“Wii heest tuu?” — tas is tsiimlich sicher ti eyerst frooch woo mer mache wën mer yemant khëne lërne wole. Wën mer khente tiise frooch fer Kot mache, was weyer sayn antwort?

“Ich sin Yeehoowa. Tas is mayn naame.” (Isayas 42:8)

Te naame is important fer Kot selepst. Nimant hot tiise naame fer Kot kep: tee selepst hot tas raus kesuucht. Yeehoowa hot kesaat: “Tas is mayn naame fer imer, un soo sol ich fon xeneratsyoon tsu xeneratsyoon erinert wëre.” (Eeksotus 3:15) In te Piipel, te naame Yeehoowa khomt eftas foer wii ti thitele Ale Mechtiche, Fater, Hërkot orer Kot. Tee khomt aach eftas foer wii perseenliche naame, soo wii Apraham, Mooses, Tawi orer Yeesus. Es is aach Yeehoowa sayn wile tas ti layt sayn naame khëne lërne. Ti Piipel saat: “Ti layt sole wise tas tuu, woo Yeehoowa heest, ploos tuu pist te Ale Heechste iwer ti kans eyert.” (Psalm 83:18)

Te naame is important fer Yeesus. In was mer hayt khëne wii tas Fater Unser kepeet, hot Yeesus sayn tisipele in kelërnt tsu Kot peete mit too tii wërter: “Tayn naame sol kehaylicht wëre.” (Matheus 6:9) Yeesus selepst hot tsu Kot kepeet: “Fater, ferhërlich tayn naame.” (Yoohan 12:28) In Yeesus sayn leepe, waars aarich important Kot sayn naame ferhërliche. Tes weeche khont eyer fer Kot peete: “Ich hon tëne tayn naame pekhant kemacht un ich tuun tëm wayter pekhant mache.” (Yoohan 17:26)

Te naame is important fer tii woo Kot khëne. Kot sayn troye tiiner in te ferkangne yoore wuste tas sayn xitsung un retung ferpunt waare mit Kot sayn kroose naame. Eene fon tëne hot erkhënt: “Yeehoowa sayn naame is een xtark thorm. Te kerechte xpringt tat rin un kriit xuts.” (Xpriiche 18:10) Een aner hot kesaat: “Al tii woo Yeehoowa sayn naame  aan ruufe, wëre keret.” (Yoël 2:32) Ti Piipel tsaycht tas Kot sayn naame teet sayn tiiner itentifitsiire: “Ale foleke keen yeete eene im naame fon sayne kot, awer meyer keen im naame fon Yeehoowa, unser Kot, fer imer un eewich.” (Mikeyas 4:5; Aphostele sayn Kexicht 15:14)

Te naame tsaycht tas nimant sich mit Kot ferklaycht. Fiile piiplixe leerer xtime tas Kot sayn naame petayt “Tee macht tas es wërt”. Ti aat wii Yeehoowa iwer sich selepst kexproch hot wii eyer mit Mooses fertseelt hot, helft uns ferxteen was tëm sayn naame petayt. Kot hot kesaat: “Ich Wëre Was Ich Wëre Wil.” (Eeksotus 3:14) Soo, sayn naame lërnt uns in tas Eyer te Kriatoer is — tee woo macht tas ales eksistiirt. Een aner tings woo mer mit sayn naame lërne, is tas Yeehoowa khan wëre was neetich is orer mache tas sayn kriatsyoon wërt was neetich is fer sayn tsiil erfiile. Kot sayn thitele tsayche sayn xtel, autoriteet un kraft, awer ploos sayn naame, Yeehoowa, tsaycht weer eyer wërklich is un was eyer wëre khan.

Te naame tsaycht tas Kot sich mit uns khimert. Ti petaytung fon Kot sayn naame tsaycht tas eyer sich imer khimere tuut mit sayn kriatsyoon, too tepay uns. Un wayl Kot uns sayn naame ketsaycht hot, wise mer tas Eyer wil hon tas mer tëm khëne lërne. Kot hot te eyerste xrit kep fer uns sayn naame pekhant mache un tee hot tas kemacht tausente yoore eep mer uf te welt khom sin. Es is taytlich tas Yeehoowa wil net hon tas mer tëm siin wii een kayst woo wayt wech is, awer wii een echte persoon mit weem mer khene een fraayntxaft paue. (Psalm 73:28)

Wën mer Kot sayn naame penutse, tsayche mer tas mer uns mit Kot khimere. Xtel tich mool foer tas tuu wilst yemant sayn fraaynt wëre. Tuu saast tëm: “Tuu khanst mich torich mayn naame ruufe.” Wii teest tuu tich xpiire wën ti persoon tas net mache wil? Khan sin tas, mit te tsayt, teest tuu tich frooe ep ti persoon wil wërklich tayn fraaynt sin. Tas selwiche pasiirt mit Kot. Yeehoowa hot sayn naame fer ti mënxe pekhant kemacht un tee muut uns uf tas penutse. Wën mer tas mache, tsayche mer tas mer wole ticht pay tëm khome. Ti Piipel saat tas Kot mërkt “tii woo aan tëm sayn naame traan [tenke]”. (Malakias 3:16)

Kot sayn naame lërne, is te eyerste xrit fer Tëm khëne lërne. Awer ploos sayn naame wise, is net kenuuch. Meyer mise ti Persoon hinich te naame khëne lërne — es wil saan, sayn personaliteet.