Weer teemuutich is respektiirt ti anere, tee is net arokant un mënt net tas se mist peser pehantelt wëre wii ti anere. Tee khimert sich aach hërtslich mit anere un is wilich fer fon te anere lërne.

Etliche tenke tas te teemuutich xwach is. Awer, in woerheet, tee is xtark wayl ma prauch koraaj fer ti feeler aan nëme un ferxteen tas es tinge kept woo ma net kemacht kriit.

• Weer teemuutich is hot mee fraaynte. Tas puuch Epitemii fon Narsisiismus a saat tas, “ti meyerst tsayt, tii woo teemuutich sin tuun sich peser kepe mit anere” un “ferxteen peser ti anere”.

• Weer teemuutich is wërt een peser tsukhunft hon. Lërne teemuutich sin wërt tayn khint helfe yets un aach im tsukhunft — tsum payxpiil, wën eyer sich een aarwayt suucht. Tokter Leonard Sax saat: “In een aarwayt entrewist, kans sicher een yunge woo tsu fiil uf sich selepst rechent un erkhënt net sayn krense, wërt net kuut aan kesiin. Awer, wën te yunge foerxlache aan nëmt fon tëne woo te entrewist macht, wërt tee peser xans hon fer ti aarwayt kriin.” b

Helef tayn khint sich selepst mit moos aan siin.

PIIPLIX ORYENTIIRUNG: “Wën yemant tenkt tas eyer etwas is, wën tee in woerheet kaar niks is, tuut eyer sich selepst hinerkeen.” (Kalater 6:3)

• Phas uf fer net tayn khint hiner keen. Saan “Al tayn treeme khene woerheet wëre” un “Tuu khanst ales wëre was tuu wilst” khan sich aan heere wii etwas ufmuutiches, awer ti meyerst tsayt pasiirt tas net soo. Tayn khint hot een kreeser xans fer froo sin wën eyer realistixe tsiile hot un xtrengt sich aan fer se erayche.

• Peser wii tayn khint loope, is loope was tee macht. Imer tsu saan fer tayn khint tas tee te peste is, wërt tee net helfe teemuutich sin. Tes weeche, loop etwas spetsiifixes woo tee kemacht hot.

• Kontroliir wii tayn khint sotsyaale weepe penutst. Ti meyerst tsayt, penutse ti layt sotsyaale weepe fer sich proose iwich was se hon un was se mache khene. Tas is tas keeche teel fon teemuut.

• Muut uf tayn khint fer sich ëntxultiche. Helef tayn khint ferxteen was tee ferkheert kemacht hot, aan nëme te feeler un sich ëntxultiche soo xnel wii meechlich.

Lërn tayn khint in fer imer petanklich sin.

PIIPLIX ORYENTIIRUNG: “Tsaycht aych petanklich.” (Koloser 3:15)

• Helef iim weyert kepe tsu ti natuer. Tas is kuut wën ti khiner weyert tsu ti natuer kepe un ferxteen tas mer tii prayche, wayl oone luft, waser un ese khene mer net leepe. Xpreche iwich tiise tinge heleft tayn khint respektiire un weyert kepe tsu was Kot kemacht hot un petanklich sin.

• Lërn tayn khint weyert tsu ti mënxe kepe. Eriner tayn khint tas es imer yemant kept woo peser in etwas is wii tee. Xtats nayt hon iwich tiise layt, khan tee weyert kepe tsu tëne iire apiliteete un fon tëne lërne.

• Say petanklich. Lërn tayn khint, net ketswung, awer hërtslich saan “tanke xeen”. Petanklich sin is te aanfang fon te teemuut.

Lee aus fer tayn khint tas es kuut is etwas fer ti anere tuun.

PIIPLIX ORYENTIIRUNG: “Mit teemuut, tenkt aan te anere wii kreeser wii teyer selepst, suucht net ploos ayre aychne interese, awer aach ti interese fon te anere.” (Filiper 2:3, 4)

• Lërn tayn khint helfe ti haus aarwayt mache. Tayn khint xoone fon haus aarwayt khan mache tas tee tenkt tas eyer tsu wichtich weyer fer tas mache. Tee mus ferxteen tas ti flicht foer ti ferkniichung khomt. Tes weeche, mus tee helfe im haus un noochte xpiile keen. Lee aus tas helfe in te haus aarwayt is kuut fer ti kans familye un tas se al sich fraye un iim respektiire wën eyer tas macht.

• Tsaych tas etwas fer anere mache is een eer. Anere petiine is ti haupst aat fer rayf wëre. Tes weeche, helef tayn khint mërke weer hilef praycht un was tee mache khan fer helfe. Loop un muut uf tayn khint wën eyer anere heleft.