Fer Ti Eltere
6: Tisipliin
WAS PETAYT TAS?
Tisipliin khan petayte lenke orer in lërne. Manich mool is aach korikiire een khint woo etwas net richtich kemacht hot. Awer oft mools tisipliin is tas khint in lërne te unerxiit fon was richtich orer ferkheert is. Soo tuut tas khint lërne kuute ëntxlise mache.
WAROM IS TAS WICHTICH?
In ti letste yoore, siits aus tas etliche eltere net sayn khiner tisipliniire. Tii hon pang tas wën se tas mache teete, khente ti khiner sich niter kesetst xpiire un mit weenich weyert. Awer eltere woo kluuch sin xtele reekele woo kemeesich sin un lërne sayn khiner in fer tii aan heere.
“Ti khiner prayche krense hon fer kemeesiche auskewaksne layt wëre. Oone tisipliin, sin tii wii een xif oone kelenk woo mit te tsayt ti richtung ferliirt un soo kaar uner keet.” — Pamela.
WAS KHANST TUU MACHE?
Hal tayn wort in. Wën tayn khint net tayn reekele aan heert, tan must tuu tee korikiire. Awer wën tayn khint tich aan heert, must tuu tee loope.
“Ich loope imer mayn khiner wayl se folich sin in een welt woo tas net macht. Wën meyer ti khiner loope, fine se laychter ti tisipliin aan nëme.” — Christine.
WAS SAAT TI PIIPEL: “Tas was te mënx seet, tas tuut eyer aach ërnte.” (Kalater 6:7)
Say kemeesich. Kep fer tayn khint een tisipliin woo sich xteet mit sayn elter un mit was tee kemacht hot. Manich mool tisipliin pringt peser resultaat wëns mim feeler tsu tuun hot. Een payxpiil, khan sin tas tas khint net aan heert tayn reekele iwich te selulaar penutse; tuu khanst ëntxlise tas tee weenicher te selulaar penutse thërft orer tëm sayn selulaar wech hoole fer een tsayt. Un noch, wën tayn khint net soo was xlimes kemacht hot, mach net fon etwas kleenes was krooses.
“Ich fersuuche ferxteen op mayn khint net keheert hot wayl tee net wolt orer hot tas kemacht oone tenke. Es is een unerxiit tswixich ploos een mool te feeler mache un imer te selwiche feeler mache, un tas mus korikiirt wëre.” — Wendell.
WAS SAAT TI PIIPEL: “Teyer feter, tuut ayre khiner net ayere, tas se net te muut ferliire tuun.” (Koloser 3:21)
Say liiplich. Ti khiner fine laychter ti tisipliin aan nëme wën se xpiire tas sayn eltere se liipe.
“Wën unser soon een feeler kemacht hot, waare mer keweent saan tas meyer uns fraye iwer ti kuute ëntxlise woo tee xon kemacht hot. Meyer hon aus keleet tas wën tee ales mache teet fer ti tinge in te ray lose, tas teet net sayn leepe xpeeter hin petrefe, un meyer weyere imer mit iim fer iim helfe.” — Daniel.
WAS SAAT TI PIIPEL: “Ti liip is ketultich un kuut.” (1 Korinter 13:4)
