TRAUER — WAS HELFE KHAN?
Ti pest hilef fer tii woo ti trauer mit mache
IN TE LETSTE YOORE, FIILE HON TI TRAUER XTUTIIRT. Wii mer im letste artikel kesiin hon, ofts ti aanreete woo ti kelërntne layt kepe, xtime mit was ti Piipel saat. Tas tsaycht tas ti Piipel noch nutslich is. Awer in te Piipel, fine mer mee wii ploos kuute aanreete. Tii hot informatsyoone woo ploos tat sin un tii khan aach troost kepe fer tii woo ti trauer mit mache.
Meyer khene ti sicherheet hon tas ti keliipte woo kextorep sin net am layte sin
Ti Piipel saat tas “ti toote wise kaar niks mee” un tas “sayn ketanke ferxwine”. (Eklesyastes 9:5; Psalm 146:4) Ti Piipel tuut aach te toot mim xloof ferklayche. (Yoohan 11:11)
Meyer khene troost fine weeche unser klaape aan een liipliche Kot
Ti Piipel saat im Psalm 34:15: “Yeehoowa a sayn aue phase ti kerechte uf, un sayn oore heere wën se hilef ferlange.” Wën mer tsu Kot peete, kriin mer mee wii te troost woo khomt fon mit yemant fertseele; un tas is aach mee wii ploos een aat fer unser ketanke kontroliire. Tas kepeet tuut uns helfe een ticht fraayntxaft mit unser Kriatoer hon un tee khan sayn kraft penutse fer uns treeste.
Meyer khene een peser futuer hërtslich waarte
Ti Piipel tuut noo un noo xpreche iwer een tsayt woo ti toote tsurik tsum leepe keprung wëre too uf te eyert. Ti Piipel saat aach wii wërt ti situatsyoon too uf te eyert wën tas pasiirt: “[Kot] tuut yeete treene fon [unser] aue ap trokne, un es kept kheen toot mee, kheen traurichkheet, kheen krayxe un kheen phayn.” (Apokalipsis 21:3, 4) Khanst tuu tich foer xtele wii kuut wërt tas sin?
Fiile woo aan Yeehoowa, te Kot fon te Piipel, klaape, sin ferxtërkt kep fer ti trauer aus hale, wayl se ti hofnung hon fer sayn keliipte noch mool siin. Tsum payxpiil: Ann waar 65 yoore mit sayn man ferhayrat, awer tan is eyer kextorep. Tii saat: “Ti Piipel lost mich sicher tas ti keliipte woo kextorep sin, net am layte sin; un tas eene taach, tuut Kot uf ruufe ale tii woo in sayn erinerung sin. Imer wën ich aan mayn man tenke, tuun ich mich fon tiise ferxpreche erinere. Un tes weeche, khan ich aus hale tas xlimste tings woo xon mit mich pasiirt is!”
Tiina, iwer weem mer in te anere artikele kexproch hon, saat: “Ich hon Kot sayn hilef kexpiirt fon tëm taach aan woo mayn man kextorep is. Fer mich, waar es taytlich tas Yeehoowa mich am helfe waar in te xweyere tsayte. Ich hon een xtarke klaape aan tëm piiplixe ferxpreche fom ufxtaye. Tas tuut mich helfe mayn leepe wayter nëme pis te taach woo ich Timo noch mool siin.”
Milyoone layt woo aan te Piipel klaape, xpiire sich soo wii Ann un Tiina. Im xtant, tuust tuu tenke tas was ti Piipel saat tsu kuut is fer woer sin. Awer, meyer tuun tich uf muute fer mee lërne iwer sayn aanreete un ferxpreche. Im xtant tuust tuu raus fine tas ti Piipel ti pest hilef is fer tii woo ti trauer mit mache.
LËRN MEE IWER TI PIIPLIX HOFNUNG FER TI TOOTE
Kuk etliche wiiteos woo too triwer xpreche im site jw.org
Ti Piipel ferxprecht tas, im futuer, ti keliipte woo xon kextorep sin noch mool tsurik tsum leepe khome
a Ti Piipel tsaycht tas Kot sayn naame Yeehoowa is.
Fiilaycht tuust tuu aach kërn hon
FROOCHE IWER TI PIIPEL WOO KEANTWORT KEP SIN
Was is tas ufxtaye fom toot?
Weer wërt uf keruuft im tsukhunft?
