Flaysiche mënxe tsiie sich net tsurik fon te aarwayt. Tii xafe kërn fer sich selepst soriche un anere helfe. Un tii mache tas aach soo kaar wëns een aarwayt is woo khee kroos aansiin hot.

Op ma tas kërn hot orer net, tas leepe is fol mit flichte. Hayt se taach sin fiil layt woo net kërn xweer xafer. Awer flaysich sin, is aarich nutslich. (Eklesyastes 3:13)

“Ich hon kemërkt tas wën mer flaysich sin, xpiire mer uns tsufriite un tas mer weyert hon. Tas hot mich keholef kërn xafe. Eene kuute aarwayter sin macht tas ti anere uns kuut aan siin.” — Reyon.

WAS SAAT TI PIIPEL: “Yeete xweyer aarwayt pringt nuts.” (Xpriiche 14:23)

Ti neekste foerxlache helfe tich in een praktix aat ti aarwayt kuut aan siin.

Lërn ale tinge kuut mache un fray tich too mit. Ekaal ops tuu haus aarwayt orer xuul aarwayt machst, mach tas soo kuut wiis tuu khanst. Wëns tuu kelërnt host ti aarwayt kuut mache, tan fersuuch es xneler un noch peser mache. Soo fiil mee apiliteet wiis tuu host in een aarwayt, soo fiil mee kefalt es tich.

WAS SAAT TI PIIPEL: “Host tuu een man kesiin woo kuut sayn aarwayt macht? Tee xtelt sich uf foer kheeniche un net foer keweenliche layt.” (Xpriiche 22:29)

Tenk wii tayn aarwayt anere helfe khan. Wëns tuu kuut tayn aarwayt machst, is tas ti meyerst tsayt aach nutslich fer anere. Tsum payxpiil, wëns tuu flaysich tayn haus aarwayt machst, tan machst tuu tas laychter fer ti anere in tayn familye.

WAS SAAT TI PIIPEL: “Kepe pringt mee frooheet wii kriin.” (Aphostele sayn Kexicht 20:35)

Mach mee wii tayn flicht. Mach net ploos was tuu mache solst, mach mee wii tas woo se tich ferlange. Soo host tuu tayn leepe in kontrol, un tuust mee mache wayls tuu wilst, net wayl anere kexikt hon. (Matheus 5:41)

WAS SAAT TI PIIPEL: “Tayn kuut aktsyoon sol net kemacht wëre wayls tuu ketswung pist, awer fraywilich.” (Fileemon 14)

Say kemeesich. Kuute aarwayter sin net faul, awer tenke aach net ploos aan xafe. Tii sin kemeesich; tii fine tsayt fer flaysich xafe un aach fer aus ruue.

WAS SAAT TI PIIPEL: “Es is peser een hant fol mit ruu wii een topelte hant fol mit xweyer aarwayt un te wint noo xpringe.” (Eklesyastes 4:6)