Wën man un fraa sich respektiire, pehantele se eene te anere mit liip, soo kaar wën se net in ales xtime. Tas puuch Tseen lisyoone woo khan tayn hayrat ferënere a saat iwer pheyerche woo sich respektiire: “Tiise pheyerche tuun net eene te anere tswinge imer aan nëme was eene saat. Tii fertseele iwich was se net iwer eens khome un horiche mit respekt, tan mache se was kuut is fer ti tswaay.”

WAS SAAT TI PIIPEL: “Ti liip . . . suucht net sayn aychne interese.” (1 Korinter 13:4, 5)

“Mayn fraa respektiire petayt erkhëne iire weyert un niks mache woo khent tëne orer unser hayrat xaate mache.” — Micah.

Wën khee respekt is, tuut tas pheyerche sayn kexpreech fol wëre mit xtichlaray, piter wërter un eene te anere niter setse — etliche spesyaliste saan tas tiise tinge sin tsayche tas ti hayrat khan am ën keen.

“Piter wërter, xtichlaray orer xpote iwich tayn fraa khan mache tas se sich weenicher xpiirt, tas se nii mee uf tich traut un macht xaate tsu ayre hayrat.” — Brian.

TENK MOOL NOO

Torich een woch kep acht tsu was tuu saast un machst. Tan antwort:

• ‘Wii oft hon ich etwas xlechtes keeche mayne man orer fraa kesaat? Wii oft hon ich tee orer tii keloopt?’

• ‘In was fer aate hon ich tëm orer tëne mayne respekt ketsaycht?’

XPRECHT EENE MIM ANERE

• Was fer wërter un aktsyoone khente mache tas yeete eene sich respektiirt xpiire teet?

• Was fer wërter un aktsyoone khente mache tas yeete eene sich net respektiirt xpiire teet?

FOERXLACHE

• Xrayp uf tray tinge woo tayne man orer fraa mache khent tas tuu tich respektiirt xpiirst. Yeete eene mus sayn aychne list mache un tëm anere ap kepe. Noochte, xtrengt aych aan fer mache was te anere ferlangt hot.

• Mach een list mit tinge woos tuu kërn host aan tayne man orer fraa. Noochte, saat eene tsum anere wii xeen iir tiise kwaliteete fint.

“Mayne man respektiire petayt tsayche in aktsyoone tas ich tëm weyert kepe un wil tas tee sol froo sin. Tas prauch net etwas krooses sin. Als mool, kleene tinge khene tsayche woere respekt.” — Megan.

Tsum xlus, te phunkt is net ops tuu tenkst tas tuu te anere respektiirst, awer op te anere sich respektiirt xpiirt.

WAS SAAT TI PIIPEL: “Tsiit aych aan mit liiplich mitlayt, fraayntlichkheet, teemuut, tsaamheet un ketult.” (Koloser 3:12)