Een kuute fraaynt is yemant woo uns helft wën mer propleeme mit mache. Tes weeche, fer etliche, is Kot net unser fraaynt wayl se tenke tas eyer niks fer uns macht. Awer in woerheet, hot Kot xon fiile tinge fer uns kemacht. Un noch: klaych tuut Kot al unser propleeme resolwiire un tas ën fon te eelent pringe. Was tuut Kot mache fer tas hin kriin?

Fer ti xlechtichkheet fermache, tuut Kot ti uersach hinich tëne tsum ën pringe. Ti Piipel tsaycht was tiise uersach is in 1 Yoohan 5:19: “Ti kans welt is in te macht fom Xlechter.” Te “Xlechter” is Satanaas, te Taywel, tee woo Yeesus keruuft hot “te rechiirente fon tiise welt”. (Yoohan 12:31) Satanaas sayn influens is ti uersach hinich al ti xwiirichkheete woo ti mënxheet petrefe. Was tuut Kot too triwer mache?

Klaych, tuut Yeehoowa sayn Soon penutse fer se “fernichte tee woo ti kraft hot fer te toot pringe — es wil saan, te Taywel”. (Hepreeyer 2:14; 1 Yoohan 3:8) In woerheet, ti Piipel tsaycht tas te Taywel “wees tas eyer een khorts tsayt hot”, es wil saan, tas sayn fernichtung ticht is. (Apokalipsis 12:12) Kot tuut aach ti xlechte layt fernichte. (Psalm 37:9; Xpriiche 2:22)

Unser Kriatoer tuut ti xlechtichkheet tsum ën pringe un tan sayn eewich tsiil fer ti eyert un ti mënxheet erfiile. Wii wërt tas leepe in tiise tsayt sin?

Eewiche friit un sicherheet. “Ti tsaame tuun ti eyert kriin un tii tuun sich mechtich fraye im iwer kroos friit.” (Psalm 37:11)

Fiil kesunte ese. “Es tuut tan aarich fiil sereaal uf te eyert kepe, soo kaar uf te kiple fon te përiche wërt es iwer fiil kepe.” (Psalm 72:16)

Kuute hayser un een aarwayt woo uns tsufriite lost. “Tii tuun hayser paue un in tëne woone; un tuun traupe kriste plantse un tëne sayn friichte ese. (…) Mayn raus kesuuchtner tuun ti aarwayt fon sayn aychne hënt kans aus nutse.” (Isayas 65:21, 22)

Teest tuu kërn in soo een sort welt leepe? Klaych, tuut tas ales pasiire.

Hayt, tuun mer al krank wëre un, mit te tsayt, xtërpe. Awer tas tuut net fer imer pasiire. Palt, torich Yeesus Kristus sayn fray khaaf opfer, tuut ‘yeete eene woo aan tëm klaapt net fernicht wëre, awer tuut eewiche leepe kriin’. (Yoohan 3:16) Wii wërt tas leepe in tiise tsayt sin?

Ti krankheete tuun net mee eksistiire. “Khee pewooner tuut saan: ‘Ich sin krank.’ Tas folek woo uf tiise lant woont, kriit sayne sinte fertsayt.” (Isayas 33:24)

Te toot tuut net mee ti mënxheet petrefe. “Eyer tuut te toot fer imer wech xafe, un te Soweraan Hër Yeehoowa tuut ti treene fon ale kesichte ap trokne.” (Isayas 25:8)

Ti layt tuun fer imer leepe. “Tas kexenk woo Kot kept, is eewiche leepe torich Yeesus Kristus, unser Hër.” (Romaaner 6:23)

Tii woo kextorep sin, tuun noch mool leepe. ‘Es kept een ufxtaye fom toot fon te kerechte soo wii fon te unkerechte.’ (Aphostele sayn Kexicht 24:15) Ti toote tuun aach nutse fon tëm fray khaaf opfer kriin.

Wii tuut Kot tas ales mache?

Kot tuut sayn tsiil fer ti mënxe un ti eyert erfiile torich een himlix rechiirung; Yeesus wërt te Kheenich fon tiise Raych sin. (Psalm 110:1, 2) Yeesus hot sayn tisipele in kelërnt se peete weeche tiise Raych, mit te wërter: “Unser Fater im himel (…), tayn Raych sol khome.” (Matheus 6:9, 10)

Kot sayn Raych tuut iwer ti kans eyert rechiire un al ti phayn un xwiirichkheete tsum ën pringe. Es weyer unmeechlich een peser rechiirung hon! Tes weeche, hot Yeesus sich aan kextrengt fer ti “kuute notisye fom Raych” preetiche too uf te eyert; tee hot aach kexikt sayn tisipele tas selwiche mache. (Matheus 4:23; 24:14)

Wayl Yeehoowa ti mënxe soo fiil liipt, hot eyer ferxproch tiise kanse kuute tinge fer uns mache. Sicher, tas tuut tich uf muute tëm khëne lërne un ticht pay tëm khome. Wëns tuu raus suuchst tas mache, was fer nutse tuust tuu kriin? Te neekste artikel xprecht too triwer.