Fer Ti Yunge
10: Yemant woo ma truf traue khan
WAS PETAYT TAS?
Layt woo ma truf traue khan sin tii woo reekele aan heere, mache was se ferxpreche un saan imer ti woerheet. Tes weeche tuun sayn eltere, fraaynte un xëfe uf tëne traue.
WAROM IS TAS WICHTICH?
Soo fiil mee wiis tuu tsaychst tas ti layt uf tich traue khene, mee frayheet kriist tuu.
“Tayn eltere tuun imer mee uf tich traue wëns tuu tsaychst tas tuu alt kenuuch pist fer etwas mache un host responsapiliteet net ploos wën tii ticht pay tich sin.” — Sarahi.
WAS SAAT TI PIIPEL: “Soo wërts fer al taytlich tas tuu am foran keen pist.” (1 Timoteus 4:15)
WAS KHANST TUU MACHE?
Wëns tuu wilst tas ti layt mee uf tich traue orer noch mool uf tich traue, tan khene tiise foerxlache tich helfe.
Say eerlich. Niks tuut ti fertraung xneler fernichte wii liieray. Tas keeche teel is aach woer. Wëns tuu imer eerlich pist, hauptseechlich wëns tuu was ferkheertes machst, tan tuun ti layt uf tich traue.
“Es is laycht eerlich sin wën ales kuut keet. Awer eerlich sin wëns tuu etwas kemacht host woo khan tayn naame trekich mache, tas macht te unerxiit. Tas heleft ti layt uf tich traue.” — Caiman.
WAS SAAT TI PIIPEL: “Wayl mer uns in ale tinge eerlich aan xtele wole.” (Hepreeyer 13:18)
Tsaych tas tuu responsapiliteet host. Een unersuuchung in Nort Amërika, woo kemacht is woer mit layt woo aarwayte aan nëme, tsaycht tas 78% hon kesaat tas een fon te tray haupste kwaliteete fer naye aarwayte is responsapiliteet hon. Noochte wëns tuu auskewakst pist, wërst tuu siin wii tas kuut waar lërne responsapiliteet hon fon yung aan.
“Mayn eltere mërke wën ich responsapiliteet hon un mache mayn haus aarwayt oone tas se mise hiner mich xteen. Soo fiil mee ich responsapiliteet tsayche, mee tuun se uf mich traue.” — Sarah.
WAS SAAT TI PIIPEL: “Ich sin mich sicher tas tuu machst was ich tich ferlange; . . . ich wees tas tuu noch mee machst wii ti tinge woo ich tich saan.” (Fileemon 21)
Say ketultich. Al mërke se klaych wën eene yunge khërperlich kreeser wërt. Awer oft mools nëmt es tsayt tas ti layt mërke tas te yunge rayfer un ërnster kewoer is.
“Tayn eltere un anere tuun net uf tich traue ploos wayl se een mool uf tich sich ferlose khonte. Awer, wën se imer sich uf tich ferlose khene, tuun se lamsam aan fange uf tich traue.” — Brandon.
WAS SAAT TI PIIPEL: “Fersuuch imer leepe . . . mit ketult.” (Koloser 3:12, Bíblia Fácil de Ler)
