Fertsaye petayt ferkese etwas xlechtes woo yemant uns kesaat orer kemacht hot un net fertrislich plaype. Awer tas petayt net tas tuu must mache als wën niks pasiirt weyer orer tas was te persoon kemacht hot waar net soo xlim kewees.

WAS SAAT TI PIIPEL: “Tuut aych wayter naner aus hale un krooshërtslich fertsaye, soo kaar wën yemant uersache hot fer sich keeche een aner peklaae.” (Koloser 3:13)

“Wëns tuu yemant liipst, tenkst tuu net ploos aan sayn feeler awer xtrengst tich aan fer siin was te persoon wil wëre.” — Aaron.

Wayter fertrislich sin khan xaate mache fer tayn fiisix un emotsyonaal kesuuntheet — un soo kaar tayn hayrat petrefe.

“Eene taach hot mayne man sich ëntxulticht weeche etwas woo tee kemacht hot woo mich fiil pelayticht hot. Tas waar net laycht tee fertsaye, awer ich hon tas kemacht. Ich peroye mich wayl ich tas net klaych kemacht hon. Meyer sin traurich keplip eene mim anere fer niks.” — Julia.

TENK MOOL NOO

Neekste mool woo tayne man orer fraa tich pelayticht, froo tich:

• ‘Kepe ich klaych pees? Meecht ich soo infintlich sin?’

• ‘Waar tas wërklich soo xlim kewees? Prauch te anere sich wërklich ëntxultiche orer khan ich tas ploos ferkese?’

XPRECHT EENE MIM ANERE

• Wii lang prayche mer fer eene te anere fertsaye?

• Was khene mer mache fer klaych uns fertsaye?

FOERXLACHE

• Wëns tuu pelaytich pist, tenk net tas tayne man orer fraa tas fer kërn kemacht hot.

• Fersuuch tayne man orer fraa fertsaye, un eriner tich tas “meyer al tuun fiil mools xtolpere”. (Tyako 3:2)

“Is laycht fertsaye wën ti tswaay ferkheert sin, awer is xweer tas mache wën mer tenke tas ploos te anere ferkheert waar. Tuu must wërklich teemuutich sin fer fertsaye.” — Kimberly.

WAS SAAT TI PIIPEL: “Tuu ti sache mit tëm fiks resolwiire.” (Matheus 5:25)