“Mayn fraa Sophia a hot een krankheet torich een lang tsayt mit kemacht un tan, hon ich se im toot ferloer. Wii tas pasiirt is, waare mer xon mee wii 39 yoore ferhayrat. Mayn fraaynte hon mich fiil keholef un ich hat imer etwas se tuun. Awer, torich een kanse yoer, hon ich mich mechtich traurich kexpiirt. Mayn xpiirunge hon sich ofts uf een mool keënert. Noch hayt — neekst 3 yoore tëm noo —, als mool khomt een tiif traurichkheet woo ich kaar net aus leye khan.” — Kostas

Host tuu een keliipte im toot ferloer? Tan, sicher khanst tuu Kostas sayn xpiirunge ferxteen. Yemant khan fiil phayn xpiire wën sayn man orer fraa, een parent orer een ticht fraaynt xtërpt. Kelërntne layt woo xtutiire ti phayn woo ti trauer pringt, xtime too temit. Een artikel iwer ti trauer hot kesaat: “Ti layt woo yemant im toot ferliire, xpiire sich mechtich traurich, wayl se tenke tas tii hon ti persoon woo kextorep is fer imer ferloer.” Yemant woo soo een sort tiif traurichkheet xpiirt, khan sich frooe: “Wii lang tuun ich soo traurich plaype? Tuun ich een taach noch mool froo sin? Was khan mich helfe mich peser fine?”

Tiise frooche wëre keantwort in tiise etitsyoon fon Wacht Uf! Host tuu een keliipte khërtslich im toot ferloer? Te neekst artikel xprecht iwer was tuu xon waarte khanst. Ti anere artikele tsayche was tich helfe khan tich peser xpiire.

Meyer hofe tas tiise piichelche khan troost un hilef kepe fer ale tii woo ti trauer mit mache.