Eltere woo een kuut payxpiil sin, mache was se in lërne. Tsum payxpiil, wën eltere xike iire khiner saan tsu yemant woo aan iire teer xteet tas se net tehëm weyere, tan khan ma net waarte tas tas khint aach imer ti woerheet xprecht.

“Oft heert ma saan: ‘Mach was ich saan awer net was ich mache.’ Awer tas pariirt net mit te khiner. Tii kuke sich ales ap was mer saan un mache. Wën mer tëne etwas in lërne un mer selepst mache tas net, tan tuun se uns tas klaych pekhant mache.” — David.

WAS SAAT TI PIIPEL: “Tuu woo preetichst: ‘Xteel net’, xteelst?” (Romaaner 2:21)

Khee eene khan ti khiner un soo kaar ti yunge in reete wii ti eltere. Tes weeche, sayt teyer, eltere, ti peste persoone fer ayre khiner in lërne mache was richtich is. Awer sicher, teyer selepst mist aach mache was teyer in lërnt.

“Meyer khene tausent mool tas selwiche saan tsu ti khiner un ma wees net op se horiche. Awer wën mer een eensich mool net mache was mer in lërne, pringe se tas uns klaych foer. Ti khiner kepe acht tsu ales was mer mache, soo kaar wën mer tenke tii teete khee acht kepe.” — Nicole.

WAS SAAT TI PIIPEL: “Awer ti kluucheet fon owe is . . . net falx.” (Tyako 3:17)

Tenk aan was fer moraalixe muster tayn leepe lenke. Was fer sorte filme un prokrame kukst tuu kërn? Wii pehantelst tuu tayn familye? Was fer sorte fraaynte host tuu? Khimerst tuu tich mit te anere? In khortse wërter, khanst tuu tich frooe: Meecht ich soo een sort persoon sin wii mayn khint sol sin?

“Mayne man un ich ferlange niks fer unser khiner woo meyer selepst net mache.” — Christine.

Sich ëntxultiche. Ti khiner wise tas iire eltere net perfekt sin. Wëns tuu tich ëntxultichst mit tayn familye wëns neetich is, kepst tuu een kuut payxpiil fon teemuut un eerlichkheet.

“Tas is kuut wën unser khiner uns heere saan tas mer ferkheert sin un uns ëntxultiche. Wën meyer tas net mache, tan tuun tii aan fange iire aychne feeler ferxtekle.” — Robin.