Moraalixe muster is was mer klaape un was unser leepe lenkt. Tsum payxpiil, kans sicher xtrengst tuu tich aan fer imer eerlich sin. Tan wilst tuu tayn khiner in lërne fer aach soo sin.

Moraalixe muster hon aach tsu tuun mit flaysich un kerecht sin, un aach net ploos aan sich selepst tenke — tas is laychter tas lërne wën ma noch yung is.

WAS SAAT TI PIIPEL: “Lërn tas khint in tëm weech woos keen sol; aach wën es alt wërt, tuut es sich net too tefun ap lenke.” (Xpriiche 22:6)

Moraalixe muster hon is aarich wichtich in een tsayt mit soo fiil teknoloxii. Een muter woo Karen heest, saat: “Im selulaar khan ma tsu yeete tsayt tings fine woo net ferninftich is. Unser khiner khene neewich uns sin un meyer mërke net tas se etwas imoraalix kuke.”

WAS SAAT TI PIIPEL: “Rayfe mënxe, ... sayne ferxtant keiipt hon fer se wise ti unerxiit tswixich was richtich un was ferkheert is.” (Hepreeyer 5:14)

Aan anere tenke is wichtich. Tas hot tsu tuun mit sich kuut aan xtele, wërter penutse wii “pite” un “tanke xeen”. Un aach interes aan anere tsayche, tas is etwas woo ma net oft siit, wayl ti layt hon mee interes aan eletroonixe aparate wii aan mënxe.

WAS SAAT TI PIIPEL: “Ales was teyer wolt tas ti mënxe fer aych mache sole, macht tas in te selwich aat fer tëne.” (Lukas 6:31)

Mach tayn moraalixe muster taytlich. Tsum payxpiil, etliche unersuucher tsayche tas wën ti eltere taytlich fer iire khiner tsayche tas es ferkheert is sëks foer ti hayrat mache, tan is tas tsiimlich sicher tas ti khiner tiise oryentiirung aan nëme.

FOERXLACH: Penuts een notisye orer etwas woo pasiirt is fer iwich moraalixe muster mit tayn khiner xpreche. Wën ti notisye xprecht iwich wyolënts weeche prekonseyt, tan khanst tuu saan: “Tas is soo xreklich siin tas etliche layt anere soo hase. Was mënst tuu, warom tuun ti layt soo was xlechtes mache?”

“Wën eene yunge net wees was richtich orer ferkheert is, tan is es net laycht fer tëm ëntxlise mache iwich was richtich orer ferkheert is.” — Brandon.

Lërn tayn khiner in fer aan anere tenke. Soo kaar kleene khiner khene lërne “pite” un “tanke xeen” saan un sich mit anere khimere. Een puuch a woo xprecht iwich khiner tsiie, saat: “Tas is kuut tas ti khiner ferxteen tas se teel mache in etwas kreeses — een familye, een xuul, een nochperxaft — wayl tan is es laychter fer tëne kuutes mache fer anere un net ploos fer sich selepst.”

FOERXLACH: Kep tayn khiner kleene haus aarwayte. Soo tuun se lërne tas es wichtich is etwas mache fer anere helfe.

“Wën unser khiner yets sich aan keweene kleene haus aarwayte mache, tan xpeeter hin wën se aleen woone keen, wise se wii mit sayn responsapiliteete um keen.” — Tara.