Fer yemant sayn fraaynt wëre, mise mer sayn kwaliteete khëne. Tas selwiche pasiirt mit Kot. Woo peser mer tëm sayn kwaliteete khëne, woo xtërker wërt unser fraayntxaft mit tëm. Kot hot fiile wunerliche kwaliteete, awer 4 sin ti haupste — sayn macht, sayn kluucheet, sayn kerechtichkheet un sayn liip.

‘Oo, Soweraan Hër Yeehoowa! Tuu host te himel un ti Eyert mit tayn kroose macht kemacht.’ (YEEREMIAS 32:17)

Ti kriatsyoon tsaycht wii mechtich Kot is. Tsum payxpiil, in een somer taach, wëns tuu traus pist, was xpiirst tuu uf te haut? Ti hits fon te sun. Tiise hits is een payxpiil fon te kroos macht woo Yeehoowa penutst hot fer ales mache. Un wii fiil kraft hot ti sun? Tas waser khoocht wën tas 100°C hays wërt. Awer ti mite fon te sun is unkefeer 150.000 mool hayser! Yeete sekunt, lost ti Sun enerxii aus woo sich ferklaycht mit hunerte milyoone nukleare pompe.

Awer ti sun is kleen wën ma se ferklaycht mit te milyoone anere xtërne im Uniwërsum. Ti syentiste rechne tas ti xtërn UY Scuti is fiil mool kreeser wii ti sun. UY Scuti is soo kroos tas, wën ma se im plats fon te sun xtele teet, teet se ti  Eyert un soo kaar Yupiter teke. Im xtant, tas helft uns peser ferxteen warom Yeeremias kesaat hot tas Yeehoowa te himel un ti eyert — es wil saan, tas Uniwërsum — mit sayn kroose macht kemacht hot.

Wii is Kot sayn macht nutslich fer uns? Unser leepe hëngt ap aan Kot sayn kriatsyoon, soo wii ti sun un al ti wunerliche tinge uf te eyert woo Kot kemacht hot fer uns fersoriche. Kot penutst aach sayn macht fer uns helfe. Tsum payxpiil, wii Yeesus uf te eyert waar, hot Kot tëm macht kep fer wunere mache. Ti Piipel saat: “Ti plinte tuun yets siin, ti laame tuun laafe, tii woo lëpra hate sin sauwer, ti taape tuun heere, ti toote sin uf keruuft.” (Matheus 11:5) Un hayt? Ti Piipel tsaycht tas Kot “kept kraft fer tii woo miit sin”. Tii saat aach: “Tii woo uf Yeehoowa hofe, kriin wiiter kraft.” (Isayas 40:29, 31) Kot khan uns “iwermeesich kraft” kepe fer uns helfe mit te xwiirichkheete fom leepe um keen. (2 Korinter 4:7) Yawool, weeche liip, penutst Kot sayn kroose macht fer uns helfe. Tas ferxteen, xaft uns tichter pay Tëm, kël?

“Wii fiil sin tayn aarwayte, oo Yeehoowa! Tuu host ales mit kluucheet kemacht.” (PSALM 104:24)

Woo tiifer mer lërne iwich Kot sayn kriatsyoon, woo mee tuun mer uns mit Sayn kluucheet ferwunere. In woerheet, tuun etliche syentiste Yeehoowa sayn kriatsyoon peopachte un phaar kleenichkheete noo mache fer sayn aychne proyëkte ferpesere. Khan ma tas siin, tsum payxpiil, in te proyëkt fon te luftxif orer fon te kleeser fon een kamera.

Tas wunerlichste payxpiil fon Kot sayn kluucheet is te mënxliche khërper. Tenk mool, tsum payxpiil, wii een nëneche wakst. Tas ales fangt aan mit een kleene sëlule. Awer in te richtich tsayt, sayn knoche, muskele, haut, ootere un anere oorkane fange aan sich ëntwikele. Noo 9 moonate, is tas nëneche xon komplët, mit pilyoone sëlule. Weeche ti kluucheet woo ma in tiise proyëkt siit, fiile xtime mit eene xrayper fon te Piipel, woo kesaat hot: “Ich loope tich wayl ich in een wunerlich aat kemacht kep sin.” (Psalm 139:14)

Wii is Kot sayn kluucheet nutslich fer uns? Unser Kriatoer wees was mer prayche fer froo sin. Tee penutst sayn kroos kluucheet un khëntnis fer uns aanreete kepe torich sayn Wort, ti Piipel. Tsum payxpiil, ti Piipel tuut uns aan reete: “Tuut aych wayter (…) krooshërtslich fertsaye.” (Koloser 3:13) Meecht tas een kluuch aanreet sin? Kans sicher! Unersuuchunge tsayche tas fertsaye helft uns, tsum payxpiil, peser xloofe, te pluut truk niter lose un uns keeche ti tiifsinichkheet xitse. Kot is wii een kluuche fraaynt woo sich mit uns khimert un kept imer kuute aanreete. (2 Timoteus 3:16, 17) Hëst tuu net kërn soo een sort fraaynt?

“Yeehoowa liipt ti kerechtichkheet.” (PSALM 37:28)

Kot macht imer was richtich is. Ti Piipel saat: “Te woere Kot teet nii was xlechtes mache, te Ale  Mechtiche teet nii was ferkheertes mache!” (Yoop 34:10) Yeehoowa sayn kerichte sin imer kerecht. Tes weeche, saat te psalmist: “Tuu tuust ti layt mit kerechtichkheet richte.” (Psalm 67:4) Layt woo sich ferxtele, khene net Yeehoowa hinerkeen, wayl tee “siit ins hërts”. (1 Samuël 16:7) Yeehoowa wees imer was woer is un sayn kerichte sin imer richtich. Kot siit aach ti kans unkerechtichkheet un xlechtichkheet woo uf te welt pasiire un tee hot ferxproch tas, hatich, ti xlechte “wëre fon te eyert wech kexaft”. (Xpriiche 2:22)

Awer Yeehoowa Kot is net een xtreng richter woo uns xtroofe wil. Wën es meechlich is, tuut eyer ti mënxe fertsaye. Ti Piipel saat im Psalm 103:8: “Yeehoowa is parmhërtslich un mitlaytich.” Tas kilt soo kaar fer tii woo xlecht sin, wën se sich wërklich peroye. Tas is sicher ti woere kerechtichkheet! (2 Pheeter 3:9)

Wii is Kot sayn kerechtichkheet nutslich fer uns? Te aphostel Pheeter saat: ‘Kot hoolt khee sayt, awer, in yeete natsyoon, tee nëmt aan weer tiif respekt tsu tëm hot un macht was richtich is.’ (Aphostele sayn Kexicht 10:34, 35) Wayl Kot khee unerxiit tswixich ti layt macht, meyer al khene nutse fon sayn kerechtichkheet kriin. Yeehoowa nëmt uns aan wii sayn tiiner ekaal unser ras, lant, xuul orer ep mer raych orer aarm sin.

Kot wil hon tas mer sayn kerechtichkheet ferxteen un nutse too tefun kriin. Tes weeche, hot eyer uns een kewise kep. Ti Piipel saat tas tas kewise is wii een kesets woo in unser hërts kexrip is un woo helft uns se wise ep unser aanxtelung richtich orer ferkheert is. (Romaaner 2:15) Wii is tas nutslich fer uns? Wën unser kewise kuut keiipt is, khan tas uns um hale tas xlechtes orer tas unkerechtes mache. Un wën mer was ferkheertes mache, tuut unser kewise uns uf muute uns peroye un noo lose tas mache. Yawool, Yeehoowa sayn kerechtichkheet ferxteen, helft uns un xaft uns tichter pay Tëm!

“Kot is liip.” (1 YOOHAN 4:8)

Ti Piipel saat net tas Kot macht, kluucheet un kerechtichkheet is, opwool Eyer tiise kwaliteete tsaycht. Awer ti Piipel saat tas Kot liip is. Warom? Tenk mool noo: weeche sayn macht, khan Kot mache ales was Tee wil; ti kerechtichkheet un kluucheet lenke was Tee macht; awer was Yeehoowa uf muut ales mache, is sayn liip. Ti liip influentsiirt ales was Tee macht. Wole mer etliche payxpiile kuke.

Yeehoowa praycht niks un nimant — niks tuut Tëm feele. Noch soo, hot ti liip tëm uf kemuut kluuche kriatuure mache fer im himel un uf te eyert leepe. Tiise kriatuure khene sich fraye wayl Yeehoowa se liipt un uf phast. Ti liip hot tee aach uf kemuut ti perfekt haymat fer ti mënxe foer perayte: ti eyert. Un Kot tuut wayter liip tsu ale mënxe tsayche, wayl “eyer lost sayn sun uf keen iwich ti xlechte un ti kuute un lost reene iwich ti kerechte un ti unkerechte”. (Matheus 5:45)

Un noch: Yeehoowa is “aarich liiplich un parmhërtslich”. (Tyako 5:11) Tee liipt al woo sich aan xtrenge fer tëm khëne lërne un ticht tsu tëm khome. Kot khënt yeete eene fon tëne. “In woerheet, is eyer net wayt fon yeete eene fon uns.” (Aphostele sayn Kexicht 17:27)

Wii is Kot sayn liip nutslich fer uns? Kot tsaycht uns sayn liip in fiile aate. Tsum payxpiil, torich tas lache fon een khint, ti liip fon unser familye, een xeen unerkang fon te sun... Tas is net neetich fer tas leepe, awer lost es fiil frooer.

Een aner pewaysung fon Kot sayn liip is tas kepeet. Ti Piipel saat: “Tuut weeche niks ëngstlich wëre. Awer, in yeete situatsyoon, ferlangt Kot sayn hilef torich peete, aan hale un tanke.” Kot is een liipliche Fater un tee wil hon tas mer tëm hilef ferlange fer mit unser propleeme um keen. Wën mer tas mache, ferxprecht Yeehoowa, weeche sayn krooshërtslich liip, uns sayn friit kepe “woo keet iwer ales woo ti mënxe ferxteen khene”. (Filiper 4:6, 7)

In tiise artikel, hon mer iwer Kot sayn haupste kwaliteete kexproch: sayn macht, kluucheet, kerechtichkheet un liip. Fer Tëm peser khëne lërne, wole mer yets siin was Eyer xon fer tich kemacht hot un noch mache tuut.