Wëns tuu hilef suuchst fer mit te trauer um keen, tuust tuu fiile aanunge fine, awer net al tuun fer tich funtsyoniire. Tas khan pasiire wayl, wii mer xon kesaat hon, yeete eene tuut mit te phayn in een eensich aat um keen. Tes weeche, een itee woo fer een persoon funtsyoniirt, pariirt net imer fer te aner.

Noch soo, kepts etliche tinge woo khene nutslich sin. Phaar kelërntne layt saan tas se kuut funtsyoniire tuun. Un tii tuun aach kenau phase mit was een kluuch alt puuch, ti Piipel, kesaat hot.

• Tas is ti pest hilef woos tuu kriin khanst, tëm noo etliche kelërntne layt. Noch soo, als mool wilst tuu aleen sin. Khan sin tas tuu soo kaar pees wërst wën ti anere fersuuche tich helfe. Es is normaal sich soo xpiire.

• Tuu net tenke tas tuu must imer mit te anere sin, awer tuu tich aach net kans wech fon tëne hale. Khan sin tas tuu must tëne sayn hilef im futuer hon. Mit kuutheet, saa fer ti anere was tuu prauchst un was tuu net prauchst.

• Als mool prauchst tuu aleen sin, un als mool prauchst tuu mit te anere sin.

TI PIIPEL SAAT: “Tswaay sin peser wii ploos eene (...), wayl, wën eene fon tëne falt, te aner khan sayn mithelfer uf xtaye helfe.” (Eklesyastes 4:9, 10)

• Was kesuntes ese, helft uns mit te strës um keen woo fon te trauer khomt. Fersuuch ese unerxiitliche sorte friichte, kemiise un ese woo net soo fetich sin.

• Trink fiil waser un anere tinge woo kesunt sin.

• Wëns tuu net hunger host, tuu eftas een pisye ese. Tuu khanst aach anere aanunge fer tayn tokter ferlange. a

• Laafe un anere sorte esersiis mache, khan tich helfe tich peser fine. Tas khan tich helfe taytlicher tenke iwer was in tayn leepe keënert is, orer tich helfe aan was aneres tenke.

TI PIIPEL SAAT: “Khee man hast sayn aychne khërper, awer tuut tëm ese kepe un uf phase.” (Ëfeser 5:29)

• Xloofe is imer wichtich. Awer tas is hauptseechlich soo fer tii woo ti trauer mit mache. Ti trauer khan een persoon iwer moos miit lose.

• Tuu net tsu fiil kafeiin orer alkohool trinke, wayl tii khene tayn xloof xteere.

TI PIIPEL SAAT: “Es is peser een hant fol mit ruu wii een topelte hant fol mit xweyer aarwayt un te wint noo xpringe.” (Eklesyastes 4:6)

• Yeete persoon macht ti trauer anerste mit. Am ën, must tuu raus fine was te pest fer tich funtsyoniirt.

• Etliche xpiire sich kuut noo se mit anere iwer sayn xpiirunge xpreche, awer anere tuun liiper tas fer sich selepst pehale. Soo kaar kelërntne layt tuun net xtime iwer was te pest is. Im xtant, wilst tuu mit yemant fertseele, awer tuu finst es xweyer tas mache. Was khan tich helfe? Fang lamsam aan, un xprech iwer tayn xpiirunge mit een kuute fraaynt.

• Fer etliche layt, prile helft tëne mit te trauer um keen; xon anere, hale tas aus opwool se weenicher prile.

TI PIIPEL SAAT: “Yeete hërts khënt sayn aychne xmërts.” (Xpriiche 14:10)

• Etliche woo ti trauer mit mache, tuun trooke in nëme orer tsu fiil alkohool trinke fer sich peser xpiire. Soo was mache, tuut ploos xaate fer ti persoon pringe. Es is woer tas es khan ti persoon helfe sich peser xpiire, awer tas is ploos fer een khorts tsayt un pringt mee xaate wii nutse. Fersuuch tinge mache woo tayn phayn laychter lose, awer woo tich khee xaate pringe.

TI PIIPEL SAAT: “Wole mer uns fon ale sorte trek fon flayx un kayst sauwer mache.” (2^te Korinter 7:1)

• Fiile fine es kuut tinge mache woo se helfe net tsu fiil iwer sayn situatsyoon tenke.

• Im xtant, khanst tuu tsayt mit fraaynte aus kepe, was nayes lërne orer tich ferkniiche.

• Xrit noo xrit, tuut tayn hërts sich heele un tayn phayn wërt laychter.

TI PIIPEL SAAT: “Fer ales kepts een richtich tsayt (...): een tsayt fer se prile un een tsayt fer se lache; een tsayt fer se yaamare un een tsayt fer se tanse.” (Eklesyastes 3:1, 4)

• Soo xnel wiis meechlich is, fersuuch noch mool een normaal rutiin hon.

• Es is kuut een rutiin hon fer se xloofe, xafe un anere aktiwiteete mache. Tas tuut tich tsiimlich sicher helfe se xpiire tas tas leepe noch mool normaal is.

• Wëns tuu imer am mache pist etwas was tuu liipst, tuust tuu weenicher phayn xpiire.

TI PIIPEL SAAT: “Tee tuut kaar net mërke wii ti taache fon sayn leepe khorts sin, wayl te woere Kot macht tas eyer sich traan halt aan te frooheet fon sayn hërts.” (Eklesyastes 5:20)

• Fiile woo wichtiche ëntxlise mache klaych noo een liipe persoon ferliire, tuun sich xpeeter too tefun peroye.

• Wëns meechlich is, tuu een kuut tsayt waarte foer tich wanere, tayn aarwayt ënere orer ti tinge fon tëm keliipte wech xafe.

TI PIIPEL SAAT: “Ti pleen fon yemant woo flaysich is, tuun sicher kuut ap laafe. Awer tii woo wole ales fiks mache, kepe sicher aarm.” (Xpriiche 21:5)

• Fiile fine es kuut tinge mache woo se helfe sich traan tenke fon te liipe persoon woo kextorep is.

• Tuu khanst es soo mache: tuu pilter un anere tinge samele woo tich helfe traan tenke fon was teyer mitsamer keleept hot. Tsiimlich sicher, tuut tas tich treeste.

• Tuu tinge uf raume woo tich kuute erinerunge pringe; un xpeeter, wëns tuu tich fërtich xpiirst, khanst tuu tas kuke.

TI PIIPEL SAAT: “Tuu aan te friirixe tsayte traan tenke.” (Teuteronoomyum 32:7)

• Im xtant khanst tuu een rees mache.

• Wëns net meechlich is een lang rees mache, mach etwas woo tich froo lost torich een orer tswaay taache. Tsum payxpiil: tuu khanst in een xeen plats laafe keen, een museum pesuuche orer een khorts rees mim khare mache.

• Soo kaar een kleen ënerung in tayn rutiin khan tich helfe tich peser xpiire.

TI PIIPEL SAAT: “Khomt mit meer un wole mer pis een ruych plats keen fer een pisye ruue.” (Markus 6:31)

• Ferkes tich net: wëns tuu ti anere helfst, tuust tuu tich peser xpiire.

• Tuu khanst helfe tii woo ti trauer aach mit mache, wii tayn fraaynte un parente. Im xtant, prayche se aach een hilef fer mit te trauer um keen.

• Ti anere uner xtitse un treeste khan tich helfe noch mool froo un nutslich xpiire.

TI PIIPEL SAAT: “Kepe pringt mee frooheet wii se kriin.” (Aphostele sayn Kexicht 20:35)

• Ti trauer khan tich helfe ferxteen was wërklich wichtich is.

• Penuts tiise situatsyoon fer triwer noo se tenke aan was tuu mit tayn leepe am mache pist.

• Wëns neetich is, mach ënerunge in was tas haupste in tayn leepe is.

TI PIIPEL SAAT: “Es is peser tsu een haus keen woo se am traue sin wii tsu een haus woo se am fayre sin, wayl te toot is tas ën fon yeete mënx, un weer lepeentich is sol too triwer noo tenke.” (Eklesyastes 7:2)

 Es is woer tas niks tuut tayn phayn kans wech xafe. Awer, fiile woo ti trauer mit kemacht hon, hon kemërkt tas ti kuute aanreete fon tiise artikel hon se keholef troost fine. Kewis is tas net een komplët list iwer ales was tuu mache khanst fer tayn phayn laychter lose. Awer wëns tuu fersuuchst etliche fon tiise itee aan wëne, tsiimlich sicher tuust tuu tich peser xpiire.