Fer Ti Yunge
9: Itentiteet
WAS PETAYT TAS?
Itentiteet is fiil mee wii ploos tayn naame un wiis tuu aus siist. Tas hot aach tsu tuun mit tayn moraalixe muster, was tuu klaapst un tayn personaliteet. Tayn itentiteet is ales was tuu pist — inwënich un auswënich.
WAROM IS TAS WICHTICH?
Wëns tuu kenau weest weer tuu pist un weest was wichtich is fer tich, tan kepst tuu net uf was tuu klaapst un lost tich net fon tayn koleke in reete.
“Fiil layt sin wii xaufenste poope. Tii suuche sich net raus tas tsaych woo se aan tsiie; anere mache tas fer tëne.” — Adrian.
“Ich hon kelërnt mich fest xtele fer tas was richtich is, soo kaar in xwiirichkheete. Ich wees weer mayn woere fraaynte sin tëm noo wii se sich aan xtele un wii ich mich aan xtele wën ich pay tëne sin.” — Courtney.
WAS SAAT TI PIIPEL: “Lost net tiise welt aych wayter mustere; xtats tas, ferënert aych un macht ayre ferxtant nay.” (Romaaner 12:2)
WAS KHANST TUU MACHE?
Kuut khëne tayn xtarke un xwache phunkte un was tuu klaapst helef tich raus fine weer tuu yets pist un weer tuu wilst wëre. Antworte ti neekste frooche khan tich helfe.
Xtarke phunkte: Was fer kuute tinge tuun ich mache? Was fer apiliteete hon ich? Tsum payxpiil: ‘Sin ich phinktlich? Hon ich selepst kontrol? Sin ich flaysich? Sin ich krooshërtslich? Was mache ich fer ti anere?’
FOERXLACH: Is es tich xweer tayn xtarke phunkte raus fine? Tan froo tayn eltere orer een kuute fraaynt was fer xtarke phunkte tii aan tich mërke, un warom tas se soo tenke.
WAS SAAT TI PIIPEL: “Yeete eene sol sayn aychne aktsyoone noo kuke. Un tan, tuut eyer sich fraye ploos weeche was eyer selepst kemacht hot, oone sich mit yemant aneres ferklayche.” (Kalater 6:4)
Xwache phunkte: Was mus ich in mayn personaliteet ferpesere? In was fer situatsyoone is es xweer fer mich een fersuuchung phake? In was prauch ich mee selepst kontrol hon?
WAS SAAT TI PIIPEL: “Wën mer saan: “Mer hon khee sint”, tuun mer uns selepst hiner keen un ti woerheet is net in uns.” (1 Yoohan 1:8)
Aan was klaape ich: Was is richtich orer ferkheert fer mich? Warom tenke ich soo? Klaape ich aan Kot? Was kept mich ti sicherheet tas Kot eksistiirt? Was is unkerecht fer mich? Un warom? Was tenke ich wii te tsukhunft sol sin?
WAS SAAT TI PIIPEL: “Tas kuute ferxtant tuut tich uf phase un tas ferxtëntnis tuut tich xitse.” (Xpriiche 2:11)
