“Oo Heerer fon kepeete, tsu teer khome ale sorte mënxe.” (Psalm 65:2)

Etliche layt peete ale tëm se net klaape tas yemant horicht. Tii mache tas wayl se tenke tas xpreche iwich iire xpiirunge un sich aus lose in een kepeet wërt helfe sich peser xpiire. Awer te opjetiiw fom kepeet is net ploos mache tas ma sich peser xpiirt un khan peser um keen mit te propleeme. Ti Piipel kept uns ti sicherheet tas “Yeehoowa a is ticht pay ale woo tëm aan ruufe, pay ale woo tëm in woerheet aan ruufe . . . . Tee heert wën se tëm ruufe fer hilef kriin.” (Psalm 145:18, 19)

Tan khene mer uns sicher sin tas Yeehoowa ti kepeete fon sayn tiiner horicht. Mit kroos liip kept tee ti karantii: “Iir wërt mich ruufe un tsu mich in kepeet khome, un ich tuun aych horiche.” (Yeeremias 29:12)

“Tuut wayter peete.” (Romaaner 12:12)

Ti Piipel muut uns uf fer “wayter peete” un “in yeete xtun”. Tas tsaycht klaar tas Yeehoowa Kot wil tas ti layt tsu iim peete sole. (Matheus 26:41; Ëfeser 6:18)

Warom wil Kot tas mer tsu iim peete sole? Tenk mool: Eene papa frayt sich wën sayn khint sayn hilef ferlangt, kël? Is woer tas oft mools te papa xon wees was tas khint prauch. Awer, wën te papa horicht sayn khint iim sayn hilef ferlange, xpiirt te papa tas se uf iim traut un sich aan iim halt. Soo is tas aach wën mer tsu Yeehoowa Kot peete. Tan tsayche mer tas mer uf iim traue un tas mer wole sayn fraaynte sin. (Xpriiche 15:8; Tyako 4:8)

‘Wëreft ayre kanse soriche uf tëm, wayl Eyer aych uf phast.’ (1 Pheeter 5:7)

Kot wil tas mer tsu iim peete sole wayl eyer uns liipt un khimert sich mit yeete eene fon uns. Tee khimert sich um unser propleeme un ëngstlichkheete, un tee wil uns helfe.

Torich sayn kans leepe, hot te kheenich Tawi tsu Yeehoowa Kot kepeet un sayn hilef ferlangt. Tee hot aach Kot fertseelt iwich sayn ketanke un xpiirunge. (Psalm 23:1-6) Was hot Kot kexpiirt iwich Tawi? Tee hot Tawi keliipt un hot sayn kepeete kehoricht. (Aphostele sayn Kexicht 13:22) Kraat soo, horicht Kot aach unser kepeete wayl tee sich mit yeete eene fon uns khimert.

Tas waar was een xrayper fon een Psalm kesaat hot. Tiise wërter tsayche tas tee sicher waar tas Kot sayn kepeete heere teet, un tas hot iim fiil keholef. Tee hot sich ticht pay Kot kexpiirt un tas hot iim kraft kep fer um keen mit sayn propleeme un ti traurichkheete fom leepe. (Psalm 116:1-9)

Wën mer uns sicher sin tas Kot unser kepeete horicht, wëre mer foran peete. Kuk Pedro sayn payxpiil. Tee woont in nort fon Xpanya, un hot sayne soon fon 19 yoer in een unfal ferloer. In sayn tiife xmërtse, hot tee foer Kot sayn hërts aus kexut in een kepeet un oft mools sayn troost un hilef ferlangt. Was is pasiirt? Tee saat: “Yeehoowa hot mayn kepeete keantwort torich te troost un hilef woo ich un mayn fraa kriit hon fon unser priiter im klaape.”

Ti antwort fer unser kepeete khan khome torich te troost un hilef fon unser liipe fraaynte. Is woer tas ti kepeete hon net iire soon tsurik kepracht, awer kans sicher waar tas een kroos hilef fer Pedro un sayn familye. Sayn fraa, Maria Carmen, erinert sich: “Tas kepeet hot mich keholef aus hale mayn xmërtse. Ich wust tas Yeehoowa Kot teet mich ferxteen wayl, wii ich tsu iim kepeet hon, hon ich kexpiirt tas tee mich ruu un friit kep hot.”

Ti Piipel un payxpiile soo wii Pedro sayn, pewayse tas Kot wërklich unser kepeete horicht. Awer is woer tas Kot net ale sorte kepeete antwort. Warom antwort eyer etliche kepeete un anere net?