xrit is, must tuu tich kuut iwerleye was ales mit te taaf tsu tuun hot. Was must tuu wise iwich ti taaf? Was must tuu foer un noo te taaf mache? Tiise frooche wëre keantwort im neekste artikel.
LIIT 2 Sayn naame is Yeehoowa
a Etliche woo Yeehoowa liipe hon tswayfele ep se fërtich sin fer sich taafe lose. Xpiirst tuu tich aach soo? Tan, is tiise xtuutyum fer tich. Tee wërt tich erinere etliche foerxlache woo tich helfe khene fer ti ëntxlus mache fer tich taafe lose.
b Ti mënxe sin unerxiitlich. Tes weeche, khene etliche ti foerxlache fon tiise xtuutyum in een aner sekwëns noo keen.
c Kuk mee payxpiile in ti piichelche A Vida — Teve un Criador? un A Origem da Vida — Cinco Perguntas Que Merecem Resposta.
d PILT Sayt 5: Een xwester kept een pleetche fer een fraa in een feere.
