Kuut komunikatsyoon pasiirt wëns tuu un tayn khiner saat eene tsum anere was teyer tenkt un xpiirt. Kuut komunikatsyoon tswixich khiner un eltere petayt tas se iwer iire ketanke un xpiirunge eerlich xpreche.

Ti komunikatsyoon khan net laycht sin mit te yunge. Khan sin tas net lang tsurik wust tuu ales iwer tëne sayn leepe, tas waar als wëns tuu khenst een teer uf mache un rin keen wëns tuu wolst, awer yets is es als wën ti teer tsu kexlos weyer, un es is een tuun wii fiil tuu klopst, tii keet als mool net uf. Wëns aach net soo aus siit, awer tas is ti tsayt woo tayn khint mus fiil mee wii eyerst mit tich fertseele.

Say imer fërtich fer tayn khiner heere. Tas khan petayte mit tayn khint xpreche xpeet in ti nacht.

“Fiilaycht wilst tuu saan: ‘Yets wilst tuu mit mich xpreche? Te kanse taach waare mer mitsamer!’ Awer meechte mer uns wërklich pexweere wën unser khiner wole eerlich mit uns xpreche? Is tas net was ti eltere wole tas ti khiner mache sole?” — Lisa.

“Mayne xloof is wichtich fer mich, awer etliche fon te peste kexpreeche woo ich mit mayn yunge khiner hat, waare noo ti halp nacht.” — Herbert.

WAS SAAT TI PIIPEL: “Yeete eene sol net ploos aan sayn aychne nuts tenke, awer aan te nuts fon te aner.” (1 Korinter 10:24)

Kep acht. Eene fater hot kesaat: “Manich mool wën mayn khiner mit mich am xpreche sin, tenke ich aan anere tinge, un tii mërke klaych wën ich khee acht kepe!”

Wën tas selwiche mit tich pasiirt, mach ti TV, tayn selulaar un tablet aus. Kep acht fer tas was tayn khint am xpreche is. Tsaych tas tuu tich khimerst mit was tee mit macht, aach wën sayn soriche net soo xlim aus siin.

“Meyer mise tsayche fer unser khiner tas iire xpiirunge wichtich fer uns sin. Wën se net sicher sin too triwer, tuun unser khiner uns niks mee saan orer suuche se anere fer tëne helfe.” — Maranda.

“Tuu net pees wëre, wën ti aanung fon tayn khiner net soo richtich sin.” — Anthony.

WAS SAAT TI PIIPEL: “Kep acht wii iir horicht.” (Lukas 8:18)

Penuts unerxiitliche situatsyoone. Als mool fine ti yunge tas laychter xpreche mit sayn eltere wën se net tirëkt foer tëne xteen orer setse.

“Wën meyer im auto am faare sin, penutse mer ti tsayt fer fertseele. Wayl mer neewich naner setse, is es laychter fer fertseele.” — Nicole.

Ti tsayt fer ese is aach een aner oportuniteet fer een kuut kexpreech hon.

“Wën meyer nacht ese, penutse mer fer eene tëm anere fertseele was tas pestes un tas xlechtes waar woo im taach pasiirt is. Tas macht uns eenich un kept sicherheet tas mer net aleen sin fer mit unser propleeme um keen.” — Robin.

WAS SAAT TI PIIPEL: “Sayt al xnel fer se heere, awer lamsam fer se xpreche.” (Tyako 1:19)