Wëns tuu wilst yemant khëne lërne, is es important se wise was eyer xon kemacht hot un was fer xwiirichkheete eyer xon mit keleept hot. Kraat soo, fer Kot peser khëne lërne, mise mer wise was eyer xon kemacht hot fer unser nutse un wii tas unser futuer petreft. Tas lërne, tuut tich ferwunere.

Yeehoowa is unser Kroos Kriatoer un “sayn kwaliteete woo ma net siin khan (…), sin taytlich kesiin fon te tsayt aan woo ti welt kemacht kep is, wayl tii sin kemërkt torich ti tinge woo kemacht kep sin”. (Romaaner 1:20) “Eyer is Tee woo ti eyert mit sayn kraft kemacht hot, tee woo tas fruchtpar lant mit sayn kluucheet kextelt hot un woo te himel mit sayn ferxtëntnis aus kexpant hot.” (Yeeremias 10:12) Ti wunerliche tinge woo Kot kemacht hot, tsayche aach tas eyer sich mit uns khimert.

Tenk mool noo wii ekstra unser leepe is wayl Yeehoowa ti mënxe “noo sayn pilt kemacht [hot]” — es wil saan, meyer khene Sayn kwaliteete noo mache, opwool tas net perfekt is. (Xeenesis 1:27) Kot hot uns aach ti apiliteet kep fer sayn ketanke un kesetse ferxteen. Wën mer tëm noo tiise kesetse leepe, kriin mer kreeser frooheet un aach een opjetiiw im leepe. Meyer khene aach een fraayntxaft mit Kot paue.

Wën mer peopachte ales was Kot too uf te eyert kemacht hot, siin mer tas eyer uns liipt. Te aphostel Phaul hot kesaat tas Kot “imer tsaye fon sich selepst kep hot, wayl eyer sayn kuutheet ketsaycht hot: eyer hot [uns] reen fom himel un friichte in sayn tsayt kep; tee hot [uns] kesoricht mit fiil ese un [unser] hërts mit frayt kefilt”. (Aphostele sayn Kexicht 14:17) Wii Kot ti eyert kemacht hot, hot eyer net ploos unser haupste neetichkheete fersoricht. In woerheet, hot eyer uns ales kep was neetich waar fer frooheet im leepe fine. Un tas is ploos een kleen “kexmak” fon was eyer uns im futuer kepe tuut.

 Yeehoowa hot ti eyert kemacht tas ti mënxe khente fer imer too truf woone. Ti Piipel saat: “Ti eyert, hot eyer fer ti mënxe soone kep.” (Psalm 115:16) Un tee hot net ti eyert “umsonst kemacht (…), awer hot se kemacht fer pewoont se wëre”. (Isayas 45:18) Was fer sort layt un wii lang teete se too uf te eyert leepe? “Ti kerechte tuun ti eyert kriin — antwort ti Piipel — un tuun fer imer too truf woone.” (Psalm 37:29)

Tas waar Yeehoowa sayn tsiil wii eyer Aatam un Ewa kemacht hot. Tee hot tas eyerste pheyerche uf een paratiis kextelt tas se “plantse un te kaate uf phase [teete]”. (Xeenesis 2:8, 15) Kot hot tëne tiise xeen aarwayt kep: “Tuut khiner kriin, un wërt fiil un macht ti Eyert fol, un tuut se aych iwernëme.” (Xeenesis 1:28) Soo Aatam un Ewa hate foer sich ti hofnung fer een froo un eewiche leepe too uf te eyert hon. Es is xaat, awer tii hon raus kesuucht Kot unfoliche un soo, hon se ti xans ferloer fer tswixich “ti kerechte” sin woo “ti eyert kriin” teete. Meecht Yeehoowa too teweeche sayn tsiil keënert hon? Nee! Noo heyer tuun mer tas peser aus leye, awer eyerst, wole mer een aner tings siin woo Kot xon kemacht hot.

Ti Piipel is aach kenënt Kot sayn Wort. Warom hot Yeehoowa uns ti Piipel kep? Hauptseechlich tas mer iwer tëm lërne khonte. (Xpriiche 2:1-5) Es is woer tas ti Piipel net een antwort kepe tuut fer yeete frooch woo mer iwer Kot hon — kaar khee puuch khent soo was mache. (Eklesyastes 3:11) Awer ales was in te Piipel xteet, helft uns Kot khëne lërne. Meyer khene mërke wii Kot is wën mer siin wii eyer mit te layt um keet. Meyer siin aach was fer sort layt tëm kefale orer net. (Psalm 15:1-5) Meyer lërne was fer sort aanpeetung tee aan nëmt, was richtich un ferkheert foer sayn aue is un was eyer tenkt iwer materyaalixe tinge. In te Piipel, fine mer aach ti wërter un aktsyoone fon Yeesus Kristus, Kot sayn Soon. Tas helft uns taytlich siin was fer sort persoon Yeehoowa wërklich is, wayl Yeesus hot tëm perfekt noo kemacht. (Yoohan 14:9)

Yeehoowa hot uns aach sayn Wort kep tas mer wise khente wii een froo leepe hon, mit een opjetiiw. Torich ti Piipel, saat uns Yeehoowa wii mer khene een froo familye hon, tsufriite sin un mit te ëngstlichkheete um keen. Un wii tiise piichelche noch aus leye tuut, hot ti Piipel ti antworte fer ti wichtichste frooche fom leepe, soo wii: Warom kept es soo fiil eelent? Was tuut im futuer pasiire? Was hot Kot xon kemacht fer sich sicher lose tas sayn tsiil erfiilt wërt?

Noch fiil anere kleenichkheete pewayse tas ti Piipel wërklich een wunerlich puuch is un tas se fon Kot khomt. Unkefeer 40 mëner hon ti Piipel kexrip torich 1.600 yoore. Noch soo, sayn haupste theema is imer tas selwiche, wayl sayn woere Autoer Kot is. (2 Timoteus 3:16) Anerste wii anere alte piicher, is sayn pexeet net keënert kep torich ti yoore. Tausente alte hantxrifte fon te Piipel tuun tas pewayse. Un opwool fiile mënxe sich aan kextrengt hon keeche ti iwersetsung, austeelung un leesung fon te Piipel, hot se tas ales iwerleept. Hayt kept es khee aner puuch woo soo fiil iwersetst un ferkhaaft is. Pis hayt, khene mer ti Piipel leese un tas is een taytlich pewaysung tas “tas wort fon unser Kot playpt fer imer”. (Isayas 40:8)

Fer sich sicher lose tas sayn tsiil erfiilt weyer, hot Kot aach een wunerlich kexenk uns kep. Wii mer xon kesaat hon, Kot wolt hon tas ti mënxe fer imer uf te eyert leepe teete. Awer Aatam hot ëntxlist Kot unfoliche; weeche tiise sint, hot eyer tas recht ferloer fer eewiche leepe hon un sayn khiner, woo noch uf te welt khome teete, hon tiise recht aach ferloer. “Soo wii torich een mënx ti sint in te welt khom is, un torich ti sint te toot, soo hot sich te toot tsu ale mënxe ferprayt, wayl se al kesint hate.” (Romaaner 5:12) Es khent aus siin tas weeche Aatam sayn unfolichkheet, weyer es net meechlich Kot sayn tsiil erfiile. Was hot Yeehoowa tan kemacht?

Yeehoowa sayn aktsyoone hon mit sayn kwaliteete kextimt. Weeche Kot sayn kerechtichkheet,  hot eyer Aatam un Ewa kextrooft weeche ti unfolichkheet. Awer weeche sayn liip, hot Yeehoowa aach etwas kemacht fer een peser futuer fer ti mënxheet kepe. Mit kluucheet, hot Yeehoowa ëntxlist was se mache in tiise situatsyoon un hot klaych een solutsyoon pekhant kemacht: Kot teet uns fon te sint un fom toot pefraye torich sayn Soon, Yeesus Kristus. (Xeenesis 3:15) Was waar too tepay?

Fer ti mënxe rete fom xaate woo Aatam sayn repelyoon keprung hot, hot Yeehoowa Yeesus tsu te eyert kexikt fer ti mënxe in lërne te weech fom leepe un aach fer “sayn leepe kepe wii een opfer fer fiile fray se khaafe”. a (Matheus 20:28; Yoohan 14:6) Yeesus khent sayn leepe wii een opfer kepe wayl eyer perfekt soo wii Aatam waar. Awer anerste wii Aatam, hot Yeesus imer Yeehoowa aan keheert, soo kaar foer te toot. Wayl Yeesus net fertiint hot se xtërpe, hot Yeehoowa tëm fom toot uf keruuft un tëm kelos tsurik tsum himel keen. Soo khont Yeesus fer ti foliche mënxe etwas kepe woo Aatam net kepe khont: eewiche leepe. “Wayl, soo wii torich ti unfolichkheet fon eene mënx, sin fiile mënxe tsu sinter kemacht kep, soo aach, torich ti folichkheet fon ploos eene mënx, wëre fiile tsu kerechte kemacht.” (Romaaner 5:19) Torich Yeesus sayn fray khaaf opfer, tuut Yeehoowa sayn ferxpreche erfiile: ti mënxe tuun fer imer uf te eyert leepe.

Ti aat wii Yeehoowa ti propleeme resolwiirt hot, woo weeche Aatam sayn repelyoon khom sin, helft uns Yeehoowa peser khëne lërne. Meyer lërne tas niks khan Kot um hale sayn wile erfiile; sayn wort tuut sich “sicher erfiile”. (Isayas 55:11) Meyer lërne aach tas Yeehoowa uns fiil liipt. “Torich tas, is Kot sayn liip tsu uns taytlich: Kot hot sayn eensiche kepoerne Soon uf te welt kexikt, tas mer torich tee leepe kreechte. Ti liip halt sich net tas meyer Kot keliipt hon, awer tas eyer uns keliipt hot un hot sayn Soon kexikt wii een opfer fer unser sinte teke.” (1 Yoohan 4:9, 10)

Kot waar wilich fer uns soo kaar sayn aychne Soon kepe; tas lost uns sicher tas eyer al ti anere tinge woo eyer uns ferxproch hot, kepe tuut. (Romaaner 8:32) Awer was fer anere tinge hot eyer uns ferxproch? Wole mer tas yets siin.