Meyer khene traue uf een persoon woo responsapiliteet hot. Tee is flaysich un phinktlich in sayn flichte.

Soo kaar kanse kleene khiner khene lërne responsapiliteet hon. Een puuch woo xprecht iwich khiner tsiie, saat: “Tas khint ëntwikelt ti kapasiteet fer helfe wëns unkefeer 1 yoer un 3 moonate is, un wën se 1 un halp yoer alt is, tan wil se xon helfe in ti aarwayt woo ti layt um iir rom mache.” Tas puuch saat foran: “In fiile kultuer, khiner fon 5 pis 7 yoer wëre in kelërnt fer in haus aarwayt helfe, un soo kaar wën se kans kleen sin, khene se kans kuut helfe in fiile aktiwiteete.” a

Fiil yunge woo xon auskewakst sin keen fon tehëm faart, awer xpeeter keen se noch mool woone mit iire eltere weeche ti xwiirichkheete un propleeme in iire leepe. Kans oft pasiirt tas wayl tiise yunge net kelërnt hon mit kelt um keen, een haus uf phase orer iire responsapiliteete erfiile.

Tes weeche, is es peser yets tayn khint in lërne fer tas se responsapiliteet hot wën tee auskewakst is. Tas puuch Wii auskewaksner mënxe tsiie b saat: “Tuu wërst net wole tas tayne puup aan tich hëngt pis se 18 yoer alt is, un tan waarte tas tee aleen sich khimere sol in ti reaal welt.”

Kep haus aarwayte fer tayn khint.

PIIPLIX ORYENTIIRUNG: “Yeete xweyer aarwayt pringt nuts.” (Xpriiche 14:23)

Kleene khiner tuun kërn etwas mit iire eltere mache. Tuu khanst tiise lust penutse fer tayn khint kleene aarwayte iwer kepe.

Etliche eltere wole net ti khiner haus aarwayt iwer kepe wayl se tenke tii hëte xon soo fiil xuul aarwayt fer mache.

Awer tas khint woo heleft haus aarwayt mache, hot een peser xans fer kuut foran in ti xuul khome. Tas pasiirt wayl tas haus aarwayt mache heleft tas khint responsapiliteet sich iwer nëme. Tas puuch woo kenënt is woer am aanfang fon tiise artikel saat noch: “Wën mer khee acht kepe tsu ti lust woo tas khint hot fer helfe, khan im xtant mache tas se tenkt tas anere helfe net wichtich is . . . fangt aan se tenke tas ti anere hon ti flicht fer iim petiine.”

Tas petayt, wën ti khiner haus aarwayt mache, lërne se anere layt helfe un net ekoiistix sin. Tii ferxteen aach tas iire flicht mache is wichtich fer ti kans familye.

Lërn tayn khint aan nëme ti responsapiliteet iwich ti feeler woo eyer macht.

PIIPLIX ORYENTIIRUNG: “Heer te aanreet un nëm ti tisipliin aan, fer in te tsukhunft kluuch se wëre.” (Xpriiche 19:20)

Wën tayn khint een feeler macht fersuucht net ferxtekele was tee kemacht hot. Ti khiner khene um keen mit te konsekwënse fon iire feeler. Tsum payxpiil, wën tayn khint etwas ferprecht woo een aner keheert, khan eyer sich ëntxultiche orer tsurik petsaale was se ferproch hot.

Ti responsapiliteet iwich sayn feeler sich iwer nëme wërt tayn khint helfe:

• ti woerheet saan

• net ti anere ti xult kepe

• khee ausrete suuche

• sich ëntxultiche wëns neetich is