Wën man un fraa een inlasung hon mit iire hayrat, wole se tas es fer imer hale sol, un tas kep tëne sicherheet. Tii waarte tas yeete eene imer respektiirt ti inlasung woo se sich iwer noom hon, soo kaar in xlime tsayte.

Etliche pheyerche xpiire tas se ketswung sin fer paysamer plaype wayl iire familye orer fraaynte tas soo wole. Awer es is fiil peser wën man un fraa sayn inlasung sich halt aan ti liip un te respekt woo eene mim anere hot.

WAS SAAT TI PIIPEL: “Te man sol sayn fraa net lose.” (1 Korinter 7:11)

“Wëns tuu inkelast pist mit tayn hayrat, tan tuust tuu net klaych tich ayre, un prauchst aach net lang fer ferkese un fertsaye. Tan sin ti propleeme woo khome ploos wii een xwiirichkheet un net wii een motiiw fer ti hayrat am ën mache.” — Micah.

Wëns propleeme kept, tas pheyerche woo khee inlasung hot, tuut klaych tenke tas se net kemacht sin woer eene fer te anere, un suuche klaych aate fer ti hayrat am ën mache.

“Fiil layt woo hayrate tenke tas wëns net keet, khene se aus naner keen. Awer wën yemant soo tenkt, fangt sayn hayrat xon aan oone inlasung.” — Jean.

TENK MOOL NOO

Wën teyer xtrayt . . .

• Tenkst tuu tas weyer peser kewees net hayrate mit tiise man orer fraa?

• Xtelst tuu tich foer wii tas weyer mit een anere persoon ferhayrat sin?

• Saast tuu etwas wii “kenuuch fer mich” orer “ich suuche mich een anere woo mich mee weyert kept”?

Wëns tuu keantwort host “yaa” fer een orer mee fon tiise frooche, tan must tuu ferxtërke ti inlasung in tayn hayrat.

XPRECHT EENE MIM ANERE

• Meecht mer weeniche inlasung hon eene mim anere wii eyerst? Wën ti antwort yaa is, tan mist iir raus fine was pasiirt is.

• Was mise mer mache fer unser hayrat ferxtërke?

FOERXLACHE

• Xrayp, als mool, een liipliche priifche fer tayne man orer fraa.

• Xtel pilter fon tayne man orer fraa uf tayne aarwayts tix. Tas is een aat fer tsayche tas tuu tayn hayrat respektiirst.

• Ruuf tayne man orer fraa yeete taach aan. Macht tas wëns tuu xafst orer wën teyer wayt eene fom anere sayt.

WAS SAAT TI PIIPEL: “Was Kot unich tas selwiche yoch ketuun hot, sol te man net aus naner mache.” (Matheus 19:6)