Wën man un fraa in ekip xafe, sin se wii een luftxif pilot un kopilot woo te selwiche fliie plaan noo keen. Tan wëns propleeme kept, tenke se net ploos aan sich selepst, awer eene am anere.

WAS SAAT TI PIIPEL: “Soo sin se net mee tswaay, awer ploos een flayx.” (Matheus 19:6)

“Man un fraa mise mitsamer xafe fer een froo hayrat hon.” — Christopher.

Wën een xtrayt aan fangt, tuut tas pheyerche woo net in ekip xaft aan fange eene te anere sayn feeler tsayche, xtats te propleem in te ray xtele. Tan een propleem woo khent kleen sin, wërt kans kroos.

“In te hayrat, mitsamer xafe is aarich wichtich. Wën ich un mayne man net mitsamer xafe wii een ekip, tan sin mer ploos wii tswaay persoone woo mitsamer woone, un tas weyer een propleem fer wichtiche ëntxlise mache.” — Alexandra.

TENK MOOL NOO

• Meecht ich tenke tas tas kelt woo ich fertiine is “ploos mayns”?

• Meechts mich ploos kuut aan sin wën ich wayt weech sin fon mayne man orer fraa?

• Un soo kaar wën ich wees tas mayne man orer fraa sayn familye aarich kërn hot, meecht ich mich fon tëne wech hale?

XPRECHT EENE MIM ANERE

• In was, in unser hayrat, tuun meyer kuut mitsamer xafe wii een ekip?

• In was khene meyer uns ferpesere?

• Was mise meyer mache fer ferpesere?

FOERXLACHE

• Tenk mool aan een xpiil woos tuu un tayne man orer fraa eene keeche te anere xpiilt. Was mist teyer mache fer im selwich tiim xpiile?

• Xtats tenke: ‘Wii khan ich kewine?’, tenk: ‘Wii khene meyer tswaay kewine?’

“Fersuucht net pewayse weer richtich orer weer ferkheert is. Tas haupste is ti friit un ti eenichkheet in te hayrat hale.” — Ethan.

WAS SAAT TI PIIPEL: “Suucht net ploos ayre aychne interese, awer aach ti interese fon te anere.” (Filiper 2:3, 4)