Fer Ti Yunge
12: Opjetiiwe
WAS PETAYT TAS?
Opjetiiwe sin mee wii winxe. Een opjetiiw hon petayt pleene, noo kepe wëns neetich is un aanxtrengung.
Unser opjetiiwe khene sin fer een khorts tsayt, was mer mache khene in phaar taache orer woche. Fer een mite tsayt, was mer mache khene in phaar moonate, un aach fer lang tsayt, woo khan een yoer orer lënger taure fer erfiile. Opjetiiwe woo khene lënger taure, khene mer torich kleenere opjetiiwe erfiile.
WAROM IS TAS WICHTICH?
Tayn opjetiiwe erfiile khan tayn fraayntxafte ferxtërke un tich mee selepst fertraung un frooheet kepe.
Selepstfertraung: Wëns tuu kleenere opjetiiwe erfiilst, kriist tuu mee selepst fertraung fer kreesere opjetiiwe erfiile. Tan pist tuu aach peser foer perayt fer um keen mit xwiirichkheete woo taach tsu taach foer khome, soo wii unertrikung fon koleke.
Fraayntxafte: Layt sin kërn samer mit tëne woo opjetiiwe im leepe hon, woo wise was se wole un sich aan xtrenge fer tas erfiile. Tsum payxpiil, wëns tuu un een fraaynt te selwich opjetiiw hon, mitsamer xafe fer tas erfiile, ferxtërkt ayre fraayntxaft.
Frooheet: Wëns tuu tayn opjetiiwe erfiilst, tan khanst tuu tich fraye.
“Ich fraye mich wën ich opjetiiwe hon. Tan hon ich imer etwas tsu tuun un tas kept mich een richtung im leepe. Un wën ma te opjetiiw erfiilt, xpiirt ma sich kuut wën mer tsurik kukt un tenkt: ‘Xeen! Ich hons hin kriit.’” — Christopher.
WAS SAAT TI PIIPEL: “Weer noo tëm wint kukt un waart uf tas phasente weter, tuut nii seeye un aach niks ënte.” (Eklesyastes 11:4, Bíblia na Linguagem de Hoje)
WAS KHANST TUU MACHE?
Ti neekste foerxlache helfe tich opjetiiwe hon un tii erfiile.
Mach een list. Xrayp uf tayn opjetiiwe, suuch raus was fer eene tuu eyerst erfiile wilst, tan suuch raus te tsweete, te trite un soo foran.
Mach tich een plaan. Fer yeete opjetiiw:
-
Xtel een realistix tsayt fer tas erfiile.
-
Pleen yeete xrit woos tuu kepe must.
-
Tenk aan ti xwiirichkheete woos kepe khan un wii mit tëne um keen.
Tan fang aan. Waart net pis tuu yeete kleenichkheete kepleent host fer tan aan fange. Froo tich: ‘Was is tas eyerste woo ich mache mus fer mayn opjetiiw erfiile?’ Tan mach es. Xrayp uf yeete foerxrit woos tuu kepst.
WAS SAAT TI PIIPEL: “Tëm flaysicher sayn pleen kepe sicher kuute resultaate.” (Xpriiche 21:5)
